Adam Ọrhẹ Eve a Huvwele Osolobrugwẹ-ẹ

Ẹdẹ owu, ọke Eve ọvo ọ ha uvuẹn ogba na, obodirin nọ tẹmro riẹn. Obodirin na nọ tare: ‘Ghini urhomẹmro taghene Osolobrugwẹ ọ tare taghene are i vwa riẹ emamọ ri ha uvuẹn ogba na-a?’ Eve nọ ta riẹn: ‘Ame ina sabu riẹ emamọ na ephian jokpanẹ owu ọvo. Ame i rha riẹ omamọ ọrana, ame ine hwuo.’ Obodirin na nọ tare: ‘Are i hwuẹ-ẹ. Itiọrurhomẹmro, are i rha riẹ omamọ ọrana, are ina họhọ Osolobrugwẹ.’ Ọrana urhomẹmro? Ẹjo. Ọrẹn, Eve no kwerhọ ye. Eve no ni omamọ na, no vwo ẹhẹn kpahiẹn. Omarana, nọ kọrọ omamọ na, nọ re riẹ, nọ ji yẹ Adam. Adam o rheri taghene aye ine hwuo, aye i rha tiẹn uvwele Osolobrugwẹ. Ọrẹn, Adam ọ ji riẹ omamọ na.

Uvuẹn ẹdẹ ọrana, Jehova nọ tẹmro rẹn Adam ọrhẹ Eve. Jehova nọ nọrẹn aye oborẹ ọsoriẹ aye a tiẹn uvwele yi. Eve no kperi obodirin na, Adam no ji kperi Eve. Nime, aye i tiẹn uvwele i Jehova, Jehova no lerẹ aye nẹ ogba na. Neneyo, aye i ja rha ghwẹrioma riẹ ogba na, Jehova no fi emakashe ọrhẹ odan ọlọkọ ro vwo erhanren rhẹ anurẹsẹ ogba na.

Jehova nọ tare taghene ohworho rọ mọrenfian rẹn Eve na, ọnọ ji rioja. Orhiẹ obodirin na yọ tẹmro rẹn Eve-e. Jehova ọ ma obodirin rọ tẹmro-o. Ọmakashe obiobiomu owu yọ lẹrhẹ obodirin na tẹmro. Ọmakashe na o ruẹ ọnana nọ phiẹ Eve rhọ. Ọmakashe na ye se Echu ro rhiẹ i Dẹbolo na. Jehova ọnọ ghwọghọ Echu phẹrẹkpẹ, nọ jọ rhọ phiẹ ihworho rhọ ruẹ oborẹ esọre.