Ileta ro nẹ obẹ Ugboma Usuon na rhe

Harẹn eri vwo ẹguọlọ kpahen i Jehova ọrhẹ Ẹmro ọnẹyen, Baibol na:

Jesu ọrhọ ta, “are ine rhe urhomẹmro na, urhomẹmro na nẹ ono ru are rhiẹ emuvwiẹ.” (John 8:32) Roro kpahen oborẹ oma o ruruo ọke wa mẹrẹn urhomẹmro na vwrurhe uvuẹn i Baibol na! Ọ merhen oma dẹn taghene udabọ akpọ rọ vuọnren rhẹ efian, ana sabu yono urhomẹmro na.—2 Timothy 3:1.

Jehova ọ guọlore ne rhe urhomẹmro na. Fọkiẹ ẹguọlọ rẹ ọwan i vwo kpahen ihworho, na ta rẹn aye kpahen urhomẹmro na. Ọrẹn, o ji vwo ekwakwa erọrọ ri sekpahen ogame ra harẹn Osolobrugwẹ. O fori na vi damoma nyerẹn akpọ Ilele Kristi, nime e ni iruemru-urhi Jehova ghanghanren. Jesu ọ hunute izede ọghoghanren owu re ne ru djephia taghene e vwo ẹguọlọ kpahen Osolobrugwẹ. Ọrhọ ta: “Are i rha nyalele ekama mẹ, are ni na daji uvuẹn ẹguọlọ mẹ jerẹ oborẹ mi ji daji uvuẹn ẹguọlọ Ọsẹ na, nime, mi nyalele ekama enẹyen.”—John 15:10.

Jesu o ghini vwo ẹguọlọ kpahen Ọsẹ ye, no ji ru kemru kemru rọ ta riẹn. Arha hẹrokele i Jesu uvuẹn akpenyerẹn ọwan, Jehova ono vwo ẹguọlọ kpahen ọwan, ene ji vwo obọdẹn omamerhomẹ. Jesu nọ tare, “are i rhe rhe ekwakwa enana, oma ọnọ merhen are orhianẹ are i ruru aye.”—John 13:17.

Ame i fiẹrorhọ taghene ọbe ọnana ọnọ sa are erhumu ha urhomẹmro ri ha i Baibol na ruiruo uvuẹn akpenyerẹn are, ji rhiẹ ugbehian Osolobrugwẹ. Ame a nẹrhomo nẹ ẹguọlọ are i vwo kpahen Osolobrugwẹ nọ gbanhonrhọ, nẹ are i daji “uvuẹn ẹguọlọ Osolobrugwẹ . . . ọrhẹ arhọ ri bẹmẹdẹ rọ ha obaro na.”—Jude 21.