Jehova ọ yẹ i Samson Omẹgbanhon

Ọgbọrọrọ, emọ Israel buebun na ha ẹga rẹn ema, omarana, Jehova nọ nyajẹ aye vwo nẹ itu i Philistine i ha oja riẹ aye, jeghwai sun ẹkwotọre aye. Ọrẹn, o ji vwo emọ Israel erọrọ ri ji vwo ẹguọlọ kpahen i Jehova. Owu usuẹn ihworho erana yẹ ọhworhare owu re se i Manoah. Ọye ọrhẹ aniẹ e ji vwiẹ ọmọ-ọ. Ẹdẹ owu, Jehova no dje ọmakashe vwe ane i Manoah. Ọmakashe na nọ ta riẹn: ‘Wu ne vwiẹ ọmọ ọhworhare. Ọye ono simi emọ Israel nẹ abọ itu i Philistine na. Ọye ono rhiẹ i Nazirite.’ Wu rhe ihworho re se Nazirite? Aye ihworho oghẹnrensan harẹn i Jehova. Aye i vwa da ẹton aye-e.

Ọke oru, ane i Manoah no vwiẹ ọmọ ọhworhare, Manoah no mwu Samson riẹn. Ọke i Samson ọ ghwanren ne, Jehova no rurie no vwo omẹgbanhon omamọ. Samson ọ sabu kpe okporokpo rhẹ abọ ọkaka. Uvuẹn erhirhiẹ owu, Samson ọvo no kpe itu Philistine ri te 30. Itu Philistine na i vwo utuoma kpahiẹn, aye na guọlọ izede rẹ aye ine kpe yi. Ason owu, ọke i Samson ọ merhẹn uvuẹn amwa re se Gaza, itu Philistine na ni ya hẹrhiẹ uvuẹn anurẹsẹ amwa na neneyo aye i sabu kpe yi, urhiọke orho te. Ọrẹn, uvuẹn erhẹrhẹ ason, Samson no vẹnrẹnren, no riẹ anurẹsẹ amwa na, no ghwie ighwe amwa na nẹ otọre. Nọ kpareriẹ rhẹ akoko yi riẹ oberun ugbenu rọ kẹrẹ Hebron!

Ọke oru, itu Philistine na ni bru Delilah ro rhiẹ ọmase rẹ Samson ọ guọlọ rọnmọ, aye ni ta riẹn: ‘Ame ina kwa uchunu igho idọlọ ọfuanfon ro te 5,500 wẹn, wu rha ta rẹn ame oborẹ ọsoriẹ i Samson ọ gbanhon oma. Ame a guọlọ mwuie, nẹ ame i fie rhẹ ekanron.’ Delilah ọ guọlọ igho na, no kweri. Ukukaro, Samson o kwe ta riẹn oborẹ ọsoriẹ ọ gbanhon oma-a. Ọrẹn, nọ viẹ kpe yi, Samson nọ ta riẹn oborẹ ọsoriẹ ọ gbanhon oma. Samson nọ ta riẹn: ‘Nime mẹmẹ i Nazirite, a ji da ẹton mẹ avwọke e vwiẹ mẹ na-a. Arha da ẹton mẹ, mi rhe vwo omẹgbanho-on.’ Manẹ i Samson ọ vwọ ta riẹ-ẹn, rhomaran?

Ogege, Delilah nọ ta rẹn itu i Philistine na: ‘Mi rhe odjahen na ne!’ Delilah no rurie nẹ i Samson ọ merhẹn rhẹ aghwẹ ye, ohworho owu nọ da ẹton i Samson. Delilah no bunu: ‘Samson, itu i Philistine na i ha aran!’ Samson no vẹnrẹnren, orho vwo omẹgbanhon ghwomara-an. Itu i Philistine na ni mwu rien, aye ni tu ikẹriẹ, aye ni fi rie rhẹ ekanron.

Ẹdẹ owu, buebun itu i Philistine na, na riorẹ uvuẹn oghwa ẹga osolobrugwẹ aye re se Dagon, aye na ta: ‘Osolobrugwẹ ame o fi Samson rhẹ abọ ame ne! Kpare Samson ruẹ otafe! Jenẹ a haye djechẹẹ.’ Aye ni rurie no mevi erhẹrhẹ isimo eva, aye na haye djechẹẹ. Samson nọ nẹrhomo: ‘O Jehova, biko rharhumu yẹ mẹ omẹgbanhon.’ Ọrẹn ọke ọnana, ẹton i Samson i rharhumu seri ne. Samson nọ ha ọsoso omẹgbanhon ọnẹyen mwa isimo eva ri ha uvuẹn oghwa ẹga na. Oghwa ẹga na no se bru ọsoso ihworho ri ha uvuẹn oghwa na, aye ephian kugbe Samson ni hwuru.