Ọdamuni Esegburhomẹmro

Abraham o yono Isaac ro rhiẹ ọmọyen no vwo ẹguọlọ kpahen i Jehova jeghwai hẹroso ive i Jehova ephian. Ọrẹn, ọke Isaac ọ ha uvwre ẹgbukpe 25, Jehova nọ ta rẹn Abraham no ru emru owu rọ gbanhonron omamọ. Me yi Jehova ọ ta riẹn no ru?

Osolobrugwẹ nọ ta rẹn Abraham: ‘Biko, ha ọmọ owu ọvo wu vwori na, ne wu haye ze izobo mẹ uvuẹn ugbenu rọ ha uvuẹn ẹkwotọre i Moriah.’ Abraham o rhe oborẹ ọsoriẹ ono ru ọnana-a. Ọrẹn, ọ ji huvwele i Jehova.

Igidi urhiọke ẹdẹ ọreva ye, Abraham, Isaac ọrhẹ idibo yi awanva ni riẹ Moriah. Ẹdọke esa a vrẹn, aye ni kparughwarọ mẹrẹn igbenu na. Abraham nọ ta rẹn idibo yi taghene aye i hẹrhiẹ, ọye ọrhẹ Isaac ine ye ze izobo. Abraham nọ ha erhan rẹn Isaac nọ kpare, ọye nọ mọrọn aphia. Isaac nọ nọ ọsẹ ye: ‘Ogegede ra na ha ze izobo na ne?’ Abraham nọ ta riẹn: ‘Ọmọ mẹ, Jehova ọnọ haye rhe.’

Ọke aye e te ugbenu na, aye ni suẹ agbarha. Abraham nọ gba abọ ọrhẹ aghwẹ Isaac, no fi rie rhẹ agbarha na.

Abraham nọ ha aphia na phia. Ogege, ọmakashe i Jehova no se Abraham: ‘Abraham! Wu vwa kon ọmọ na-a! Mi mẹrẹnvwrurhe ne taghene wu vwo esegburhomẹmro kpahen Osolobrugwẹ, nime wu vwo omwemẹ wu na ha ọmọ ọnọ ze izobo.’ Abraham nọ mẹrẹn egbon rẹ ighoro yi ọ jẹrhọ orhan. No brokpakpa rhan Isaac, nọ ha egbon na ze izobo.

Nẹ ẹdẹ ọrana rhe, Jehova no se Abraham ugbehian yen. Wu rhe oborẹ ọsoriẹ? Abraham o ruẹ oborẹ i Jehova ọ ta riẹn no ru, dedevwo o rhe oborẹ ọsoriẹ i Jehova ọ ta riẹn no ruie-e.

Jehova nọ rharhumu vive rẹn Abraham: ‘Mi na yọ ebrurhọ, mi ne ruẹ emọ enọ nẹ aye i bun.’ Jehova no ji vive taghene ọnọ ha ebruhọ rẹn ihworho irhorhomu ephian nyoma ekrun Abraham.