Marhẹ Wu Ne Ru Sabu Rhiẹ Ugbehian Osolobrugwẹ?

1, 2. Ayọmo yi rhiẹ igbehian i Jehova?

ỌRỌMO wu guọlọ ha mwu ugbehian? Ohworho wu vwo ẹguọlọ kpahen. Ohworho wa sabu vwẹruọ ye, rọ nọ ji sabu vwẹruọ owẹwẹ. Ohworho ro vwo omamọ iruemru re jo.

² Jehova Osolobrugwẹ ọ sanọ ituakpọ ezẹko na aye rhiẹ igbehian yen. Jerẹ udje, Abraham owuọwan usuẹn igbehian i Jehova. (Isaiah 41:8; James 2:23) Jehova o ji vwo ẹguọlọ kpahen i David. Ọ tare taghene David ‘ohworho ẹhẹn yen ọrhẹ ọnẹyen i gbe serhọ.’ (Acts 13:22) Ọmẹraro Daniel ọ “ghanranren ọmamọ” rẹn i Jehova.—Daniel 9:⁠23.

3. Mesoriẹ Abraham, David ọrhẹ Daniel e rhiẹ igbehian i Jehova?

³ Marhẹ Abraham, David ọrhẹ Daniel i ru rhiẹ igbehian i Jehova? Jehova ọrhọ ta rẹn Abraham: “Wu huvwele mẹ.” (Genesis 22:18) Jehova ọ ha ihworho ra homariotọre huvwele yi mwu igbehian. Ọsoso ihworho ri ha uvuẹn agbamwa ena sabu rhiẹ igbehian yen. Jehova ọrhọ dabu dje yi fiotọre rẹn agbamwa Israel: “Are i huvwele mẹ, ni mi ne rhiẹ Osolobrugwẹ are, are ni ne rhiẹ ihworho mẹ.” (Jeremiah 7:23) Wu na vi huvwele i Jehova orhianẹ wu guọlọ rhiẹ ugbehian yen.

JEHOVA Ọ SẸRORẸ IGBEHIAN YEN

4, 5. Marhẹ i Jehova ọ sẹrorẹ igbehian yen lele?

⁴ Baibol na ọ tare taghene i Jehova ọ guọlọ izede ro “no dje omẹgbanhon ọnẹyen harẹn ihworho ra ga ye rhẹ ọsoso ọmudu aye.” (2 Chronicles 16:⁠9) Uvuẹn Psalm 32:​8, Jehova o ve harẹn igbehian yen: “Mi na yọ ọmẹrẹnvwrurhe ọrhẹ ọkpọvi lele izede wu na nya. Mi na yọ urhebro rhẹ ukẹro mẹ.”

⁵ Ọvwreghrẹn owu ro vwo omẹgbanhon, ọ guọlọ nẹ ọwan i rhiẹ ugbehian Osolobrugwẹ-ẹ. Ọrẹn, Jehova ọnọ sẹrorẹ ọwan. (Se Psalm 55:22.) Ọwan e rhiẹ ugbehian i Jehova na, na ga ye rhẹ ọsoso ọmudu ọwan. Arha ha erhirhiẹ ọgbogbanhon dede, ọwan e vwo atamwu kpahiẹn. Ọwan i ji vwo aruo imwẹro rẹ ọbo ijoro na o vwori. Ọrhọ ya kpahen i Jehova: “Fọkime ọ ha obọrhe mẹ, mi rhe kpogho-o.” (Psalm 16:8; 63:⁠8) Marhẹ yi Dẹbolo o ru damoma no fi ohra rhẹ onyerẹnkugbe ọwan rhẹ Osolobrugwẹ?

