Paul Ọrhẹ Timothy

Timothy uphuphẹn uvuẹn ukoko rọ ha uvuẹn i Lystra. Ọsẹ ye onyẹ Greek, izie onyẹ Jew. Izie ro rhiẹ Eunice, ọrhẹ izie ọduado re se Lois, i yono i Timothy kpahẹn i Jehova nẹ ọke emọvwerhe rhe.

Ọke i Paul o riẹ i Lystra ye ghwoghwo ọgbọreva ye, nọ djokarhọ taghene i Timothy o ghini vwo ẹguọlọ kaphen imizu na, ọye o ji vwo omwemẹ rọ nọ ha userhumu rẹn aye. Paul nọ ha use rẹn i Timothy no kwomakugbe yi uvuẹn owian aghwoghwo na. Uvwre ọke ọrana, Paul no yono i Timothy no rhiẹ omamọ oghwoghwẹmro kugbe omamọ oyono ọre iyẹnrẹn esiri na.

Ẹhẹn ọfuanfon na yo sun i Paul ọrhẹ i Timothy riẹ ekete aye i nyaren ephian. Uvuẹn ason owu, Paul nọ menemena arudo, nọ mẹrẹn ọhworhare owu rọ ta riẹn nọ rhiẹ Macedonia, mọ ha userhumu rẹn aye. Omarana, Paul, Timothy, Silas ọrhẹ Luke ni riẹ avwaye ye ghwoghwo, jeghwai ha ikoko sansan mwu.

Ehworhare ọrhẹ emẹse buebun ni rhiẹ idibo i Kristi uvuẹn Thessalonica rọ ha uvuẹn Macedonia. Ọrẹn, ihworho ezẹko na rioma kpahen i Paul ọrhẹ imizu re hẹrhẹre na. Aye ni ta rẹn ilogbozighi ezẹko nẹ aye i ye kpolo imizu na vwe ihworho re sun amwa na, aye ne bunu: ‘Ehworhare enana evwreghrẹn usun i Rome!’ Paul ọrhẹ i Timothy ni zẹ riẹ i Beroea uvuẹn ason, nime arhọ aye ọ ha erhirhiẹ imwofẹn.

Ihworho re rhirhiẹ Beroea i vwo omwemẹ aye ine rhon iyẹnrẹn esiri na, omarana, itu i Jew ọrhẹ Greek ri ha avwaye ni me rhiẹ idibo i Kristi. Ọke itu i Jew ezẹko e nẹ Thessalonica mọ suẹ okpetu, Paul no riẹ Athens. Ọrẹn, Timothy ọrhẹ Silas ni daji Beroea, nẹ aye i bọn imizu na gbanhon. Ọke oru, Paul no dje Timothy rharhumu riẹ i Thessalonica, nọ ha userhumu rẹn imizu na nyerẹn ghele ẹkparehaso ọgbogbanhon rẹ aye a dẹrughwaroghwẹ. Ro jiribẹn, Paul no dje i Timothy riẹ ikoko erọrọ, nọ bọn imizu na gbanhon.

Paul nọ ta rẹn i Timothy: ‘Ana kparehaso ihworho ri guọlọ ga Osolobrugwẹ.’ Na kparehaso i Timothy jeghwai fie rhẹ ekanron fọkiẹ esegburhomẹmro ọnẹyen. Oma ọ merhen i Timothy fọkiẹ uphẹn ro vwori ro no djephia taghene ọye ọ sẹrorẹ atamwu ro vwori kpahen i Jehova.

Paul nọ ta rẹn imizu ri ha uvuẹn i Philippi: ‘Mie dje i Timothy vwe are. Ono yono are oborẹ are ine ghwoghwo lele, ọrhẹ oborẹ are ine ru daji uvuẹn urhomẹmro na.’ Paul o rheri taghene ọye ọnọ sabu hẹroso i Timothy. Aye i wian kugbe jeghwai rhiẹ igbehian te ẹgbukpe buebun.