Mi yonorin taghene Jehova o dje arodọmẹ phia jeghwai harhomẹ

AKPENYERẸN MẸ BI:

Mi ghwanranren uvuẹn amwa owu re se Montreal, rọ rhiẹ ekete rọ vwọ ghwai rhie. Ọke mia ha ubiamo erhan ọsẹ me no hwuru, izu mẹ ọvo nọ yọ hẹrote ọsoso ewian ri ha uvuẹn oghwa na. Ame awan ẹrẹnren, mẹmẹ yẹ ubrevwiẹ.

Ọke mai ghwanran, oborẹ mie nyerakpọ lele no mo wene, ni mai rhẹ imwu egbogbanhon, fibikoro, ruiruẹn ozighi, jeghwai homaba ihworho re suhi. Ọke mie te ẹgbukpe ikpe, ni mia nya urhomu rẹn ihworho re gbọfanrhiẹn ọrhẹ ere momo awan igho. Mia mọronfian omamọ, jeghwai ghwa ihworho ria izede sansan. Ni mi họhọ ohworho rọ ha imwu egbogbanhon.

Ọke mie te ẹgbukpe 14, ni mi tẹn ona izede erọrọ ra ghwa ihworho ria. Jerẹ udje, mia dẹ ughwọdjọ ro bunrun omamọ rọ họhọ ọra ha oro ru, ekwakwa owọre, ọrhẹ isan, ni mia ta taghene obọdẹn oro ya ha ruẹ aye, jeghwai rhẹ aye uvuẹn idumu, ekete imoto e gbo rhọ, ọrhẹ uvuẹn ekete ihworho a rhẹ ekwakwa. Mia mẹrẹn igho nẹ uvuien sa omamọ. Ọke owu, mi tobọ rhẹ igho ro bun te $10,000 ẹdukwẹdẹ!

Ọke mia ha ẹgbukpe 15 ne leri mẹ nẹ isukuru, mie rhe vwo ekete mie rhirhiẹ-ẹ. Ni mia merhẹn idumu, ekete imoto e gbo rhọ, yanghene lele igbehian mẹ rhirhiẹ.

Fọkiẹ orharhere irueruo mie ruẹ, elọkpa na nọ mẹ enọ ọgbọ buebun. Ra mẹriẹn taghene mi vwa rhẹ ekwakwa re sori-i, ọ vwọ rhọ lẹrhẹ aye fi mẹ rhẹ ekanro-on. Ọrẹn ni mia kwa ifaini eghoghanren, nime mia rhe ekwakwa re vwe vwo ekwerhọ kpahen. Mi ji tobọ momo igho mie ihworho re momo awan igho. Imwofẹn ọ havwiẹ omamọ, omarana ọkezẹko ni mia kpare okpọghọ nya. Ọkezẹko mia tobọ homaba ihworho re suhi dede.

OBORẸ I BAIBOL NA O WENE AKPENYERẸN MẸ LELE:

Ọke mia ha ẹgbukpe 17 yi mie rhe taghene ọbe owu ọ havwiẹ re se i Baibol. Mẹmẹ rhẹ igẹfrẹndi mẹ ye rhirhiẹ kugbe, bọmọke o ki lele Iseri Jehova yono i Baibol na. Ọrẹn mie vwo ekwerhọ kpahen oborẹ i Baibol na ọ tare-e, ni mi nyaji igẹfrẹndi mẹ vwọ ya kpare ọmase ọrọrọ.

Ọrẹn, akpenyerẹn mẹ no wenerin ọke igẹfrẹndi mẹ ọreva, ọ tuẹn uyono Baibol rhọ rhẹ Iseri Jehova! Akpenyerẹn yen no mo wene omamọ, oma nọ merhen mẹ taghene ọ ha oborẹ o yono ruiruo. Na ha use me ni me rhiẹ Aghwẹlẹ Uvie ọrẹ Iseri Jehova. Ihworho ri dediri mẹ emamọ ihworho, re dje uruemru esiri phia. Mia ji mẹrẹn aruẹ uruemru orhorhomu ọnana dẹ-ẹ! Ekrun mẹ e ji dedi mẹ omana dẹ-ẹ; e ji dje aruẹdọn ọrhẹ uruemru dẹndẹn mẹ dẹ avwọke mia kamu-u. Omamọ uruemru mi mẹrẹnren uvwre Iseri Jehova yẹ oborẹ mi vi guọlọ. Ni mi kweri ọke Iseri Jehova a ta mẹ taghene aye ine lele me yoni Baibol na.