OBORẸ ECHU Ọ TARE

6. Me yẹ Echu ọ ta kpahen ituakpọ?

⁶ Uvuẹn urhomu-ẹmro 11, ọwan i yonorin taghene Echu ọ kparehaso i Jehova, nyoma ọ ta taghene i Jehova ọmọrenfian jeghwai orharhere ohworho, nime ọ ha uphẹn rẹn Adam ọrhẹ Eve nẹ aye i brorhiẹn omobọ aye-e. Ọbe i Job o yonorin ọwan taghene Echu ọ je tẹmro haso ihworho ri guọlọ rhiẹ igbehian Osolobrugwẹ. Echu ọ tare taghene ituakpọ a ga Osolobrugwẹ fọkiẹ oborẹ Osolobrugwẹ ọ yẹ aye, rhẹ fọkiẹ ẹguọlọ aye i vwo kpahiẹ-ẹn. Echu nọ tobọ ta taghene ọye ọnọ sabu lẹrhẹ kohworho kohworho kparehaso Osolobrugwẹ. Jenẹ a mẹrẹn oborẹ ọwan ina sabu yono mie Job ọrhẹ oborẹ i Jehova ọ sẹrorẹ i Job lele.

7, 8. (a) Marhẹ oma o ru i Jehova kpahen i Job? (b) Me yẹ Echu ọ ta kpahen i Job?

⁷ Ọrọmo yi Job? Ọye omamọ ohworho ro nyerẹnren uvwre ẹgbukpe 3,600 ri vrẹnren na. Jehova ọrhọ ta taghene o vwo ohworho rọ họhiriẹ uvuẹn otọrakpọ na-a. Job ọ họghọ okokodo rẹn Osolobrugwẹ, ọ jeghwai vwo utuoma kpahen oborẹ obiomurun. (Job 1:⁠8) Itiọrurhomẹmro, Job ugbehian i Jehova.

⁸ Echu ọ tare taghene i Job ọ ga i Jehova fọkiẹ oborẹ ọ mẹrẹn mie yi. Echu nọ ta rẹn i Jehova: “Wẹwẹ a gbogba ẹruete hariẹ ye, oghwa ye ọrhẹ kemru kemru ro vwori? Wu fi ebrurhọ rhẹ owian abọ ye, usurhe yi i bunrun omamọ uvuẹn otọre na. Ọrẹn, ọrẹ owẹnẹme, gba rionbọ ọnọ ne wu ghwọghọ kemru kemru ọye o vwori, itiọrurhomẹmro ono phien owẹwẹ.”—Job 1:​10, 11.

9. Me yi Jehova ọ ha uphẹn rẹn Echu no ru?

⁹ Echu ọ tare taghene i Job ọ ga i Jehova fọkiẹ ebrurhọ rọ mẹrẹn mie yi. Echu ọ ji ta taghene ọnọ sabu lẹrhẹ i Job dobọ ẹga rọ harẹn i Jehova ji. Jehova o kwerhọ oborẹ Echu ọ tare na-a, omarana, Jehova nọ ha uphẹn rẹn Echu nọ damu i Job ni, sẹ ọye ghini ugbehian ro vwo ẹguọlọ kpahiẹn.

ECHU Ọ KPAREHASO I JOB

10. Marhẹ Echu ọ damu i Job ni lele, ni marhẹ i Job ọ kpahenrhọ ye?

¹⁰ Ọrukaro, Echu nọ ghwọghọ ọsoso eranmo ri Job o vwori. Ọke oru, Echu nọ joma kpe ọsoso idibo i Job. Kemru kemru ri Job o vwori ni ghwọghọre. Ọrọkẹta, Echu no kpe emọ i Job awan ikpe nyoma ogiribo. Ọrẹn, Job ọ ji sẹrorẹ atamwu ro vwo kpahen i Jehova. “Udabọ enana ephian, Job o ru ọdandan yanghene phien Osolobrugwẹ-ẹ.”—Job 1:​12-19, 22.

11. (a) Me yẹ Echu ọ rharhumu ru i Job? (b) Marhẹ i Job ọ kpahenrhọ ye?

