Marhẹ Ogame Ọwan Ono Ru Lẹrhẹ Oma Merhen Osolobrugwẹ?

Jerẹ oborẹ e yonorin uvuẹn uyono ọrọ vrẹnren na, orhiẹ ẹga ephian ye ruẹ oborẹ ọ lẹrhẹ oma merhen Osolobrugwẹ-ẹ. Ọrẹn, ana sabu ga Ọmemama ọwan uvuẹn izede rọ nọ lẹrhẹ oma merhiẹn. Me yẹ “aruẹ ogame [yanghene, ẹga]” rọ merhiẹn oma? (James 1:27, ekete ra djokarhọ) Roro kpahen oborẹ i Baibol na o yonorin.

1. Me ya na bọn ogame ọwan kpahen?

O fori na bọn ogame ọwan kpahen i Baibol na. Jesu nọ ta rẹn Osolobrugwẹ: “Ẹmro ọnọ urhomẹmro.” (John 17:17) Ẹga ezẹko i vwa nyalele urhomẹmro rọ ha uvuẹn Ẹmro Osolobrugwẹ, ro rhiẹ i Baibol na-a. Aye i wenirien riẹ iyono ọrhẹ irueruo ituakpọ. Ọrẹn, oma ọ vwọ merhen i Jehova kpahen ihworho re “gbe urhi Osolobrugwẹ” ghwẹ-ẹ. (Se Mark 7:9.) Omarana, arha nyalele urhebro i Baibol na, ọnọ lẹrhẹ oma merhiẹn.

2. Marhẹ ana ga i Jehova lele?

O fori na ga i Jehova ọvo, fọkime ọye yẹ Ọmemama ọwan. (Revelation 4:11) Ọnana o mevirhọ taghene ene vi vwo ẹguọlọ kpahiẹn, ga ye ọvo, ji kẹnoma rẹn ema.—Se Isaiah 42:8.

Ogame ọwan ọnọ vi ‘fon, ni Jehova o vwo ekwerhọ kpahiẹn.’ (Romans 12:1) Nọyẹ ana huvwele irhi enẹyen. Jerẹ udje, ihworho ri vwo ẹguọlọ kpahen i Jehova a nyalele irhi ọnẹyen ro sekpahen orọnmo. Aye a kẹnoma rẹn irueruo ri sọre, jerẹ itaba ọrhẹ imwu egbogbanhon ẹha, yanghene inyo ẹda vronma.a

3. Mesoriẹ o fo ne kwomakugbe awọrọ ga i Jehova?

Iyono re ruẹ kọkprughwre kọkprughwre, ọ yẹ ọwan uphẹn re “jiri Jehova . . . uvuẹn ukoko na.” (Psalm 111:1, 2) Izede owu re ruẹ ọnana, yẹ ọra so ijoro ujiri vwe Osolobrugwẹ. (Se Psalm 104:33.) Jehova ọ guọlọre ne rhe riẹ iyono ukoko fọkime o vwo ẹguọlọ kpahen ọwan, o ji rhe taghene iyono na ina ha userhumu rẹn ọwan riamerhen akpenyerẹn bẹmẹdẹ. Uvuẹn iyono ukoko, a ha urhebro rẹn awọrọ, aye a ji ha urhebro rẹn ọwan.

YONO KODO RHỌ

4. O fo na ha ema ba ogame ọwa-an

IVIDIO: Osolobrugwẹ o Kweri na Nyoma Ema ha Ẹga Riẹn? (3:26)

• Me yọ phiare ọke ihworho ezẹko ra ga Osolobrugwẹ ọke ahwanren, a damoma aye ina ga ye nyoma ema?

Ihworho ezẹko e roro taghene aye ine tikẹrẹ Osolobrugwẹ aye i rha ga ye nyoma ema. Ọrẹn, ọrana ọnọ sabu lẹrhẹ aye tikẹriẹ? Se Exodus 20:4-6 ọrhẹ Psalm 106:35, 36, orho ru, are i gba kpahenrhọ enọ enana:

• Aruẹ ema ego ye wu mẹrẹn ne rẹ ihworho a ha ruiruo uvuẹn ogame aye?

