Elizabeth o Vwiẹ Ọmọ

Ẹgbukpe 400 a vrẹn ọke ra rharhumu bọn ugbomoghwa i Jerusalem hin, orherẹn owu re se Zechariah ọrhẹ aniẹ re se Elizabeth ne rhirhiẹ kẹrẹ i Jerusalem. Aye i rọnmọ te ẹgbukpe buebun ne, ọrẹn, aye e ji vwiẹ ọmọ-ọ. Ẹdẹ owu, ọke i Zechariah o ze izobo uvuẹn oghwa ẹga na, ọmakashe re se Gabriel nọ homaphia riẹn. Ofẹn no mwu i Zechariah, ọrẹn, Gabriel nọ ta riẹn: ‘Wu vwa zofẹ-ẹn. Jehova o djeri mẹ omamọ urhomu vwo. Anuọ Elizabeth, ono vwiẹ ọmọ ọhworhare, odẹ ọmọ na ono rhiẹ i John. Jehova ọ djẹ i John nọ wian owian oghẹnrensan.’ Zechariah nọ nọriẹn: ‘Marhẹ mi ne ru kwerhọ oborẹ wu tare na? Mẹmẹ ọrhẹ ane mẹ i ho vrẹn ihworho ri na sabu vwiẹ ọmọ ne.’ Gabriel nọ tare: ‘Osolobrugwẹ yo djeri mẹ bruo rhe taghene mi ta wẹn kpahen iyẹnrẹn ọnana. Ọrẹn, nime we kwerhọ oborẹ mi tare na-a, wu sabu tẹmro bọmọke ene vwiẹ ọmọ na-a.’

Zechariah nọ daji oghwa ẹga na vrẹn oborẹ ọ dajẹ te bi. Omarana, ọke rọ vabu ruẹ otafe, ihworho a hẹrhiẹ nẹ aye i nọ yen kpahen oborẹ ọ phiare. Zechariah ọrhọ sabu tẹmro ghwomara-an. Abọ ye ọvo nọ yọ ha tẹmro rẹn aye. Omarana, ihworho na ni mẹrẹnvwrurhe taghene Osolobrugwẹ o dje urhomu vwe i Zechariah.

Ọke oru, Elizabeth nọ mẹrevwan jeghwai vwiẹ ọmọ ọhworhare, jerẹ oborẹ ọmakashe na ọ tare. Ekrun Elizabeth ọrhẹ igbehian yen ni ya mẹrẹn ọmọ na. Oma ọ merhenrẹn aye omamọ kpahen Elizabeth. Elizabeth nọ tare: ‘Odẹ ọmọ na i John.’ Aye ni tare: ‘O vwo ohworho re se i John uvuẹn ekrun ọnọ-ọ. Mwu i Zechariah riẹn, ro rhiẹ odẹ ọsẹ yẹ.’ Ọrẹn, Zechariah nọ ya ẹmro enana rhotọre: ‘Odẹ ọmọ na i John.’ Ogege, Zechariah nọ sabu tẹmro! Ihworho i Judea ephian ni rhon iyẹnrẹn kpahen ọmọ na, no gberi aye unu, aye na ta: ‘Ọmọ ọnana ọrhọ do, marhẹ ono rhirhiẹ?

Omarana, ẹhẹn ọfuanfon na nọ ruẹ oma i Zechariah. Nọ mẹraro, nọ ta: ‘Jenẹ ujiri o rhirhiẹ ye harẹn i Jehova. Ọye o vive harẹn Abraham taghene ọye ono dje ohworho ro no simi ọwan rhe, nọyẹ i Messiah na. John ono rhiẹ ọmẹraro, habaye, ọye ono mwuegbe izede hẹrhẹ i Messiah na.’

Emru oghẹnrensan ọ ji phia rẹn omizu ekrun Elizabeth re se i Mary. Jene yono kpahiẹn uvuẹn urhomu-ẹmro rọ ha kpahen ọnana.