UYONO 51
Marhẹ Wu Ne Ru Sabu Lẹrhẹ Oma Merhen i Jehova Nyoma Oborẹ Wa Tẹmro Rẹn Awọrọ Lele?
Ọke i Jehova ọ ma ọwan, nọ yẹrẹ ọwan ẹghẹlẹ ọghoghanren owu, nọyẹ omẹgbanhon ra tẹmro. Ọ damerhọ oborẹ ọwan a ha ẹghẹlẹ ọnana ruiruo lele? Ọ damerhọ dẹn! (Se James 1:26.) Omarana, marhẹ ene ru sabu ha omẹgbanhon ra tẹmro ruiruo izede rọ nọ lẹrhẹ oma merhen i Jehova?
1. Marhẹ ene ru ha ẹghẹlẹ ẹmro ẹta ruiruo izede ro serhọ?
Baibol na ọ ta rẹn ọwan na “rha ha urhebro rẹn owuowọnwan, jeghwai bọn owuowọnwan gbanhan.” (1 Thessalonians 5:11) Wu na sabu roro kpahen ihworho ezẹko ri guọlọ urhebro? Me wu na sabu ru nẹ ẹhẹn aye o totọre? Jẹ aye rhe taghene wu vwo ọdamẹ kpahen aye. Ọkezẹko, wu na sabu ta rẹn aye kpahen oborẹ aye e ruẹ rọ mai jo. Wu na sabu roro kpahen ekete i Baibol wu na sabu nyoma yen ha urhebro rẹn ohworho wu rheri? Ekete i Baibol buebun i vuọnriẹn re wu na sabu sanọ. Karorhọ taghene oborẹ wa tẹmro lele ọnọ sabu bọn awọrọ gbanhon. Omarana, damoma rha tẹmro bọrọbọrọ rhẹ uruemru esiri.—Proverbs 15:1.
2. Aruẹ ẹmro ọgo ya na vi kẹnoma riẹn?
Baibol na ọrhọ ta: “Are i vwe jenẹ orharhere ẹmro o nẹ unu are rhe-e.” (Se Ephesians 4:29.) Ọnana o mevirhọ taghene a vwa tẹmro ri vwe serhọ-ọ, yanghene tẹmro rẹn awọrọ izede rọ nọ lẹrhẹ ẹhẹn aye seriotọre-e. Habaye, ọwan ina vi kẹnoma rẹn iguengun ọrhẹ uruemru ra rhaphiẹ awọrọ.—Se Proverbs 16:28.
3. Me yọ nọ ha userhumu rẹn ọwan tẹmro izede rọ nọ bọn awọrọ gbanhon?
Ẹmro rẹ ọwan a ta, o ghwolo oborẹ ọ ghini ha uvuẹn ọmudu ọrhẹ iroro ọwan phia. (Luke 6:45) Omarana, o fori ne yono oma ọwan na tẹnrovi ekwakwa ri rhomurun, nọyẹ ekwakwa ri rhiẹ ọsoso, ri fonron, re vwo ẹguọlọ kpahen, ọrhẹ ekwakwa ra ta omamọ ẹmro kpahan. (Philippians 4:8) Na sabu tẹnrovi ekwakwa enana, ana vi ha ẹghwanren djẹ igbehian ọwan, kugbe iruẹn, ikpekporo ọrhẹ ughe re je ọwan. (Proverbs 13:20) Ọnọ ji ha userhumu rẹn ọwan dabu roro vwẹre na ki tẹmro. Roro kpahen oborẹ ẹmro enọ ina hobọte awọrọ lele. Baibol na ọrhọ ta: “Ẹmro re vwe roro te, ọ họhọ odan ọlọkọ ra ha dumu ohworho, ọrẹn ẹmro ọvwẹghwanren, ọ ha usimi phia.”—Proverbs 12:18.
YONO KODO RHỌ
Yono kpahen oborẹ wu ne ru sabu tẹmro izede rọ nọ merhen i Jehova oma, ji ha urhebro rẹn awọrọ.
4. Sun ẹmro wa ta
Ọkezẹko, arha tẹmro hin, orho ru, nọ da ọwan taghene a tariẹ. (James 3:2) Se Galatians 5:22, 23, orho ru, are i gba kpahenrhọ enọ enana:
Ego usuẹn iruemru enana yẹ wu na sabu nẹrhomo kpahen nọ ha userhumu wẹn sun ẹmro wa ta? Marhẹ iruemru enana ine ru sabu ha userhumu wẹn?
