Me yẹ Uvie Osolobrugwẹ?

OBORẸ I BAIBOL NA Ọ TARE

“Osolobrugwẹ rọ ha obẹ odjuwu, ọnọ ha uvie owu mwu ra na ja sabu ghwọghọ.”—Daniel 2:44, New World Translation.

“A ha ọmọ ọhworhare rẹn ọwan ne; usuon na ono rhirhiẹ akoko yi.” —Isaiah 9:6; ekete ra djokarhọ.

OBORẸ ỌRANA ỌNỌ SABU MEVIRHỌ WẸN

• Usuon ọsoso ọnọ sabu rhiẹ emru erere ha wẹn.—Isaiah 48:17, 18.

• Uvuẹn akpọ ọkpokpọ rọ sa na, ene vwo obọdẹn omọkpokpọ kugbe omamerhomẹ.—Revelation 21:3, 4.

ỌWAN INE GHINI SABU KWERHỌ OBORẸ I BAIBOL NA Ọ TARE?

Ee, orho riotọre, fọkiẹ iroro eva:

• Jesu o dje oborẹ Uvie Osolobrugwẹ ono ru phia. Jesu o yono idibo yi nẹ aye i nẹrhomo neneyo Uvie Osolobrugwẹ ọ rhe, ne ji ru ọhọre Osolobrugwẹ uvuẹn akpọ na. (Matthew 6:9, 10) Jesu o dje udje oborẹ ana kpahenrhọ ẹrhomo ọrana lele.

  Ọke rọ ha otọrakpọ na, Jesu ọ ghẹrẹ erẹ erhọmo ekpe, o simi ere ekpomẹ, nọ ji rhọmọ ihworho ri hwuru! (Matthew 15:29-38; John 11:38-44) Ro rhiẹ Osun ọrẹ Uvie Osolobrugwẹ rọ sa na, Jesu ọ dabu dje ifoto oborẹ Uvie na ono ru harẹn ihworho ro no suon.—Revelation 11:15.

• Oborẹ ọ phia uvuẹn akpọ na, o djephia taghene Uvie Osolobrugwẹ ọ sa phẹrẹkpẹ. Jesu ọ tariẹ vẹrhẹ taghene Uvie na ọnọ ki ha ufuoma rhiẹ akpọ na, akpọ na ọnọ vuọn rhẹ ikpokpogho jerẹ ivweri, erhọmo ọrhẹ etọre ekpogho.—Matthew 24:3, 7.

  Ame a mẹrẹn erhirhiẹ enana inyenana. Omarana, ame ni ne vwo imwẹro taghene phẹrẹkpẹ Uvie Osolobrugwẹ ọnọ ha ikpokpogho enana toba.