E kpe Orodje Ọmase ro Rhiẹ Ọvwọkon

Ẹdẹ owu, Orodje Ahab ro rhirhiẹ uvuẹn i Jezreel, nọ nya ivakpo mẹrẹn ikebi ọhworhare owu re se i Naboth. Ahab ọ guọlọ ha ikebi na, nọ damoma rọ nọ dẹ ye mie i Naboth. Ọrẹn, Naboth o kwe rhẹ ye riẹ-ẹn, nime ọ haso Urhi Jehova ra na rhẹ otọre ra ha riuku. Orodje Ahab ọ họghọ rẹn i Naboth nime o ru oborẹ ọgbare? Ẹjo. Oma ọ merhen Ahab kpahiẹ-ẹn. Ahab nọ tuekwẹre te erhirhiẹ rọ vwọ guọlọ nẹ oghwa ye, ọ jeghwai kwe riẹ emare-en.

Ane Ahab re se i Jezebel, ro rhiẹ ọvwọkon, nọ ta riẹn: ‘Wẹwẹ yẹ orodje Israel. Wu na sabu vwo oborẹ wu guọlọre. Mi na ha otọre na wẹn.’ Ane Ahab nọ ya ileta vwe ekpako amwa na, nọ ta rẹn aye taghene aye i mọrenfian baren Naboth, taghene o phien Osolobrugwẹ, neneyo e fie kpe. Ekpako amwa na ni ru oborẹ i Jezebel ọ ta rẹn aye na, Jezebel nọ ta rẹn esa ye: ‘Naboth o hwu ne. Gba ha ikebi na.’

Orhiẹ i Naboth ọvo yi Jezebel o kperi-i. Ọ jeghwai kpe ihworho buebun ri vwo ẹguọlọ kpahen i Jehova. Habaye, Jezebel ọ ha ẹga rẹn ema jeghwai ru ekwakwa ibiobiomu. Jehova ọ mẹrẹn ọsoso oborẹ i Jezebel o ruru na. Me yi Jehova ono ru i Jezebel?

Ọke Ahab o hwu hin, ọmọyen re se Jehoram nọ yo rhiẹ orodje. Jehova no dje ọhworhare owu re se Jehu no yo kpe i Jezebel ọrhẹ ekrun ọnẹyen.

Jehu nọ ghwa okalokpọ owọnren ọnẹyen riẹ ekete i Jezebel o rhirhiẹ uvuẹn Jezreel. Jehoram nọ yọ vwa i Jehu, Jehoram nọ nọ riẹn: ‘Ọwan i vwo ẹghwọ?’ Jehu nọ kpahenrhọ riẹn: ‘Ra mẹriẹn taghene izuo ro rhiẹ i Jezebel o ruẹ ekwakwa ibiobiomu na, ufuoma ọ sabu rhirhie ye-e.’ Jehoram nọ damoma rọ nọ ghwa iyesi ọnẹyen zẹ vabọ. Ọrẹn, Jehu nọ ha ubigẹn sa i Jehoram sebru otọre, no hwuru.

Jehu no ji bru Jezebel riẹ egodo yi. Ọke Jezebel o rhon taghene i Jehu ọ sa, no sin ughwaruiẹ, no ruẹ ẹton ọnẹyen, no siyẹ ivakpo oghwa ye rọ hẹrhẹ i Jehu. Ọke i Jehu o te avwaye, Jezebel nọ tẹmro aruehinmo riẹn. Jehu nọ ta rẹn idibo i Jezebel ri mevi kẹriẹ: “Are i dorien rhotọre!” Aye ni doron i Jezebel nẹ ivakpo na sebru otọre, no hwuru.

Ọrana ọ vrẹn hin, Jehu no kpe emọ i Ahab awan 70, nọ jeghwai ti ogame i Baal nẹ ẹkwotọre na. Wu mẹrenriẹn vwrurhe taghene i Jehova o rhe i kemru kemru? Wu ji mẹrẹnvwrurhe taghene ọ ha oja riẹ ihworho re ruẹ oborẹ obiomurun uvuẹn ọke ro serhọ?