Jesu o Simi Ohworho Uvuẹn Ẹdẹ i Sabbath

Otu i Pharisee na i vwo utuoma kpahen i Jesu, aye na guọlọ izede rẹ aye ine mwuie. Aye ni tare taghene i Jesu o vwo simi ihworho re kpomẹ uvuẹn ẹdẹ i Sabbath na-a. Ẹdẹ i Sabbath owu, Jesu nọ mẹrẹn ọhworhare owu ro tuẹro, rọ rẹ igho uvuẹn udumu na. Jesu nọ ta rẹn idibo yi: ‘Are i ni oborẹ omẹgbanhon Osolobrugwẹ ono simi ọhworhare ọnana lele.’ Jesu no gbe erhẹnrhen ọnẹyen ọrhẹ eyẹn kugbe, nọ hariẹ gbule ukẹro ọhworhare na. Jesu nọ ta riẹn: ‘Nyarhẹn, ye ghwe ughwaruọ uvuẹn etẹrhe ame i Siloam.’ Ọhworhare na no ghini ru omaran, nọ mẹrẹn ude, ọnana yẹ ọke ukaro rẹ ọhworhare na, ọ mẹrẹn ude avwọke e vwiẹ ye.

No gbe ihworho unu. Aye ni nọren: ‘Ọnana ọhworhare ro siyẹ rẹ erarẹ na gbinẹ ohworho rọ họheriẹ?’ Ọhworhare na nọ tare: ‘Mẹmẹ yẹ ohworho ro tuẹro ne evwan rhe na!’ Ihworho na ni nọ riẹn: ‘Marhẹ ukẹruọ o ru rhie?’ Ọke rọ ta rẹn aye oborẹ ọ phiare, aye ni hariẹ vwe otu i Pharisee na.

Ọhworhare na nọ ta rẹn otu i Pharisee na: ‘Jesu ọ ha emru gbule ukẹro mẹ, nọ ta mẹ taghene mi ye ghwe ughwaro mẹ. Ni mi ghini ye ghwe yi, vwarana, mia mẹrẹn ude ne.’ Otu i Pharisee na ni tare: ‘Orhianẹ i Jesu o simi ohworho ẹdẹ i Sabbath, nọyẹ omẹgbanhon ọnẹyen o nẹ obẹ Osolobrugwẹ rhe-e.’ Ọrẹn, awọrọ ni tare: ‘Orhianẹ rhẹ obẹ Osolobrugwẹ yẹ omẹgbanhon ọnẹyen o nurhe-e, manẹ ọ vwọ sabu simi ohworho owuorowu-u.’

Otu i Pharisee na ni se ọsẹ ọrhẹ izu ọhworhare na, aye ni nọrẹn aye: ‘Marhẹ ukẹro ọmọ are o ru rhie?’ Ofẹn no mwu eri vwiẹriẹ, nime otu i Pharisee na i tare taghene ene le kohworho kohworho ro vwo esegburhomẹmro kpahen i Jesu nẹ synagogue na. Omarana, ọsẹ ọrhẹ izu ọhworhare na ni tare: ‘Ame e rhe-e. Are ọvo i nọ yen.’ Otu i Pharisee na, na nọ ọhworhare na enọ erọrọ, te erhirhiẹ rọ ta: ‘Mi ta rẹn are oborẹ mi rheri ne. Mesoriẹ are a ji nọ mẹ?’ Otu i Pharisee na, na tuekwẹre, aye ni mwa riẹn ruẹ otafe.

Jesu nọ yọ guọlọ ọhworhare na, nọ nọ riẹn: ‘Wu vwo esegburhomẹmro kpahen i Messiah na?’ Ọhworhare na nọ tare: ‘Mi rhe rhe yi, mi ne vwo esegburhomẹmro kpahiẹn.’ Jesu nọ tare: ‘Mẹmẹ yi Messiah na.’ Ọrana rhẹ uruemru esiri ri Jesu o djephia? Jesu o simi ọhworhare na, nọ jeghwai ha userhumu riẹn vwo esegburhomẹmro.