Iyẹnrẹn Esiri Na Oghini Nẹ Obẹ Osolobrugwẹ Rhe?

1. Ọrọmo yẹ Ovwo i Baibol na?

Baibol na o vwo iyẹnrẹn esiri, taghene ituakpọ ine nyerẹn uvuẹn akpọ na bẹmẹdẹ. (Psalm 37:29) Ẹbe ekokamu 66 ye re ha uvuẹn i Baibol na. Ihworho ri te awan 40 ri vwo esegburhomẹmro yẹ Osolobrugwẹ ọ ha ya i Baibol na. Moses yẹ ọrọ ya ẹbe isiorin erẹ ukukaro re ha uvuẹn i Baibol na, o te oma ẹgbukpe 3,500 ri nyavrẹn ne. Ọnyikọ John yẹ ọya ọbe ọrẹ ọkobẹta uvuẹn i Baibol na, ọvrẹn ẹgbukpe 1,900 ne. Ẹmro ọrọmo yẹ ihworho ri ya Baibol na i yare? Osolobrugwẹ yẹ ọha ẹhẹn ọfuanfon na tẹmro rẹn ihworho ri ya i Baibol na. (2 Samuel 23:2) Iroro Osolobugwẹ yẹ aye e ya rhẹ uvuien, orhiẹ ọrẹ aye-e. Omaran na, Jehova yẹ Ovwo i Baibol na.—Se 2 Timothy 3:16; 2 Peter 1:20, 21.

Ni Ividio na Ọrọmo Yo Vwo i Baibol na?

2. Marhẹ ono ru sabu mwu ọwan ẹro taghene i Baibol na ghini urhomẹmro?

Ọwan rheri taghene i Baibol na o nẹ obẹ Osolobrugwẹ rhe nime ọdabu dje harẹn ọwan kpahen oborẹ obaro na ono rhirhiẹ. O vwo onyakpọ ọnọ sabu ruie-e. (Joshua 23:14) Osolobrugwẹ Ọrọmaido na ọvo ọ yẹ ọnọ sabu mẹrẹn oborẹ obaro na ono rhirhiẹ dẹ-ẹn.—Se Isaiah 42:9; 46:10.

Ofori nẹ ẹbe ro nẹ obẹ Osolobrugwẹ rhe o rhiẹ obọdẹn, omaran ọ yẹ oghini havwọ. Iduduru i Baibol, yẹ a ghalẹ rhẹ edjadjẹ ri te uzusiorin buebun ne. Dedevwo i Baibol na ojiri otọre ne, egba irherhe ra guọlọ otọre emru ikwerhọ oborẹ i Baibol na ọtare. Habaye, awan 40 ri ya i Baibol na akparehaso owuowọnwa-an.a Riẹ obaro rhọ, Baibol na ọ ta kpahen ẹguọlọ, obẹ Osolobrugwẹ urhomẹmro na ọvo ọ yẹ ọnọ sabu nurhe, nime ọye ẹguọlọ, o ji vwo omẹgbanhon rẹ ọnọ sabu wene akpọ-enyerẹn ituakpọ rhiẹ urhorhomu, urhomẹmro ọnana ọ lẹrhe riẹ mwu oduduru ihworho ẹro taghene i Baibol na Ẹmro Osolobrugwẹ.—Se 1 Thessalonians 2:13.

Ni Ividio na Marhẹ Ono Ru Mwu Ọwan Ẹro Taghene i Baibol na Urhomẹmro?

3. Me yẹ i Baibol na ọ tẹmro kpahen?

Iyẹnrẹn esiri rọ ha uvuẹn i Baibol na, ọ tẹmro kpahen ọhọre Osolobrugwẹ ovwori harẹn ituakpọ. Eyaya Efuanfon na ọ ji tẹmro kpahen oborẹ ituakpọ i kpare uphẹn rẹ aye ene nyerẹn bẹmẹdẹ fughwẹ nẹ ọtonrhọ rhe, kugbe oborẹ ituakpọ ine ru sabu rharhumu mẹrẹn i paradais na.—Se Revelation 21:4, 5.

Ẹmro Osolobrugwẹ ovwo irhi, iruemru-urhi, kugbe urhebro. Habaye, Baibol na ọ nẹ iyẹnrẹn kpahen oborẹ Osolobrugwẹ ọ mọrọn ituakpọ lele—iyẹnrẹn enana odje uruemru Osolobrugwẹ phia. Omaran na, Baibol ọnọ sa erhumu vwrurhẹ Osolobrugwẹ. Ono dje wẹn oborẹ wu ne ru sabu rhiẹ ugbehian yen.—Se Psalm 19:7, 11; James 2:23; 4:8.

4. Marhẹ wu ne ru sabu vwo ẹruọ i Baibol na?

Broshọ ọnana ọnọ sa erhumu vwo ẹruọ i Baibol na. Ona ri Jesu ọ ha ruiruo yẹdẹ ran, yẹ i broshọ ọnana ọje hẹrokele. Ọye ọ riẹn obọ rhẹ ẹmro i Baibol owuowu, o vwo dje ‘otọre eyaya Efuanfon na fiotọre.’—Se Luke 24:27, 45.

Ibiẹ ekwakwa ezẹko ye ra merhen oma jerẹ iyẹnrẹn esiri ro nẹ obẹ Osolobrugwẹ rhe. Ọrẹn, ihworho ezẹko aguọlọ rho-on, obiomu ezẹko evwan. Jọrẹn, wu vwe jẹ ofu zo-o. Neneyo wu sabu nyerien bẹmẹdẹ, wu ne yono kpahen Osolobrugwẹ.—Se John 17:3.