Gabriel o Rhiẹ Ọpha ruẹ i Mary

Elizabeth o vwo omizu ekrun owu re se Mary, ro rhirhiẹ amwa i Nazareth rọ ha uvuẹn ẹkwotọre i Galilee. Joseph ro ruiruo ikapita ọ san i Mary rhotọre rọ nọ rọnmọ. Ọke evwan Elizabeth o te ibiamo erhan ne, ọmakashe re se Gabriel nọ homaphia rẹn i Mary. Ọmakashe na nọ tare: ‘Doo, Mary. Jehova ọ yẹruọ ebrurhọ ọduado.’ Mary o vwẹruọ oborẹ i Gabriel ọ ta na-a. Gabriel nọ ta rẹn i Mary: ‘Wu na mẹrevwan jeghwai vwiẹ ọmọ ọhworhare, odẹ wu ne mwu riẹn yi Jesu. Ono sun uvuẹn ẹrhẹ Orodje. Usun ọnẹyen ono rhirhiẹ ye bẹmẹdẹ.’

Mary nọ tare: ‘Mie ji chọghọ-ọ. Marhẹ mi ne ru vwiẹ ọmọ? Gabriel nọ tare: ‘O vwo oborẹ ọ bẹn Osolobrugwẹ e ruo-o. Ẹhẹn ọfuanfon na ọnọ ruẹ oma ọnọ, ne wu ne vwiẹ ọmọ ọhworhare. Elizabeth ro rhiẹ omizu ekrun ọnọ, ọ ji mẹrevwan ne.’ Omarana, Mary nọ tare: ‘Mẹmẹ ọgbọtọ i Jehova. Jenẹ oborẹ wu tare na, ọ phia mẹ.’

Mary no rhiẹ ọpha ruẹ Elizabeth uvuẹn amwa owu rọ ha uvuẹn oberun igbenu. Ọke i Mary ọ mroma Elizabeth, ọmọ rọ ha uvuẹn evwan Elizabeth nọ ghọghọ. Ẹhẹn ọfuanfon nọ ruẹ oma Elizabeth, nọ tare: ‘Mary, Jehova ọ yẹruọ ebrurhọ ne. Ọnana uphẹn ọduado ha mẹ, rẹ izu Ọrovwori mẹ o rhiẹ ọpha ro mẹ.’ Mary nọ tare: ‘Mi jiri Jehova rhẹ ọsoso ọmudu mẹ.’ Mary no lele Elizabeth rhirhiẹ te ibiamo esa, ọ ki ghwẹrioma riẹ Nazareth.

Ọke i Joseph o rhe taghene i Mary ọ mẹrevwan, nọ guọlọ fioba rhẹ onyerẹnkugbe ọnẹyen rhẹ i Mary. Ọrẹn, ọmakashe owu nọ homaphia riẹn uvuẹn emena, nọ ta riẹn: ‘Wu vwa zofẹn wu na ha i Mary no rhiẹ anuọ-ọ. Ọye o ru oborẹ ọsọre-e.’ Omarana, Joseph nọ rọnmọ i Mary, nọ hariẹ riẹ oghwa ye.