UYONO 8
Mesoriẹ Osolobrugwẹ Ọ Ha Uphẹn Rẹn Ọdandan Rhẹ Oja-ẹriọ?
1. Marhẹ yẹ ọdandan o ru tonrhọ?
Osolobrugwẹ ọ ha uphẹn rẹn ituakpọ nẹ aye i sun oma aye ọke jijiri ne na, no dje phia taghene usun ituakpọ ọ sabu ha erhumu phia-a
Ọdandan ọtonrhọ uvuẹn otọrakpọ ọke rẹ Echu ọ mọrọn ofian ọrẹ ukukaro. Vẹrhẹbri, Echu ọmakashe rọ gbare, ọrẹn ‘omevi gbanhon uvuẹn urhomẹmro na-a.’ (John 8:44) Ọ guọlọ ẹga ro fo harẹn Osolobrugwẹ ọvo. Echu ọ mọrọn ofian harẹn ọmase ọrẹ ukukaro re se Eve, nọ riẹrieriẹ kerhọ uvwele yi nyajẹ ọrẹ Osolobrugwẹ vwo. Adam no kwomakugbe Eve tiẹn uvwele Osolobrugwẹ. Odjẹ Adam ọdjẹre ọ yẹ ọso uhwu rhẹ oja-ẹriọ.—Se Genesis 3:1-6, 19.
Echu ọkparehaso usun Osolobrugwẹ yanghene erhirhiẹ ọ havwọ jerẹ Ọrẹ Ọmaido, ọke rọ ta harẹn Eve taghene ọ vwọ kerhọ Osolobrugwẹ-ẹ. Ihworho buebun i homa ba Echu kparehaso usun Osolobrugwẹ. Omaran na, Echu ‘nọ ye o sun akpọ na.’—Se John 14:30; 1 John 5:19.
2. Emru ọsọre uvuẹn emama Osolobrugwẹ?
Ewian Osolobrugwẹ ephian e gbare. Ituakpọ rhẹ emakashe, Osolobrugwẹ ọ ma rẹ aye nẹ aye sabu kerhọ ye gbagba. (Deuteronomy 32:4, 5) Osolobrugwẹ ọ ma rẹ ọwan rhẹ ugbomọphẹ ana djẹ oborẹ o rhomurun yanghene oborẹ o biomurun. Ugbomọphẹ ọrana ọ ha uphẹn rẹn ọwan ene dje ẹguọlọ phia harẹn Osolobrugwẹ.—Se James 1:13-15; 1 John 5:3.
3. Mesoriẹ Osolobrugwẹ ọ ha uphẹn rẹn oja-ẹriọ tẹ ọke ọnana?
Jehova ọ ha uphẹn rẹn ẹkparehaso usun ọnẹyen ibiọke krẹn. Mesoriẹ? No dje phia taghene usun ituakpọ ọ sabu ha erere rẹn ihworho-o. (Ecclesiastes 7:29; 8:9) Rẹ ituakpọ a ha e suon oma aye ọke rọ vrẹn ẹgbukpe 6,000 ne na, a mẹrẹn otọriẹ ne. Usuon ituakpọ a sabu ti ivweri, ozighi, osehiẹn, kugbe emiamo nie-e.—Se Jeremiah 10:23; Romans 9:17.
Usun Osolobrugwẹ ọ vẹnẹ usun ituakpọ, nime ọ ha erhumu rẹn ihworho ri homa riotọre riẹn. (Isaiah 48:17, 18) Phẹrẹkpẹ, Jehova ọ sa mọ ha usuon ituakpọ te oba. Ihworho ri djẹ Osolobrugwẹ rhẹ ọrẹ ono sun aye ọvo, ye re ne rhirhiẹ akpọ na bẹmẹdẹ.—Isaiah 11:9. Se Daniel 2:44.
Ni Ividio na Mesoriẹ Osolobrugwẹ ọ ha Uphẹn rẹn Ojẹriọ?
4. Uphẹn re ne ru ime yẹ edirin Osolobrugwẹ ọ yẹ rẹ ọwan?
Echu ọ tare taghene orhiẹ ẹguọlọ yẹ omwu ọwan ga i Jehova-a. Wu na sabu dje ẹmro ọrana rhiẹ ofian? Ee, wu na sabu ruie! Edirin Osolobrugwẹ ọ yẹ rẹ ọwan uphẹn rẹ ana ha djẹ usun ọrẹ Osolobrugwẹ yanghenẹ ọrẹ ituakpo. Oborẹ ọwan enyerẹn akpọ lele yẹ ono dje yi phia.—Se Job 1:8-12; Proverbs 27:11.
5. Marhẹ ọwan ine ru djẹ Osolobrugwẹ ha taghene ọye yẹ o sun Ọwan?
Odjẹ ọwan yẹ ono djeyi phia sẹ ọwan i guọlọ Osolobrugwẹ nẹ orhiẹ ọrẹ ono sun Ọwan
Ọwan ena sabu djẹ Osolobrugwẹ ha taghene ọye yẹ o sun ọwan, nyoma ọwan ine yono kpahen ẹga ọre urhomẹmro na ro nẹ uvuẹn Ẹmro Osolobrugwẹ, Baibol na rhe, ne ji ru lele oborẹ ọwan i yonorin. (John 4:23) Ọwan ena sabu tiẹn usun Echu,ọwan irhe ti oma nẹ usun oseghe kugbe uvweri, jerẹ oborẹ i Jesu oruru.—Se John 17:14.
Echu ọ ha omẹgbanhon ọnẹyen riẹriẹ ihworho ru iruemru ọfanrhiẹn rhẹ iruemru esọsọ erọrọ. Ọwan i rha tiẹn erana, igbehian rhẹ imizu ọwan ezẹko ena sabu ha ọwan djechẹẹ yanghene kparehaso ọwan. (1 Peter 4:3, 4) Omaran na, ọwan ni na djẹ. Ọwan ine kwomakugbe ihworho ri vwo ẹguọlọ kpahen Osolobrugwẹ? Ọwan ine ru lele irhi Osolobrugwẹ ri vuọnren rhẹ ẹghwanrẹn kugbẹ ẹguọlọ? Ọwan irhe ru erana, odje phia taghene Echu ọ mọrọn ofian ọke rọ taghene ovwo ohworho ono ru oborẹ Osolobrugwẹ ọ tare udabọ ebẹnbẹ-ẹn.—Se 1 Corinthians 6:9, 10; 15:33.
Ẹguọlọ Osolobrugwẹ o vwo harẹn ọwan ọ yẹ rẹ ọwan imwuẹro taghene oja-ẹriọ kugbe ọdandan ono vwo oba. Ihworho ri vwo imwuẹro kpahen ẹmro ọnana, ena riẹ omamerhomẹ uvuẹn otọrakpọ na bẹmẹdẹ.—Se John 3:16.