Ọrọmo yọ ma Osolobrugwẹ?

Gba ha ẹhẹn roro ọsẹ ro lele ọmọyen ọhworhare rọ ha ẹgbukpe irhiruẹ tẹmro. Ọsẹ na nọ tare: “Ẹgbukpe buebun ri vrẹnren, Osolobrugwẹ nọ ma otọrakpọ na ọrhẹ ekwakwa ri ha uvuien, nọ ma ọrẹn na, ibiamo na ọrhẹ ikereti na. Ọmọ na no roro kpahen oborẹ ọsẹ ye ọ tare na, nọ nọ ọsẹ ye, “Papa, ọrọmo yọ ma Osolobrugwẹ?”

Ọsẹ na nọ ta riẹn, “O vwo ọrọ ma Osolobrugwẹ-ẹ. Ọye o vwo hwuẹ-ẹ.” Ẹkpahenrhọ ọlolọhọ ọrana ọ vuọn ọmọ na evwan ọke ọrana. Ọrẹn ọke rọ dua sa, onọ na no kpokpie ẹhẹn. Nọ bẹn ro no vwẹruọ ye sẹ ohworho ọ ghini havwiẹ ra vwa ma. Ọrẹn, otọrakpọ ọrhẹ odjuwu na i vwo ọtonrhọ. No roro, ‘Bọgo Osolobrugwẹ o nurhe?’

Marhẹ i Baibol na ọ kpahenrhọ ye lele? Baibol na ọ kpahenrhọ ye jerẹ oborẹ ọsẹ uvuẹn udje na ọ kpahenrhọ ye lele. Moses nọ yare: “O Jehova, . . . bọmọke igbenu na i ki homaphia, yanghene bọmọke wu ki ma akpọ na ọrhẹ otọre na, nẹ i bẹmẹdẹ ya ruẹ i bẹmẹdẹ, wẹwẹ yẹ Osolobrugwẹ.” (Psalm 90:1, 2) Habaye, ọmẹraro Isaiah nọ tare: “We rhe? We ji rhon? Jehova, Ọmemama otọrakpọ na, Osolobrugwẹ i bẹmẹdẹ”! (Isaiah 40:28) Uvuẹn ileta ri Jude ọ yare, nọ ji ta taghene Osolobrugwẹ o nyerẹn “nẹ i bẹmẹdẹ ya ruẹ i bẹmẹdẹ.”—Jude 25.

Ekete i Baibol erana i dje rẹn ọwan taghene Osolobrugwẹ “Orodje i bẹmẹdẹ,” jerẹ oborẹ ọnyikọ Paul o dje Osolobrugwẹ rhọ. (1 Timothy 1:17) Ọnana no mevirhọ taghene Osolobrugwẹ o vwo hwuẹ-ẹ, o vwo oborẹ wu roririe te-e. Ono nyerẹn bẹmẹdẹ ya ruẹ obaro na. (Revelation 1:8) Omarana, ra mẹriẹn taghene Osolobrugwẹ o nyerẹn bẹmẹdẹ na, nọ ghwai fo ẹrhẹ Ọrọmaigbanhon na.

Mesoriẹ ọ bẹn re ne vwẹruọ ọnana? Fọkime oborẹ arhọ ọwan ọ kpẹtẹ te, ọ vwọ lẹrhẹ ọwan sabu kele ọke jerẹ oborẹ i Jehova o kele ọke-e. Ra mẹriẹn taghene Osolobrugwẹ o nyerẹn bẹmẹdẹ na, hariẹn ẹgbukpe uriusionrin ọ họhọ ẹdẹ owu ọvo. (2 Peter 3:8) Jene dje udje yi: Abaka ro nyerẹn te ẹdẹ 50 ọvo ọnọ sabu vwẹruọ oborẹ ọ havwọ ne nyerẹn te ẹgbukpe 70 yanghene 80? Ẹjo! Ọrẹn, Baibol na o djerie taghene ọwan i họhọ ebaka arha ha ọwan vwanvwọn Ọmemama Rode na. Ọwan i sabu vwẹruọ Osolobrugwẹ hiẹ-ẹn. (Isaiah 40:22; 55:8, 9) Omarana, o vwo rho gbe ọwan unu taghene o vwo ekwakwa ezẹko rẹ ituakpọ ina ja sabu vwẹruọ ye kpahen Jehova-a.

Dedevwo a sabu vwẹruọ oborẹ Osolobrugwẹ o ru nyerẹn bẹmẹdẹ-ẹ, ọrẹn ana mẹrẹnvwrurhe taghene erere ọ havwiẹ. Orhianẹ o vwo ohworho rọ ma Osolobrugwẹ, nọyẹ ọravwọ yẹ Ọmemama. Ọrẹn jerẹ oborẹ i Baibol na ọ tare, Jehova yọ “ma ekwakwa ephian.” (Revelation 4:11) Habaye, ọwan i rheri taghene otọrakpọ na ọ havwiẹ bi-i. (Genesis 1:1, 2) Bọgo yo nurhe? Ono vwo Ọmemama rọ nọ ma ye vwẹre. Osolobrugwẹ ọ havwọ e nyerẹn vwẹre a ki ma ihworho erọrọ, jerẹ Ọmọyen owu ọvo ọrhẹ emakashe na. (Job 38:4, 7; Colossians 1:15) Omarana, ọ dabu fiotọre taghene Osolobrugwẹ ọvo ọ havwọ e nyerẹn vwẹre. O vwo ọrọ mariẹ-ẹn; nime o vwo emru ọrọrọ ro nyerẹn rọ nọ sabu ma ye-en.

Ọwan re nyerẹn inyenana kugbe otọrakpọ ọrhẹ idjuwu na o djephia taghene o vwo Osolobrugwẹ ro nyerẹn bẹmẹdẹ. Ohworho ro nyerẹn bẹmẹdẹ ọvo, yọ nọ sabu ma idjuwu ọrhẹ otọrakpọ ọduado ọnana, kugbe irhi re suẹn aye. Ọye ọvo yọ nọ sabu mwu ẹhẹn arhọ ghwu ekwakwa ephian.—Job 33:4.