Me Yẹ Ọhọre Osolobrugwẹ Kpahen Akpọ Na?

1. Mesoriẹ Osolobrugwẹ ọ ma akpọ na?

Jehova ọ ha akpọ na rẹn ituakpọ. Ọyẹ oghwa ọwan. Omaran na, ọ ma Adam rhẹ Eve neneyo aye vwiẹ rhẹ odjuwu-u, nime Osolobrugwẹ ọma emakashe na nẹ aye rhirhiẹ obẹ odjuwu. (Job 38:4, 7) Omaran na, Osolobrugwẹ nọ ha ọhworhare ukukaro na, no fi rie rhẹ i paradais o rhorhomu re se ogba Idẹn. (Genesis 2:15-17) Jehova ọ yẹ riẹ rhẹ emọ yẹn uphẹn aye ena riẹ-akpọ ri bẹmẹdẹ uvuẹn akpọ na.—Se Psalm 37:29; 115:16.

Ọke ukukaro ogba Idẹn ọvo ọyẹ i paradais. Adam rhẹ Eve ni ne vwiẹ vuọn akpọ na. Orho jiribẹn, aye ni ne kerabọ ye lele akpọ na ephian, aye ni ne ji ruie rhẹ i paradais. (Genesis 1:28) Avwa sa mọ ghwọghọ akpọ na-a. Ono rhiẹ oghwa harẹn ituakpọ bẹmẹdẹ.—Se Psalm 104:5.

Ni Ividio na Mesoriẹ Osolobrugwẹ ọ Ma Akpọ Na?

2. Mesoriẹ akpọ na ovwo ji rhiẹ i paradais ọke ọnana?

Adam rhẹ Eve a kerhọ Osolobrugwẹ-ẹ, omaran na, Jehova no le rẹ aye nẹ ogba na. Aye ni kpare i paradais fughwẹ, ovwo ohworho owuorowu ọ sabu ha ye rhe ne-e. Baibol nọ tare: ‘Akpọ na ọ ha obọ ọvwọkon na.’—Job 9:24.—Se Genesis 3:23, 24.

Jehova ọ kpare iroro vrẹn ọhọre ro vwori kpahen ituakpọ ne? Ẹjo! Ọye yẹ ọrọmaido. Ọvwọ mọrọn ofia-an. (Isaiah 45:18) Ọye ono ru akpọ na rhiẹ i paradais.—Se Psalm 37:11, 34.

3. Marhẹ akpọ na ono ru ghwẹriẹ rhiẹ i Paradais?

Akpọ na ọnọ ghwẹriẹ rhiẹ i paradias, ọke rẹ i Jesus ono sun jerẹ Orodje Osolobrugwẹ ọ ha mwu. Jesu ono sun emakashe Osolobrugwẹ ha ghwọghọ ihworho re kparehaso Osolobrugwẹ uvuẹn uvweri re se Armageddon. Ọke ọrana, Jesu nọ sa mọ fi Echu rhẹ uvuẹn ekanrọn ẹgbukpe 1,000. Ihworho Osolobrugwẹ ena vabọ oghwọghọ na nime, Jesu ono simi aye. Aye ni na riẹ omamerhomẹ akpọ na uvuẹn i Paradais bẹmẹdẹ.—Se Revelation 20:1-3; 21:3, 4.

4. Ọke ọgo yẹ oja-ẹriọ ono vwo oba?

Ọke ọgọ Osolobrugwẹ ọnọ ha ọkon te oba uvuẹn otọrakpọ na? Jesu odje ‘oka’ haren ọwan, ono dje phia taghene ẹdẹ oba na o ti kẹrẹ ne. Akpọ na ọ vuọnren rhẹ ekwakwa ra djofẹn mwu ituakpọ ẹdọke ọrẹ inyenana, ọrana odje phia taghene ọwan i ha ‘ẹdẹ eri koba na ne.’—Se Matthew 24:3, 7-14, 21, 22.

Uvuẹn ẹgbukpe 1,000 i Jesu ono sun nẹ odjuwu rhiẹ otọrakpọ na, ọnọ ha oja-ẹriọ te oba. (Isaiah 9:6, 7; 11:9) Jerẹ Orodje, Jesu ọnọ je ga jerẹ Ọrherẹn Ọduado ro no tie edandan ihworho ri vwo ẹguọlọ kpahen Osolobrugwẹ nie. Omaran na, nyoma i Jesu rhe Osolobrugwẹ ono tie emiamo, ọho, kugbe uhwu nie.—Se Isaiah 25:8; 33:24.

5. Ayọmo yẹ ine rhirhiẹ i Paradais?

Ihworho re kerhọ Osolobrugwẹ ye re ine nyerẹn uvuẹn i Paradais. (1 John 2:17) Jesu odje idibo yi nẹ aye guọlọ ihworho dẹndẹn, nẹ aye ji yono aye kpahen oborẹ ene ru sabu ru ọhọre Osolobrugwẹ. Ẹdọke ọrẹ inyenana, Jehova o mwegbe iduduru ihworho ri ne rhirhiẹ akpọ uvuẹn i Paradais rọsa na. (Zephaniah 2:3) Uvuẹn Kingdom Hall ọrẹ Iseri Jehova, ihworho e yono oborẹ aye ine ru rhiẹ omamọ esa, omamọ ọsẹ, omamọ ane, rhẹ omamọ izu. Emọ kugbe ese rhẹ izu aye, aga kugbe, rẹ aye e ji yono oborẹ aye ine ru sabu mẹrẹn erere nẹ iyẹnrẹn esiri na rhe.—Se Micah 4:1-4.