E Mwu i Jesu

Jesu ọrhẹ inyikọ na ni nya ekpakpa igbenu i Kidron riẹ Ugbenu Olives. Ọke ọrana, ason o te ne, habaye, ubiamo na ọ dabu kinhariẹ ne. Ọke aye e te ogba Gethsemane, Jesu nọ ta rẹn inyikọ na: “Are i daji aran, nẹ are i rha dẹrẹ.” Omarana, Jesu no riẹ uvuẹn ogba na ibiesuọn, no sighwẹ. Jesu nọ nẹrhomo vwe i Jehova uvuẹn erhirhiẹ omiamiamo rọ havwọ na, nọ tare: “Jenẹ ọhọre ọnọ o rugba.” Omarana, Jehova no dje ọmakashe vwe i Jesu no ruie gbanhon. Ọke i Jesu ọ ghwẹrioma bru inyikọ na, nọ mẹrẹnvwrurhe taghene aye a merhẹn. Jesu nọ ta rẹn aye: ‘Are i rhọmọ! Ọnana rhẹ ọke are ina merhẹ-ẹn! O te ọke evwreghrẹn mẹ ine mwu mẹ ne.’

Ogege, Judas ọrhẹ otu ilogbozighi buebun ni rhere, aye i ha odan ọlọkọ ọrhẹ erhan mọrọn obọ. Judas o rhe ekete ọnọ mẹrẹn i Jesu, nime ọye rhẹ i Jesu i riẹ ogba Gethsemane ọgbọ buebun ne. Judas ọ ta rẹn isodja na taghene ọye ono dje i Jesu harẹn aye. Judas nọ nya bru i Jesu, nọ mroma riẹn: ‘Doo, Oyono,’ omarana, nọ fiọnfiọn i Jesu. Jesu nọ tare: ‘Judas, wa rhẹ mẹ nyoma unu ẹfiọnfiọn?’

Jesu nọ nọ otu ilogbozighi na: “Ọrọmo yẹ are a guọlọ?” Aye ni tare: “Jesu onyẹ Nazarene na.” Omarana, Jesu nọ kpahenrhọ rẹn aye: “Mẹmẹ na,” ehworhare na ni ti rierhumu jeghwai sebru otọre. Jesu nọ nọ otu na ọgbọrọrọ: “Ọrọmo yẹ are a guọlọ?” Ọgbọrọrọ, aye ni tare: “Jesu onyẹ Nazarene na.” Jesu nọ kpahenrhọ rẹn aye: ‘Mi ta rẹn are ne taghene mẹmẹ na. Are i tiobọnu ehworhare enana nẹ aye i nyarhẹn.’

Ọke i Peter o vwẹruọ oborẹ ọ phia na, no shoro odan ọlọkọ phia, nọ fian orhọ i Malchus ro rhiẹ ọvrẹn Orherẹn Ọduado na. Ọrẹn, Jesu nọ hobọte orhọ ọhworhare na, no simi rien. Omarana, nọ ta rẹn i Peter: ‘Ha odan ọlọkọ na ghwẹrioma. Wu rha ha odan ọlọkọ wọnrọn, wu ne hwuo nyoma odan ọlọkọ.’ Isodja na ni mwu i Jesu jeghwai gba abọ ye, inyikọ na ni zẹre. Ilogbozighi na ni ha i Jesu vwe Annas, ro rhiẹ olori irherẹn na. Annas nọ nọ i Jesu enọ, ọke oru, nọ ha i Jesu riẹ oghwa Caiaphas ro rhiẹ Orherẹn Ọduado na. Ọrẹn, me yọ phia rẹn inyikọ na?