Jesu no Rhiẹ i Messiah na

John o ghwoghwori taghene: ‘Ohworho rọ do ghwẹ mẹ ọ sa.’ Ọke i Jesu o te uvwre ẹgbukpe 30, no nẹ i Galilee riẹ Urhie i Jordan, ro rhiẹ ekete i John o bru ihworho rhẹ ame. Jesu ọ guọlọre nẹ i John o bruie rhẹ ame, ọrẹn, John nọ tare: ‘O rhiẹ omẹmẹ yi ne bruo rhẹ ame-e. Wẹwẹ yi ne bru mẹ rhẹ ame.’ Jesu nọ ta rẹn i John: ‘Jehova ọ guọlọre ne wu bru mẹ rhẹ ame.’ Omarana, aye ni ruẹ Urhie i Jordan na, John no bru i Jesu rhẹ ame na.

Ọke i Jesu o vẹnrẹn nẹ ame na, nọ nẹrhomo. Ogege, idjuwu na ni rhie firhọ, ẹhẹn ọfuanfon Osolobrugwẹ no bru i Jesu sa jerẹ ilekuku. Omarana, Jehova nọ tẹmro nẹ odjuwu rhe: “Wẹwẹ ọmọ mẹ mi vwo ẹguọlọ kpahen; mi djẹruọ ha ne.”

Ọke ẹhẹn ọfuanfon na ọ ruẹ i Jesu oma, no rhiẹ i Kristi, yanghene i Messiah na. Omarana, nọ tuẹn owian i Jehova ọ yẹriẹ no ru uvuẹn otọrakpọ na rhọ.

Ogege i Jesu o bromarhame hin, no riẹ ato, nọ daji avwaye te ẹdọke 40. Ọke rọ ghwẹrioma rhe, nọ yọ mẹrẹn i John. Ọke i Jesu o bru i John sa, John nọ tare: ‘Ọnana yẹ Ọmogegede Osolobrugwẹ na, ro no ti edandan nẹ akpọ na.’ Nyoma ẹmro ọnana, John nọ haye ta rẹn ihworho taghene i Jesu yi Messiah na. Wu rhe oborẹ ọ phia rẹn i Jesu ọke rọ ha uvuẹn ato na? Jene yono kpahiẹn.