Oborẹ mi yono mẹrẹn uvuẹn i Baibol na yo simi arhọ mẹ. Mia djiroro mi ne ye lele ihworho suhi bi, neneyo mi sabu kwosa mi rere, nime igho na o bun ghwẹ $50,000. Ọrẹn oma ọ merhenren mẹ taghene mia nya-a! Ihworho ri hẹrhẹre na ni nya ye suhi. Ne fiẹ owu rhẹ ekanron, ji kpe ọreva ye.

Ri mie yoni Baibol na, ni mi ma mẹrẹn taghene o vwo ewene buebun ro fori mi ru. Jerẹ udje, mi yono kpahen oborẹ Baibol na ọ tare uvuẹn 1 Corinthians 6:10: “Ihi, evwuvwele, idinyo, era tẹmro evwiavwia, kugbe ere ken emru awan ha, i ha Uvie Osolobrugwẹ riuku-u.” Ọke mie se oghwẹmro ọrana, ni mi viẹre fọkiẹ orharhere irueruo mi ru vrẹn ne. Ni mi ma mẹrẹnvwrurhe taghene o fori ni mi wene akpenyerẹn mẹ ogege. (Romans 12:2) Mi nyerẹn akpọ ro biomurun omamọ mia ji mọronfian.

Ọrẹn, mi ji yono ni Baibol na taghene Jehova o dje arodọmẹ phia jeghwai harhomẹ. (Isaiah 1:18) Ni mi nẹrhomo, jeghwai rẹ i Jehova nọ ha userhumu mẹ sabu nyajẹ aruẹ akpọ mie nyerẹn bi vwo. Nyoma userhumu i Jehova, bibiesuọn ni mie ruẹ ewene. Ni mi karorhọ taghene o fori ne mi ye ruẹ orọnmo igẹfrẹndi mẹ.

Mi ha ẹgbukpe 24, mi vwo ane kugbe emọ awansa. Vwana o fori mi guọlọ omamọ iruo. Dedevwo mi riẹ isukuru, ọrẹn mia ruotọre-e. Udabọ ọrana, mia ji nẹrhomo vwe i Jehova ọke ephian. Omarana ni mi nyarhẹn ya guọlọ owian. Ni mi ta rẹn ihworho ra ha owian rẹn awan, taghene mi guọlọ wene akpenyerẹn mẹ, jeghwai fiobọrhọ omamọ owian. Ọkezẹko mia ji tobọ ta rẹn aye taghene mie yono i Baibol na, ji lẹrhẹ aye rhe taghene mi guọlọ rhiẹ omamọ ohworho uvuẹn amwa na. Ihworho buebun ri vwo iruo i vwa guọlọ yẹ mẹ owia-an. Ọke oru, ni mi ta rẹn ohworho owu rọ ha owian rẹn awan kpahen akpenyerẹn mẹ bi, nọ tare: “Mia ghwai rhe-e, ọrẹn ẹhẹn mẹ ọ ta mẹ ni mi ha iruo na wẹn.” O mwurun mẹ ẹro taghene ọnana ẹkpahenrhọ rẹn ẹrhomo mẹ. Ọke oru, mẹmẹ rhẹ ane mẹ ni bromarhame rhiẹ Iseri Jehova.

ERERE MI MẸRẸN NE:

Mie nyerẹn inyenana fọkime mi ha iruemru-urhi Baibol ruiruo, jeghwai nyerakpọ Olele Kristi. Mi vwo obọdẹn ekrun ne. Mi vwo imwẹro taghene Jehova ọ harhomi mẹ ne, ji vwo ẹhẹn obrorhiẹn rọ fonron.

Mi ha uvuẹn owian oghwoghwẹmro Uvie na vuọnvuọn uvwre ẹgbukpe 14 ri vrẹnren na, mia ji ha userhumu rẹn ihworho yono kpahen oborẹ ọ ha uvuẹn Baibol na, ro vwo jijiri na, ane mẹ ọ homaba mẹ uvuẹn owian oghwoghwẹmro Uvie na vuọnvuọn ne. Uvwre ẹgbukpe 30 ri vrẹnren na, oma ọmerhenren mẹ taghene mi sabu ha userhumu rẹn ihworho mẹmẹ rhe aye a gba wian ri te 22 nẹ aye i ga Jehova. Mie ji riẹ ekete ihworho a sueyi, ọrẹn orhiẹ ọrẹ mi ne ye suhi jerẹ oborẹ mie ruẹ bi-i. Ọrẹn vwana, mi rhe riẹ avwaye ni mie ghwoghwo ẹmro Uvie na rẹn aye. Mi guọlọ dje rẹn aye kpahen ifiẹrorhọ rọ ha obaro na: re ne nyerakpọ ọkpokpọ ro vwo vwo ofẹnzẹ.—Psalm 37:10, 11.