¹¹ Echu o fiobọrhotọre-e. Nọ ji kparehaso Osolobrugwẹ nyoma ọ ta: “Gba rionbọ ọnọ ne wu ghwọghọ usuaso ọrhẹ uhwen yi, itiọrurhomẹmro, ono vi phien owẹwẹ.” Omarana, Echu nọ ha emiamo ọgbogbanhon mwu i Job. (Job 2:​5, 7) Ọgbọrọrọ, Job ọ sẹrorẹ atamwu ro vwo kpahen i Jehova. Job nọ tare: “Bọmọke mi ne hwu, mi na sẹrorẹ emevigbanhon mẹ!”—Job 27:⁠5.

12. Marhẹ yi Job o ru djephia taghene Echu ọmọrenfian?

¹² Job o rhe emru owuorowu kpahen ẹkparehaso ọrẹ Echu yanghene oborẹ ọsoriẹ ọ rioja-a. Ọye o rorori taghene i Jehova yọ suẹ ebẹnbẹn enẹyen. (Job 6:4; 16:​11-14) Udabọ ọrana, Job ọ ji sẹrorẹ atamwu ro vwori kpahen i Jehova. O vwo ẹfro kpahiẹ-ẹn. Orhiẹ fọkiẹ ekwakwa ri Jehova ọ yẹ i Job yọ lẹrhiẹ ga ye-e. Ọye vi ugbehian Osolobrugwẹ, nime o vwo ẹguọlọ kpahiẹn. Ọsoso ẹmro Echu ọ tare efian!

13. Me yo nẹ erhumu atamwu i Job rhe?

¹³ Dedevwo, Job o rhe oborẹ ọ phiare obẹ odjuwu-u, ọrẹn, ọ sẹrorẹ atamwu kpahen Osolobrugwẹ, no ji djephia taghene Echu ọvwọkon. Jehova ọ ha ebrurhọ buebun rẹn Job fọkiẹ atamwu ọnẹyen na.—Job 42:​12-17.

OBORẸ ECHU Ọ TA KPAHUỌN

14, 15. Me yẹ Echu ọ ta kpahen ituakpọ ephian?

¹⁴ Wu na sabu yono iyono eghoghanren nẹ oborẹ ọ phia rẹn Job. Inyenana, Echu ọ tare taghene ọwan a ga i Jehova fọkiẹ oborẹ ọ yẹ ọwan. Uvuẹn ọbe i Job 2:​4, Echu nọ tare: “Onyakpọ ono tiobọnu kemru kemru ro vwori fọkiẹ arhọ ye.” Nọyẹ, Echu ọ ta taghene ituakpọ ephian a ga i Jehova fọkiẹ oborẹ aye a mẹrẹn mie yi. Dedevwo, Job o hwuru ẹgbukpe buebun ne, Echu ọ ji ta ogbeta kpahen Jehova ọrhẹ idibo yi. Jerẹ udje, Proverbs 27:11 ọrhọ ta: “Ghwanren, ọmọ mẹ, ne wu ru ọmudu mẹ ghọghọ, ne mi sabu kpahenrhọ harẹn ọrẹ ọ ha mẹ djechẹẹ na.”

¹⁵ Wu na sabu djẹ odjẹ wu na họghọ rẹn i Jehova jeghwai rhiẹ ugbehian yen, ne wu djephia taghene Echu ọmọrenfian. Ọrhọ tobọ rhianẹ wu ne ru ewene eduado uvuẹn akpenyerẹn ọnọ ne wu sabu rhiẹ ugbehian Osolobrugwẹ, ọrana yẹ orhienbro rọ mai rhomu kparobọ wu na sabu bru! Orhienbro ọnana ọ ghanranren omamọ. Echu ọ tare taghene wu sabu vwo atamwu kpahen Osolobrugwẹ wu rhe vwo ebẹnbẹ-ẹn. Ọ damoma rọ nọ lẹrhẹ ọwan je vwo atamwu kpahen Osolobrugwẹ. Marhẹ o ruie lele?

16. (a) Ena ego yẹ Echu ọ ha ruiruo ruiruo nọ sabu dobọ ẹga ra harẹn i Jehova ji? (b) Marhẹ yi Dẹbolo ọ damoma rọ nọ dobọ owẹwẹ ji ne wu ja rha ga i Jehova?

