Jehova o dje i Jeremiah no yo Ghwoghwo

Jehova ọ djẹ i Jeremiah no rhiẹ ọmẹraro harẹn ihworho i Judah. Jehova ọ ta riẹn no ghwoghwo rẹn ihworho na, nọ jeghwai ha orhetio rẹn aye nẹ aye i dobọ ekwakwa ibiobiomu e ru ji. Jeremiah nọ tare: ‘Ọrẹn, Jehova, mẹmẹ ibiẹ ọmọvwerhe. Mie rhe oborẹ mi na tẹmro rẹn ihworho na lele-e.’ Jehova nọ ta riẹn: ‘Wu vwa zofẹ-ẹn. Mi na ta wẹn oborẹ wu na ta. Mi na ha userhumu wẹn.’

Jehova nọ ta rẹn i Jeremiah no koko ekpako amwa na, nọ ghwọghọ eriẹ obaro aye, nọ ta rẹn aye: ‘Ana ghwọghọ i Jerusalem jerẹ eriẹ ọnana.’ Ọke i Jeremiah o ru oborẹ i Jehova ọ ta riẹn hin, ekpako amwa na, ni tuekwẹre gbangbanhon. Orherẹn owu rẹ odẹ ye o rhiẹ Pashhur nọ ghwiẹ i Jeremiah jeghwai kanren abọ yẹ ọrhẹ aghwẹ ye mwu orhan. Jeremiah ọ sabu kpogho oma ọsoso ason ọrana-a. Pashhur no tiobọnie ẹdẹ ọreva ye. Jeremiah nọ tare: ‘Mi sabu din ọnana ghwomara-an. Mi ghwoghwo ghwomara-an.’ Ọrẹn, Jeremiah ọ ghini dobọ aghwoghwo na ji? Ẹjo. Ọke i Jeremiah ọ dabu roro kpahiẹn, nọ tare: ‘Urhomu ri Jehova o djeri mẹ na, ọ họhọ erhanren uvuẹn omamẹ. Mi sabu dobọ aghwoghwo jẹ-ẹ.’ Jeremiah nọ ji ha orhetio rẹn ihworho na ọke ephian.

Ẹgbukpe ezẹko a vrẹn hin, orodje ọrọrọ no sun i Judah. Irherẹn na ọrhẹ emẹraro efian na, i vwo utuoma kpahen ẹmro i Jeremiah. Aye ni ta rẹn emọ orodje na: ‘O fori ne kpe ọhworhare ọnana.’ Jeremiah nọ tare: ‘Are i rhe kpe mẹ, are i kpe ohworho ro vwo ru emru owuorowu sọ. Ẹmro i Jehova yi mie ghwoghwo, rhẹ ọnẹmẹ-ẹ. Ọke emọ orodje na e rhon oborẹ i Jeremiah ọ tare, aye ni tare: ‘O fo ne kpe ọhworhare ọnana-a.’

Jeremiah no ji ghwoghwo, emọ orodje na, na tuekwẹre gbangbanhon. Aye ni ta rẹn orodje na no kpe Jeremiah. Orodje na nọ tare taghene aye ina sabu ru i Jeremiah oborẹ aye i guọlọre. Aye ni mwu i Jeremiah fi rhẹ edje ro vwo epẹtẹ, neneyo ọ sabu hwu uvuẹn avwaye. Jeremiah no dimẹ uvuẹn epẹtẹ rọ ha uvuẹn edje na bibiesuọn.

Ọke oru, Ebed-melech ro rhiẹ ohworho rọ wian rẹn orodje na, nọ yọ ta rẹn orodje na: ‘Emọ orodje na i doron i Jeremiah rhẹ uvuẹn edje! Ọwan i rha nyaje vwo, ono hwuo.’ Orodje na nọ ta rẹn Ebed-melech nọ ha ehworhare awan 30 lele oma, nẹ aye i ya kpare i Jeremiah nẹ edje na. O fo nẹ ọwan i hẹrokele i Jeremiah rọ vwọ dobọ owian aghwoghwo na ji?