Jehova ọ Chochọn i Jehoshaphat

Jehoshaphat ro rhiẹ orodje i Judah, ọ ghwọghọ agbarha izobo ọrhẹ ema i Baal re ha uvuẹn ẹkwotọre na. Jehoshaphat ọ guọlọre nẹ ihworho na i rhe irhi Jehova. Omarana, Jehoshaphat no dje itu i Levi ọrhẹ emọ irodje na lele ẹkwotọre i Judah, nẹ aye i yono ihworho na kpahen irhi Jehova.

Ofẹn o mwu egbamwa ri kẹrẹ i Judah, rẹ aye ine lele aye wọnron, nime, aye i rheri taghene i Jehova ọ ha userhumu rẹn aye. Aye i tobọ ha ẹghẹlẹ vwe Orodje Jehoshaphat. Ọrẹn, itu i Moab, Ammon ọrhẹ ihworho re rhirhiẹ uvwre i Seir, na guọlọ lele i Judah wọnrọn. Jehoshaphat o rheri taghene o fori nọ nekpẹn userhumu mie i Jehova. Omarana, no se ọsoso ihworho na koko uvuẹn i Jerusalem. Jehoshaphat nọ nẹrhomo obaro aye, nọ tare: ‘Jehova, wa rha ha userhumu rẹn ame-e, ame i sabu fiuvweri na kparobọ-ọ. Biko ta rẹn ame oborẹ ame ine ruo.’

Jehova nọ kpahenrhọ ẹrhomo na, nọ tare: ‘Are i vwa zofẹ-ẹn. Mi na sa are erhumu. Are i mwuegbe, are i mevigbanhon, nẹ are i mẹrẹn oborẹ mi ne simi are lele.’ Marhẹ i Jehova o simi rẹ aye lele?

Urhiọke ẹdẹ ọreva ye, Jehoshaphat nọ sanọ ihworho ra so ijoro, nọ ta rẹn aye nẹ aye i kobaro harẹn isodja ye. Aye ni nya nẹ Jerusalem riẹ ekete rẹ aye ine fiuvweri na, re se Tekoa.

Ọke ihworho na a so ijoro jiri Jehova rhẹ uvwele gorigori, Jehova nọ wọnrọn harẹn ihworho yi. Jehova no fi otighri rhẹ uvwre itu Ammon ọrhẹ itu Moab, aye ne kpe omoma aye, aye ephian ni hwuru. Ọrẹn, Jehova ọ sẹrorẹ ihworho i Judah, isodja na, ọrhẹ irherẹn na. Ọsoso ihworho re rhirhiẹ kẹrẹ aye ni rhon kpahẹn oborẹ i Jehova o ruru na, aye ni mẹrẹnvwrurhe taghene i Jehova ọ ji chochọn ihworho yi. Marhẹ i Jehova o ru simi ihworho yi? O simi ihworho yi izede buebun. Ọ vwọ guọlọ userhumu mie ituakpọ o ki simi ihworho yi-i.