Gideon o fi itu i Midian Kparobọ

Ọke oru, emọ Israel i vwe rhe ru obọrẹ i Jehova ọ tare-e, aye na ha ẹga rẹn isolobrugwẹ efian. Ọsoso ẹgbukpe irhiruẹ, itu i Midian ne so eranmo emọ Israel na, aye na jeghwai ghwọghọ ewawọ aye. Neneyo emọ Israel na i sabu vabọ itu i Midian, aye ne tiomanuẹ uvuẹn unu ri ha uvuẹn atita ọrhẹ uvuẹn igbenu. Aye ni rẹ i Jehova, no simi aye. Jehova no dje ọmakashe vwe idama owu re se i Gideon. Ọmakashe na nọ tare: ‘Jehova ọ djẹruọ ne wu rhiẹ ọgba owọnren.’ Gideon nọ nọren: ‘Marhẹ mi ne ru simi agbamwa Israel? Mie fiemru owuorowu-u.’

Marhẹ yo no ru mwu i Gideon ẹro taghene i Jehova yọ djẹriẹ ha? Gideon no fi oruru rhotọre, nọ ta rẹn i Jehova: ‘Urhiọke orho te, oruru ọnana ọrhọ kpọtọ ọrẹn otọre na ọ kare, mi ne rhe taghene wu guọlọre ni mi simi agbamwa Israel.’ Urhiọke o ghini te, oruru na ọ kpọtọre omamọ, ọrẹn, otọre na ọ kare! Gideon nọ ji ta rẹn i Jehova taghene urhiọke ẹdẹ ọreva ye, o ruie nẹ oruru na ọ ka, nẹ otọre na ọ kpọtọ. Ọke ọ ghini phia, Gideon no mo vwo imwẹro taghene i Jehova ọ ghini djẹ ye ha ne. Gideon no koko isodja ye ephian, nẹ aye i ye lele itu i Midian fiuvweri.

Jehova nọ ta rẹn i Gideon: ‘Emọ Israel ine fikparobọ. Ọrẹn, nime isodja enọ i bun phan, are ina sabu roro taghene are ọvo yi fiuvweri na kparobọ. Ta rẹn ihworho rẹ ofẹn o mwuẹ, nẹ aye i ghwẹrioma rie.’ Omarana, isodja ri te 22,000 ni rieri, ọrẹn, isodja ri te 10,000 nọ yọ hẹrhẹre. Jehova nọ tare: ‘Isodja na i ji bun phan. Ta rẹn aye nẹ aye i riẹ usurhẹn, nẹ aye i ya da ame avwaye. Isodja ri da ame, ọrẹn, aye a dẹrẹ sẹ evwreghrẹn a sa, yi ne leluo.’ Isodja awan 300 ọvo, yi dẹrẹre, ọke aye a da ame. Jehova no vive rẹn Gideon taghene ihworho ri hẹrhẹre na yi ne fi itu i Midian ri te 135,000 na kparobọ.

Uvuẹn ason ọrana, Jehova nọ ta rẹn i Gideon: ‘O te ọke wu ne fi ẹkwotọre i Midian kparobọ ne!’ Gideon nọ yẹ ihworho yi ikpori ọrhẹ eriẹ eduado re fi ukpẹ rhọ. Nọ ta rẹn aye: ‘Are i tẹnrovi mẹ, nẹ are i ru oborẹ mi ruru ephian.’ Gideon no kporo ukpori ọnẹyen, nọ ghwọghọ eriẹ ọnẹyen, no bunu: ‘Odan ọlọkọ i Jehova ọrhẹ ọrẹ i Gideon!’ Isodja awan 300 na, ni ji ru omaran. Ofẹn no mwu itu i Midian na, aye na zẹ sa zẹ riẹ. Fọkiẹ ọyangha na, aye ọvo na wọnrọn omoma aye. Ọgbọrọrọ, Jehova nọ ha userhumu rẹn emọ Israel nẹ aye i fi evwreghrẹn aye kparobọ.