Ezra o Yono Ihworho Kpahen Urhi Osolobrugwẹ

O te ẹgbukpe 70 rẹ emọ Israel buebun i ghwẹrioma riẹ i Jerusalem ne, ọrẹn, emọ Israel ezẹko e ji rhirhiẹ emwa rẹ itu Persia e suẹn. Owu usuẹn ihworho erana yẹ orherẹn rẹ odẹ ye o rhiẹ Ezra, ro yono ihworho kpahen Urhi Jehova. Ezra no rhonrin taghene ihworho ri ha uvuẹn i Jerusalem i vwa nyalele Urhi na-a, omarana, nọ guọlọ ya ha userhumu rẹn aye. Orodje Artaxerxes ro sun i Persia nọ ta riẹn: ‘Osolobrugwẹ o ruruo ne wu ghwanren neneyo wu sabu yono ihworho kpahen Urhi ọnẹyen. Wẹwẹ ọrhẹ ihworho ri guọlọ leluo ina sabu nyarhẹn.’ Ezra nọ vwoma rhẹ ihworho ri guọlọ ghwẹrioma riẹ i Jerusalem. Aye ni nẹrhomo vwe i Jehova nọ sẹrorẹ aye uvuẹn ugbo onya na, aye ni tuẹn onya rhọ.

Ọke ibiamo ẹne a vren hin, aye ni te i Jerusalem. Ekakuro na ni ta rẹn Ezra: ‘Emọ Israel i tiẹn uvwele i Jehova nyoma aye a rọnmọ emẹse ra ha ẹga rẹn isolobrugwẹ efian.’ Me yẹ Ezra o ruru? Ezra no sighwẹ nẹrhomo vwe i Jehova obaro ihworho na, nọ tare: ‘Jehova, wu ru ekwakwa buebun harẹn ame ne, ọrẹn, ame i ru ọdandan hasuọ ne.’ Ihworho na ni ghwẹriẹre, ọrẹn, aye i ji guọlọ ọkpọvi nẹ aye i sabu ru oborẹ ọgbare. Ezra nọ ta rẹn ekpako ọrhẹ iguẹnzọn na, nẹ aye i kwaphiẹ erhirhiẹ na rhọ. Uvwre ibiamo esa, ne le ihworho ri vwe kwe ga i Jehova nẹ ẹkwotọre na.

Ẹgbukpe ikpereva ni nyavrẹn. Uvwre ọke ọnana, ya rharhumu bọn ugbomoghwa i Jerusalem hin. Omarana, Ezra no se ihworho na koko ekete afiede, no se Urhi Osolobrugwẹ harẹn aye. Ọke Ezra o rhie ọbe Urhi na, ihworho na ni vẹnrẹn mevi. Ezra no jiri Jehova, ihworho na ni kpare abọ rierun ro djephia taghene aye i kwerhọ ye. Omarana, Ezra no se ọbe Urhi na, ihworho na, na dabu kerhọ. Aye ni mẹrẹnvwrurhe taghene aye i rharhumu sẹrerhumuji Jehova ne, aye na viẹ. Ẹdẹ ọreva ye, Ezra no se Irhi erọrọ harẹn aye. Aye ni mẹrẹnvwrurhe taghene ọke ra riorẹ Oghwọgbọ na, ọ joma te ne. Ogege, aye ni tuẹn egbemwuo rhọ hẹrhẹ orẹ na.

Ọsoso ẹdọke irhiruẹ aye a riorẹ na, ihworho na, na ghọghọ jeghwai kpẹmẹ i Jehova fọkiẹ ewawọ irhorhomu rẹ aye i vunrun. Nẹ ọke i Joshua rhe, o ji vwo Orẹ Oghwọgbọ ro rhomu te ọrana-a. Ọke aye a riorẹ na hin, ihworho na ni koko nẹrhomo kugbe, aye ni tare: ‘Jehova, wu ti rẹ ame nẹ abọ evrẹn, wu ghẹrerẹ ame uvuẹn ato, wu jeghwai yẹ ame otọre orhorhomu ọnana. Ọrẹn, ame e ruo sọ ọgbọ buẹbun. Wu dje emẹraro ma ha orhetio rẹn ame, ọrẹn, ame a kẹrhọ-ọ. Udabọ ọrana, wu ji vwo erhionrin kpahen ame. Wu nyamwu ive wu ve rẹn Abraham. Vwarana, ame i vive taghene ame ina huvwele ọnọ.’ Aye ni ya ive aye rhotọre, ekpako na, itu i Levi ọrhẹ irherẹn na, ni fiobọrhọ ọbe na.