Ekete Ọrhẹ Ọke ra ha Nẹrhomo ọ Ghanranren?

O VWO ẹfro-o, ọkezẹko wu mẹrẹnvwrurhe ne taghene ẹga buebun a ta rẹn ihworho kpahen ekete ọrhẹ ọke ro fo rẹ aye ina nẹrhomo. Ọrẹn, Baibol na ọ ta rẹn ọwan kpahen ekete ọrhẹ ọke kirighwo ra na nẹrhomo?

Baibol na o djephia taghene o vwo erhirhiẹ ezẹko ro fo na nẹrhomo. Jerẹ udje, bọmọke i Jesu o ki lele idibo yi riẹ emaren, nọ nẹrhomo kpẹmẹ Osolobrugwẹ. (Luke 22:17) Ọke idibo e ji koko ọrẹ ogame, aye ni nẹrhomo kugbe. Omarana, aye ne vwobọrhọ irueruo ọnana rẹ itu i Jew e ruẹ uvuẹn synagogue ọke jijiri rhe, ọrhẹ uvuẹn oghwa ẹga rọ ha uvuẹn Jerusalem. Osolobrugwẹ ọ guọlọre nẹ oghwa ẹga na o rhiẹ “oghwa ẹrhomo harẹn egbamwa na ephian.”—Mark 11:17.

Idibo Osolobrugwẹ i rhe koko ji nẹrhomo kugbe, Osolobrugwẹ ọ kpahanrhọ ẹrhomo ọrana. Aye i rhe vwo ẹhẹn owu jeghwai nẹrhomo lele iruemru-urhi Baibol na, oma ọmerhen Osolobrugwẹ. Ẹrhomo na ọnọ sabu mwu Osolobrugwẹ ruẹ oborẹ ọ vwọ guọlọ ru rẹn aye bi. (Hebrews 13:18, 19) Iseri Jehova a nẹrhomo ọke ephian uvuẹn uyono ukoko aye. Ame i ha use wẹn ne wu riẹ Aghwẹlẹ Uvie rọ kẹreruọ, ne wu sabu rhon ẹrhomo enana rẹn omobọ.

Ọrẹn, Baibol na ọ ta taghene o vwo ekete yanghene ọke kirighwo ra na nẹrhomo-o. Uvuẹn Baibol na ọwan i mẹrẹn iyẹnrẹn ro sekpahen idibo Osolobrugwẹ ri nẹrhomo uvuẹn ọke ọrhẹ ekete sansan. Jesu nọ tare: “Are arha nẹrhomo, are i ruẹ uvuẹn ibuvun are, jeghwai bie ighwe na gbe, nẹ are i nẹrhomo rẹn Ọsẹ are rọ ha uvuẹn odjahen. Omarana, Ọsẹ are rọ mẹrẹn are ọrẹ odjahen, nẹ ọnọ kwosa harẹn are.”—Matthew 6:6.

Ọnana rhẹ obọdẹn use? Wu na sabu nẹrhomo vwe Osuinsuensun rọ ma akpọ ephian uvuẹn ọke ro jeruo, ọrhẹ uvuẹn odjahen, rhẹ imwẹro taghene ọnọ kpahenrhọ wẹn. A vwa rha ta, ọye ọsoriẹ i Jesu o riẹ ekete ọfọfọ nọ sabu nẹrhomo! Ọke owu, Jesu ọ ha ọsoso ason na nẹrhomo vwe Osolobrugwẹ, ọnọ sabu rhirhiẹ taghene ọ guọlọ ọkpọvi mie Osolobrugwẹ nọ sabu brorhiẹn rọ mai ghanren.—Luke 6:12, 13.

A nẹ iyẹnrẹn kpahen ehworhare ọrhẹ emẹse erọrọ uvuẹn i Baibol na, ri nẹrhomo ọke aye a guọlọ brorhiẹn eghwaghwa yanghene uvuẹn ọke ebẹnbẹn egbogbanhon. Ọkezẹko aye a nẹrhomo phia, yanghene uvuẹn ẹhẹn aye; aye a nẹrhomo ọrẹ otu ọrhẹ ọke aye ọvo a havwiẹ. Oborẹ ọ mai ghanren yẹ takpu aye i nẹrhomo. Osolobrugwẹ ọ ji ha use rẹn idibo yi nẹ aye: “Nẹrhomo ọke ephian.” (1 Thessalonians 5:17) O vwo omwemẹ rọ nọ kerhọ ẹrhomo ihworho re ruẹ ọhọre ọnẹyen bẹmẹdẹ. Ọrana rhẹ omamọ use?

Itiọrurhomẹmro, uvuẹn akpọ ọnana ro tueghe ne na, ihworho buebun e roro kpahen ọghanronmẹ ẹrhomo. Wu na sabu nọ, ‘Ẹrhomo ọnọ ghini sabu ha userhumu mẹ?’