Jesu ọ Ghwẹrioma riẹ Odjuwu

Jesu nọ yọ vwa idibo yi uvuẹn Galilee. Jesu nọ yẹrẹ aye akama ọghoghanren owu, nọ ta rẹn aye: ‘Are i ye ru idibo ihworho nẹ ẹkwotọre sansan rhe. Are i yono aye ekwakwa mi yonirin are na, are i jeghwai bru aye rhame.’ Jesu no vive rẹn aye: ‘Are i karorhọ, mi ne lele are rhirhiẹ ye ọke ephian.’

Ọke a rhọmọ i Jesu nẹ uhwu hin, nọ ha ẹdọke 40 homaphia rẹn idibo yi buebun uvuẹn Galilee ọrhẹ i Jerusalem. Jesu o yonirin aye iyono buebun, nọ jeghwai ru igbevwunu buebun. Jesu nọ vwoma ọrẹ ọkẹta rhẹ inyikọ ye, uvuẹn Ugbenu Olives. Nọ tare: ‘Are i vwe nẹ i Jerusalemu-u. Are i rha hẹrhẹ oborẹ Ọsẹ na o veri na.’

Inyikọ ye, e vwẹruọ oborẹ ọ ta na-a. Aye ni nọ riẹn: ‘Wu ne rhiẹ Orodje Israel phẹrẹkpẹ?’ Jesu nọ ta rẹn aye: ‘O ji te ọke i Jehova ọnọ ha mẹ mwu ẹrhẹ Orodje-e. Phẹrẹkpẹ, are ine vwo omẹgbanhon nyoma ẹhẹn ọfuanfon na, are ni ne rhiẹ iseri mẹ. Are i ye ghwoghwo uvuẹn i Jerusalem, Judea, Samaria, ọrhẹ ekete ri mai seri uvuẹn otọrakpọ na.’

Jesu no riẹ odjuwu bibiesuọn, avwre na no rhurhurie. Idibo yi ne ni oberun, ọrẹn, aye arha mẹriẹn ghwomara-an.

Idibo na ni nẹ Ugbenu Olives riẹ i Jerusalem. Aye na vwoma ọke ephian uvuẹn oghwa owu jeghwai nẹrhomo kugbe. Aye a hẹrhẹ ọke i Jesu ọnọ yẹ aye ọkpọvi erọrọ.