E dje i Paul riẹ i Rome

Owian aghwoghwo i Paul ọresa ọ bare uvuẹn i Jerusalem. Avwaye ye mwuie rhẹ ekanron. Ọke ọ menemena arudo uvuẹn ason owu, Jesu nọ ta riẹn: ‘Wu ne riẹ i Rome ye ghwoghwo.’ Ọke oru, na kpaririẹ nẹ i Jerusalem riẹ i Caesarea, nọ daji ekanron te ẹgbukpe eva. Ọke i Paul ọ chochọn esegburhomẹmro ọnẹyẹn obaro igọvunọ re se Festus, nọ tare: ‘Mi kpare ẹzọn mẹ bru i Caesar uvuẹn i Rome.’ Festus nọ tare: “Wu kpare ẹzọn ọnọ bru i Caesar ne; obẹ i Caesar ye wu na nya.” Na ha ọkuna ro riẹ i Rome kpare i Paul, Luke ọrhẹ Aristarchus ni ji lelie.

Ẹdọke buebun yẹ aye i dẹrughwaroghwu ogiribo ọgbogbanhon uvuẹn urhie. Aye ephian ne roro taghene aye ine hwuo. Paul nọ ta rẹn aye: ‘Imizu, ọmakashe ọ ta mẹ uvuẹn emena: “Wu vwa zofẹ-ẹn, Paul. Wu ne te i Rome, kohworho kohworho rọ ha uvuẹn ọkuna na ono ji simirhọ.” Are i gbe fiudugbere! Ọwan i vwa samọ hwuo-o.’

Ogiribo na o zu te ẹdọke 14. Ọke oru, aye ni mẹrẹn otọre. E se otọre na Malta. Ọkuna na nọ ghwọghọre, ọsoso ihworho ri te 276 uvuẹn ọkuna na yi te akpa. Ọke ọkuna na ọ ghwọghọ, ihworho ezẹko ni rhẹnrhẹn te akpa, erọrọ ni mọrọn evwẹre ọkuna na te akpa. Ihworho re rhirhiẹ i Malta ni hẹrote aye, aye ni dabu koko erhanren phie harẹn aye, nẹ erinrin ọ jọ rhọ kpa aye.

Ọke ibiamo esa a nyavrẹn hin, isodja na ni ha owọ ọrọrọ kpare i Paul riẹ i Rome. Imizu na ni ya mẹriẹn ọke o te i Rome. Ọke i Paul ọ mẹrẹn imizu na, nọ kpẹmẹ i Jehova, ẹhẹn yen nọ ji gbanhon. A yẹ i Paul uphẹn no rhirhiẹ oghwa ra kwosa rhọ, rhẹ isodja rọ nọ rhọ dẹriẹ. Ẹgbukpe eva yo rhirhiẹ avwaye. O ghwoghwo rẹn ihworho ri mọ mẹriẹn, kpahen i Jesu ọrhẹ Uvie Osolobrugwẹ. Paul ọ ji ya ẹbe sansan vwe ikoko ri ha uvuẹn Asia Minor ọrhẹ Judea. Jehova ọ ghini ha iyẹnrẹn esiri na te ẹkwotọre sansan nyoma i Paul.