Ọrọmo yẹ Osolobrugwẹ?

O jiri ne rẹ ituakpọ a ha ẹga rẹn isolobrugwẹ ehworhare ọrhẹ emẹse. Ọrẹn, Baibol na ọ ta kpahen Osolobrugwẹ owu rọ “do ghwẹ isolobrugwẹ erọrọ.” (2 Chronicles 2:5) Ọrana ọrọmo? Marhẹ o ru do ghwẹ ọsoso isolobrugwẹ erọrọ rẹ ihworho a ha ẹga riẹn? Uvuẹn uyono ọnana, wu ne yono oborẹ Osolobrugwẹ ọ guọlọre wu rhe kpahiẹn.

1. Me yẹ odẹ Osolobrugwẹ, marhẹ o ru mwu ọwan ẹro taghene ọ guọlọre ne rhe yi?

Uvuẹn i Baibol na, Osolobrugwẹ o dje omayen harẹn ọwan. Nọ tare: “Mẹmẹ yi Jehova. Ọrana yẹ odẹ mẹ.” (Se Isaiah 42:5, 8.) Odẹ na “Jehova” o nẹ erhianrhian i Hebrew rhe, ro mevirhọ “Ọrọ Lẹrhẹ Ekwakwa Phia.” Jehova ọ guọlọre ne rhe odẹ ye. (Exodus 3:15) Marhẹ ọrana o ru mwu ọwan ẹro? Odẹ ye ọ homaphia uvuẹn i Baibol na uvuẹn ekete ri vrẹn 7,000!a “Osolobrugwẹ urhomẹmro ọrẹ idjuwu ọrhẹ otọrakpọ na,” yo vwo odẹ na Jehova.—Deuteronomy 4:39.

2. Me yi Baibol na ọ ta rẹn ọwan kpahen i Jehova?

Baibol na ọ tare taghene usuẹn isolobrugwẹ rẹ ituakpọ a ha ẹga riẹn, Jehova ọvo yẹ Osolobrugwẹ urhomẹmro na. Mesoriẹ? Ovwo iroro buebun. Jehova yọ mai vwo omẹgbanhon, ọye ọvo yẹ “Ọrọ Mai Rierun ọsoso akpọ na ephian.” (Se Psalm 83:18.) Ọye yẹ “Ọrọmaigbanhon,” ro mevirhọ taghene o vwo omẹgbanhon ro no ru i kemru kemru rọ guọlọre. Ọye yọ “ma ekwakwa ephian,” idjuwu na ọrhẹ ọsoso otọrakpọ na. (Revelation 4:8, 11) Ovwo ọwọrọ rọ họhọ i Jehova-a, fọkime o vwo ọtonrhọ-ọ, o nyerẹn bẹmẹdẹ.—Psalm 90:2.

3. Osolobrugwẹ ovwo edevan buebun, ọrẹn odẹ owu yo vwori

Ne wu sabu rhe ovẹnẹ rọ ha uvwre odovan ọrhẹ odẹ ohworho, kporo IVIDIO na, orho ru, are i gba kpahenrhọ onọ ọnana.

IVIDIO: O Vwo Edevan Buebun, Ọrẹn o Vwo Odẹ Owu Ọvo (0:41)

• Me yẹ ovẹnẹ rọ ha uvwre odovan na “Ọrovwori,” ọrhẹ odẹ?

Baibol na ọ tare taghene ihworho buebun a ha ẹga rẹn isolobrugwẹ ọrhẹ erivwori buebun. Se Psalm 136:1-3, orho ru, are i gba kpahenrhọ onọ ọnana:

• Ọrọmo yẹ “Osolobrugwẹ isolobrugwẹ” ọrhẹ “Ọrovwori erivwori”?

4. Jehova ọ guọlọre ne wu rhe odẹ ye, ji ha ye ruiruo

IVIDIO: Osolobrugwẹ O Vwo Odẹ?—Ekete ezẹko vwọye (3:11)

• Jehova ọ guọlọre ne rhe odẹ ye? Me wu rorori?

Jehova ọ guọlọre na ha odẹ ye ruiruo. Se Romans 10:13, orho ru, are i gba kpahenrhọ enọ enana:

• Marhẹ ọghanren te ra na ha odẹ Osolobrugwẹ ruiruo?

• Marhẹ oma o ruo, ohworho ọrhọ karorhọ odẹ ọnọ ji ha ye so?

• Marhẹ oma o ruẹ i Jehova wa rha ha odẹ ye se yi?

5. Jehova ọ guọlọre ne wu rhiẹ ugbehian yen

IVIDIO: Oborẹ mi ru Guọlọ Osolobrugwẹ Urhomẹmro na (8:18)

• Uvuẹn ividio na, marhẹ odẹ Osolobrugwẹ ri Soten o yonorin o ru hobọte yi?

Ne wu ki rhiẹ ugbehian ohworho, we rhe odẹ ye vwẹre. Se James 4:8a, orho ru, are i gba kpahenrhọ enọ enana:

• Use ọgo yi Jehova ọ rionbọ ye vwo?

• Wu rhe rhe odẹ Osolobrugwẹ ji haye ruiruo, marhẹ ono ru ha userhumu wẹn tikẹriẹ rhọ?

ME WU YONORIN?

Jehova yẹ odẹ Osolobrugwẹ urhomẹmro na. Ọ guọlọre ne rhe odẹ na, ji ha ye ruiruo neneyo a sabu tikẹriẹ.

Ẹzẹkoko

• Marhẹ i Jehova o ru vẹnẹ isolobrugwẹ erọrọ rẹ ihworho a ha ẹga riẹn?

• Mesoriẹ o fo na ha odẹ Osolobrugwẹ ruiruo?

• Me yo djerie phia taghene i Jehova ọ guọlọre ne wu tikẹriẹ?

GUỌLỌ IYẸNRẸN ERỌRỌ

Roro kpahen ekwakwa isionrin rọ lẹrheriẹ mwu ọwan ẹro taghene Osolobrugwẹ o nyerẹn.

“Osolobrugwẹ o Nyerẹn?” (Urhomu-ẹmro rọ ha uvuẹn itanẹti)

Roro kpahen oborẹ ọsoriẹ o rhiẹ emru ẹghwanren re ne vwo imwẹro taghene Osolobrugwẹ o nyerẹn.

“Ọrọmo yọ ma Osolobrugwẹ?” (Oghwa Odẹrẹ, August 1, 2014)

Yono oborẹ ọsoriẹ o fo na ha odẹ Osolobrugwẹ ruiruo, dedevwo a ghwai rhe oborẹ e ghini se yi lele ọke ahwanre-en.

“Ọrọmo yi Jehova?” (Urhomu-ẹmro rọ ha uvuẹn itanẹti)

Ọsọre arha ha odẹ ro jerẹ ọwan se Osolobrugwẹ? Se kpahen oborẹ ọsoriẹ a ta taghene o vwo odẹ owu ọvo.

“Edẹ Emwa yẹ Osolobrugwẹ o Vwori?” (Urhomu-ẹmro rọ ha uvuẹn itanẹti)