• Marhẹ oma o ru i Jehova kpahen ema rẹ ihworho a ha ruiruo?

• Marhẹ oma o ruo kpahen ema rẹ ihworho a ha ruiruo?

5. Arha ga i Jehova ọvo, ono simi ọwan nẹ iyono efian

IVIDIO: Urhomẹmro na ọ Yẹre mẹ Ugbomọphẹ (5:16)

Se Psalm 91:14, orho ru, are i gba kpahenrhọ onọ ọnana:

• Me yi Jehova o veri taghene ono ru harẹn ọwan, erhe djephia taghene e vwo ẹguọlọ kpahiẹn nyoma ra na ga ye ọvo?

6. Ọwan a ga Osolobrugwẹ uvuẹn iyono ukoko

Ọwan e jiri Jehova, ji ha urhebro rẹn awọrọ nyoma ijoro ẹsuọ ọrhẹ ẹkpahenrhọ ra haphia uvuẹn iyono ukoko. Se Psalm 22:22, orho ru, are i gba kpahenrhọ enọ enana:

• Wa riamerhen ẹkpahenrhọ ra haphia uvuẹn iyono ukoko?

• Wu guọlọ mwuegbe ne wu sabu ha ẹkpahenrhọ phia?

7. Oma ọmerhen i Jehova ọke ra ta rẹn awọrọ kpahen oborẹ e yonorin

Ovwo izede buebun wu na sabu ta rẹn awọrọ kpahen irhomẹmro ri ha uvuẹn i Baibol na. Se Psalms 9:1 ọrhẹ 34:1, orho ru, are i gba kpahenrhọ onọ ọnana:

• Me yẹ emru owu wu yonorin uvuẹn i Baibol na wu guọlọ ta rẹn awọrọ kpahen?

ME WU YONORIN?

Ọwan a lẹrhẹ oma merhen Ọmemama ọwan ọke a ha ẹga riẹn, jirie uvuẹn iyono ukoko, jeghwai ta rẹn awọrọ kpahen oborẹ e yonorin.

Ẹzẹkoko

• Bọgo yẹ Osolobrugwẹ ọ ta rẹn ọwan oborẹ ana ga ye lele?

• Mesoriẹ ana ga i Jehova ọvo?

• Mesoriẹ ene kwomakugbe awọrọ re ruẹ oborẹ ọmerhen Osolobrugwẹ oma ha ẹga riẹn?

GUỌLỌ IYẸNRẸN ERỌRỌ

Uvuẹn iyẹnrẹn na “Mẹmẹ Rhẹ Ọvrẹn Harẹn Ema Ghwomara-an,” se kpahen oborẹ ọmase owu o ru tiobọnu emẹgọ.

“Baibol Na O Wene Akpenyerẹn” (Oghwa Odẹrẹ, July 1, 2011)

Yono kpahen oborẹ ọnọ ha userhumu wẹn kpahenrhọ enọ uvuẹn iyono ukoko.

“Jiri Jehova Uvuẹn Ukoko na” (Oghwa Odẹrẹ, January 2019)

Ni oborẹ idama owu o ru mẹrẹn erere nẹ iyono ukoko rọ nyaren, dedevwo ọ lọhọ riẹn ọke ukaro-o.

Jehova ọ Hẹrote mẹ (3:07)

Ihworho buebun i vwo imwẹro na taghene Ilele Kristi ya ha agbagba ruiruo, ọrẹn, o fori na ha ye ruiruo uvuẹn ogame ọwan?

“Mesoriẹ Iseri Jehova a Vwa ha Agbagba Ruiruo Uvuẹn Ogame Aye?” (Urhomu-ẹmro rọ ha uvuẹn itanẹti)