O Kpe Ohworho Fọkiẹ Ekwẹre

Ọke Adam ọrhẹ Eve e nẹ ogba Eden, aye ni vwiẹ emọ buebun. Cain ro rhiẹ ọmọ ọkpako aye ọghwẹrẹ, ọmọ ọreva re se Abel no rhiẹ osuingegede.

Ẹdẹ owu Cain ọrhẹ Abel ni ze izobo rẹn i Jehova. Wu rhe oborẹ izobo o mevirhọ? O mevirhọ ẹghẹlẹ oghẹnrensan. Oma ọ merhen i Jehova kpahen izobo Abel, ọrẹn, oma ọ merhiẹn kpahen ọrẹ i Cain o zeri-i. Cain nọ tuekwẹre. Jehova nọ ha orhetio riẹn taghene ekwẹre ọnọ sabu lẹrhiẹ ru oborẹ obiomurun. Ọrẹn, Cain ọ kerhọ-ọ.

Ukpomaran, Cain nọ ta rẹn Abel: ‘Me leli mẹ riẹ ikebi.’ Ọke aye ọvo a ha uvuẹn ikebi na, Cain no kpe Abel hwu. Me yi Jehova ono ru kpahen ọnana? Jehova nọ ha oja riẹ Cain, nyoma o le yi seseri nẹ ekete ekrun ọnẹyen ọ havwọ. Cain ọ sabu ghwẹrioma bru aye ghwomara-an.

O vwo oborẹ ana sabu yono nẹ ọnana rhe? Ọwan ina sabu biomevwan, orhianẹ ekwakwa a phia lele oborẹ ọwan i guọleriẹ rhọ-ọ. Ọrẹn, ọwan i rha mẹrẹnvwrurhe taghene a tuekwẹre yanghene ohworho ọrhọ ha orhetio harẹn ọwan taghene ọwan a tuekwẹre phan, o fori ne brokpakpa wene abọ, ne sun ekwẹre ọwan ukperẹ ekwẹre ono sun ọwan.

Nime Abel o vwo ẹguọlọ kpahen i Jehova jeghwai ru oborẹ ọgbare, Jehova ọnọ karorhọ ye ọke ephian. Osolobrugwẹ ọnọ rhọmọ Abel nẹ uhwu, ọke akpọ na o rhiẹ Paradais ne.