¹⁶ Echu ọ ha ena sansan ruiruo nẹ ọwan i je rhiẹ igbehian Osolobrugwẹ. Echu ọ havwọ “jerẹ okporokpo rọ tuekwẹre, rọ guọlọ ohworho rọ nọ sha re.” (1 Peter 5:⁠8) Wu vwe jenẹ ogbonu-u, orhianẹ igbehian enọ, ihworho ekrun ọnọ, yanghene awọrọ a damoma rẹ aye ina dobọji, ne wu je yono i Baibol na yanghene ru oborẹ ọgbare. Wu na sabu roro taghene aye a kparehasuọ.a (John 15:​19, 20) Echu o ru omayen “jerẹ ọmakashe ude.” Omarana, ọnọ sabu phiẹ ọwan rhọ na ja huvwele i Jehova. (2 Corinthians 11:14) Ona ọrọrọ Echu ọ ha ruiruo nọ sabu dobọ ẹga ra harẹn i Jehova ji, ọyẹ ọ lẹrhẹ ọwan roro taghene ọwan e mwuovwan ra na ga Osolobrugwẹ-ẹ.—Proverbs 24:⁠10.

RU LELE EKAMA I JEHOVA

17. Mesoriẹ ọwan a huvwele i Jehova?

¹⁷ Arha huvwele i Jehova, ọwan ne dje Echu rhiẹ ọmọrenfian. Me yọ nọ sa ọwan erhumu rhiẹ era huvwele i Jehova? Baibol na ọrhọ ta: “Are ine vi vwo ẹguọlọ kpahen Jehova Osolobrugwẹ are rhẹ ọsoso ọmudu are rhẹ ọsoso ugboma are kugbe ọsoso omẹgbanhon are.” (Deuteronomy 6:⁠5) Ọwan a huvwele i Jehova nime ọwan i vwo ẹguọlọ kpahiẹn. Ẹguọlọ re vwo kpahen i Jehova ọrhọ gbanhanrhọ, ọwan ne ru kemru kemru rọ ta rẹn ọwan. Ọnyikọ John ọrhọ ya: “Ọnana yẹ oborẹ ẹguọlọ Osolobrugwẹ o mevirhọ, ne ru lele ekama enẹyen; nime ekama enẹyen a ghwa pha-an.”—1 John 5:⁠3.

18, 19. (a) Me yẹ ekwakwa ezẹko ri Jehova ọ tare taghene i sọre? (b) Marhẹ e ru rhe taghene i Jehova ọ vwọ ta rẹn ọwan ne ru oborẹ ana ja sabu ru-u?

¹⁸ Me yẹ ekwakwa ezẹko ri Jehova ọ ta rẹn ọwan taghene i sọre? Idje ezẹko i ha uvuẹn ekpeti na “Vwo Utuoma Kpahen Oborẹ i Jehova O Vwo Utuoma Kpahen.” Ukukaro, wu na sabu roro taghene ezẹko usuẹn ekwakwa enana a ghwai biomu-u. Ọrẹn, wu rhe se eghwẹmro i Baibol na ji dabu roro kpahen aye, wu na mẹrẹn ẹghwanren rọ havwiẹ ra na mọrọn irhi Jehova. Wu na ji mẹrẹnvwrurhe taghene o fori ne wu ru ewene ezẹko uvuẹn akpenyerẹn ọnọ. Dedevwo ọ bẹn ọkezẹko, ọrẹn, wu rhe ru ewene erana, ne wu na mẹrẹn ufuoma ọrhẹ omamerhomẹ re rhiẹ ugbehian Osolobrugwẹ. (Isaiah 48:​17, 18) Marhẹ ọwan i ru rhe taghene ana sabu ru ewene erana?

