Ọgba Owọnren Ọrhẹ Ibiẹ Ọgbọtọ na

Uvuẹn ẹkwotọre i Syria, o vwo ibiẹ ọgbọtọ onyẹ Israel owu re mwu riẹ evrẹn ekete oseseri. Isodja i Syria i mwurien nyajẹ ekrun ọnẹyen vwo, vwarana, ọye nẹ ọvrẹn harẹn ane olotu isodja i Syria rẹ odẹ ye o rhiẹ Naaman. Ibiẹ ọgbọtọ na ọ ga i Jehova, dedevwo ihworho re rhirhiẹ kẹriẹ i vwa ga i Jehova-a.

Naaman o kpomu emiamo oti, nọ lẹrhiẹ vwo omiamiamo ọke ephian. Ibiẹ ọgbọtọ na ọ ghini guọlọ ha userhumu rẹn i Naaman. Omarana, ibiẹ ọgbọtọ na nọ ta rẹn ane i Naaman: ‘Mi rhe ohworho rọ nọ sabu simi esa ọnọ. O vwo ọmẹraro i Jehova owu uvuẹn Israel rẹ odẹ ye o rhiẹ Elisha. Ọnọ sabu simi esa ọnọ.’

Ane i Naaman nọ ta rẹn i Naaman oborẹ ibiẹ ọgbọtọ na ọ ta riẹn. Naaman ọ guọlọ ru kemru kemru neneyo omayen ọ sabu gbanhon, omarana, no riẹ oghwa Elisha uvuẹn Israel. Naaman o fiẹrorhọ taghene Elisha ono dedie nime ọye ohworho ọduado. Ukperẹ ono rhiẹ omaran, Elisha no dje odibo yi ya vwa i Naaman, nọ jeghwai ta riẹn oborẹ ono ruo: ‘Nyarhẹn, ya wọ uvuẹn Urhie i Jordan ọgbọ irhiruẹ. Emiamo ọnọ nẹ ono rie.’

Ẹhẹn i Naaman no seriotọre. Naaman nọ tare: ‘Mi rorori taghene ọmẹraro ọnana ono simi mẹ nyoma ono se Osolobrugwẹ ye, jeghwai hobọ kpahen urhomu mẹ. Ukpomaran, nọ ta mẹ taghene mi riẹ Urhie i Jordan. Ame i vwo irhie ri rhomu ghwẹ ọnana uvuẹn i Syria. Mesoriẹ ọ vwọ ta mẹ ni mi riẹ oboran?’ Naaman nọ tuekwẹre, no nẹ oghwa Elisha.

Idibo i Naaman ni kpọ iroro yi vi. Aye ni ta riẹn: ‘O fo ne wu ru kemru kemru neneyo oma ọnọ ọ sabu gbanhon? Oborẹ ọmẹraro ọnana ọ ta wẹn taghene wu ru na, ọ lọhọre omamọ. O fori ne wu ruie.’ Naaman no kwerhọ oborẹ aye i tarẹ na. No riẹ Urhie i Jordan ya wọ ọgbọ irhiruẹ. Ọke rọ wọ ọgbọ ọrẹ irhiruẹ ye, emiamo i Naaman no rieri. Oma nọ merhenriẹn, nọ ghwẹrioma ya kpẹmẹ Elisha. Naaman nọ tare: ‘Vwarana, mi mẹrẹnvwrurhe ne taghene Jehova yẹ Osolobrugwẹ urhomẹmro na.’ Marhẹ wu rorori taghene oma ono ru ọgbọtọ na ọke rọ mẹriẹn taghene emiamo i Naaman o rie ne?