¹⁹ Jehova ọ vwọ ta rẹn ọwan ne ru oborẹ ana ja sabu ru-u. (Deuteronomy 30:​11-14) Ọye omamọ ugbehian, o rhe oborẹ ọwan i havwọ vrẹn oborẹ e rhe oma ọwan te. O rhe omẹgbanhon ọwan ọrhẹ ekete ọwan e seriotọre. (Psalm 103:14) Ọnyikọ Paul ọrhọ yẹ ọwan urhebro: “Osolobrugwẹ ohworho ra hẹrosua, ọ vwọ samọ lẹrhẹ are dẹrughwaroghwu ọdamuni are ina ja sabu di-in.” (1 Corinthians 10:13) Ọwan ina sabu vwo imwẹro taghene i Jehova ọnọ yẹ ọwan omẹgbanhon re ne ru oborẹ ọgbare ọke ephian. Jehova ọnọ yẹ ọwan “omẹgbanhon rọ vrẹn ovwan” nọ sa ọwan erhumu din erhirhiẹ ọgbogbanhon. (2 Corinthians 4:⁠7) Ọke i Paul ọ mẹrẹn userhumu i Jehova uvuẹn aruo erhirhiẹ ọrana, nọ tare: “Mi sabu ru ekwakwa enana ephian nyoma ohworho rọ yẹre mẹ omẹgbanhon.”—Philippians 4:⁠13.

VWO ẸGUỌLỌ KPAHEN OBORẸ I JEHOVA O VWO ẸGUỌLỌ KPAHEN

20. Iruemru ego yo fori ne wu hẹrokele, mesoriẹ?

²⁰ Orhianẹ ọwan i guọlọ rhiẹ ugbehian i Jehova, ọwan ina kẹnoma rẹn ekwakwa i Jehova ọ tare taghene i biomurun, ọrẹn, ene ji ru vrẹn omaran. (Romans 12:⁠9) Igbehian Osolobrugwẹ e vwo ẹguọlọ kpahen oborẹ ọye o vwo ẹguọlọ kpahen. E dje ekwakwa na rhẹ Psalm 15:​1-5. (Se yi.) Igbehian i Jehova a hẹrokele iruemru enẹyen, aye a jeghwai dje “ẹguọlọ, aghọghọ, edirin, uruemru esiri, orhorhomu, esegburhomẹmro, uruemru dẹndẹn, ọrhẹ omerhesun” phia.—Galatians 5:​22, 23.

21. Marhẹ wu ne ru sabu dje iruemru Osolobrugwẹ o vwo ẹguọlọ kpahen phia?

²¹ Marhẹ wu ne ru sabu yono oborẹ wu ne ru dje iruemru orhorhomu erana phia? O fori ne wu yono oborẹ i Jehova o vwo ẹguọlọ kpahen nyoma wu ne se i Baibol na jeghwai yonie ọke ephian. (Isaiah 30:​20, 21) We rhe ru ọnana, ẹguọlọ wu vwo kpahen i Jehova nọ gbanhanrhọ, ọrana ọnọ lẹrhuọ huvwele yi.

22. Me yo no nẹ erhumie rhe wu rha huvwele i Jehova?

²² Ewene ro fori taghene wu ru uvuẹn akpenyerẹn ọnọ, ana sabu haye dje ọke e ku ewun ahwanren nuẹ, ne ku ọkpokpọ rhọ. Baibol na ọ tare taghene, o fori ne wu “ku uruemru ahwanren na . . . nu” ne wu ku “uruemru ọkpokpọ na rhọ.” (Colossians 3:​9, 10) Dedevwo ọ lọhọ-ọ, erhe ru ewene enana jeghwai huvwele i Jehova, o veri taghene ọnọ yẹ ọwan “erere ọduado.” (Psalm 19:11) Huvwele i Jehova, ne wu dje Echu rhiẹ ọmọrenfian. Wu vwa ga i Jehova fọkiẹ erere wu na mẹrẹn mie yi-i, ọrẹn, ga ye fọkiẹ ẹguọlọ okokodo wu vwo kpahiẹn. Omarana, ne wu ne rhiẹ omamọ ugbehian rẹn i Jehova!