Se 1 Corinthians 15:33, orho ru, are i gba kpahenrhọ onọ ọnana:
Marhẹ igbehian ọwan kugbe iruẹn, ikpekporo ọrhẹ ughe re je ọwan, ine ru sabu hobọte oborẹ a tẹmro lele?
Me yọ nọ sabu hobọte oborẹ wa tẹmro lele?
Se Ecclesiastes 3:1, 7, orho ru, are i gba kpahenrhọ onọ ọnana:
Ọkiọgo yẹ oserhọ ne kudu, yanghene hẹrhẹ omamọ ọke ra na tẹmro?
5. Ta omamọ ẹmro kpahen awọrọ
Marhẹ ene ru sabu kẹnoma rẹn ẹmro esọsọ ra na ta rẹn awọrọ? Kporo IVIDIO na, orho ru, are i gba kpahenrhọ enọ enana.
Uvuẹn ividio na, mesoriẹ omizu ọhworhare ọnana ọ guọlọ wene oborẹ ọ tẹmro rẹn awọrọ lele?
Me yo ruru nọ sabu wene?
Se Ecclesiastes 7:16, orho ru, are i gba kpahenrhọ onọ ọnana:
Me ya na karorhọ orhianẹ a dẹrughwaroghwu ọdamuni ra na ta orharhere ẹmro kpahen awọrọ?
Se Ecclesiastes 7:21, 22, orho ru, are i gba kpahenrhọ onọ ọnana:
Marhẹ eghwẹmro enana ine ru sabu ha userhumu wẹn ja tuekwẹre, orhianẹ ohworho ọ ta orharhere ẹmro kpahuọn?
6. Dje uruemru esiri phia we rhe lele ekruon tẹmro
Jehova ọ guọlọre nẹ ọwan i lele ekrun ọwan tẹmro izede ẹguọlọ ọrhẹ uruemru esiri. Kporo IVIDIO na, orho ru, are i gba kpahenrhọ onọ ọnana.
Me yọ nọ ha userhumu wẹn dje uruemru esiri phia we rhe lele ekruon tẹmro?
Se Ephesians 4:31, 32, orho ru, are i gba kpahenrhọ onọ ọnana:
Aruẹ ẹmro ọgo yọ bọn ekrun gbanhan?
Jehova o dje kpahen oborẹ oma o rurie kpahen Ọmọyen Jesu. Se Matthew 17:5, orho ru, are i gba kpahenrhọ onọ ọnana:
Marhẹ wu ne ru sabu hẹrokele i Jehova nyoma oborẹ we lele ekruon tẹmro lele?
Guọlọ uphẹn wu ne jiri awọrọ
OBORẸ IHWORHO EZẸKO A TA: “Mia ta oborẹ ọ ha uvuẹn ẹhẹn mẹ. Oborẹ mi tare orho je awọrọ-ọ, ọrana nẹ ẹmro aye.”
Wu kwerhọ ye? Me wu rorori? Mesoriẹ?
ME WU YONORIN?
Ẹmro ovwo omẹgbanhon. O fori na dabu roro kpahen oborẹ a ta, ọke ra ta ye, ọrhẹ oborẹ ana ta ye lele.
Ẹzẹkoko
Izede ego yẹ wu ne ru sabu nyoma ẹmro enọ ha userhumu rẹn awọrọ?
Aruẹ ẹmro ego ye wu guọlọ kẹnoma riẹn?
Me yọ nọ ha userhumu rẹn ọwan rha tẹmro rhẹ uruemru esiri, ji rha bọn awọrọ gbanhan?
GUỌLỌ IYẸNRẸN ERỌRỌ
Me yọ nọ ha userhumu rẹn ọwan tẹmro rẹn awọrọ izede rọ nọ bọn aye gbanhon?
Yono oborẹ ọnọ ha userhumu wẹn kẹnoma rẹn uruemru ra ta orharhere ẹmro.
“Ọ Ghini sọ ne Phien Awọrọ?” (Urhomu-ẹmro rọ ha uvuẹn itanẹti)
Ni oborẹ wu ne ru sabu vabọ ufi ra tẹmro ri vwe serhọ kpahen awọrọ.
Guọlọ otọre oborẹ i Jehova o ru ha userhumu rẹn ọhworhare owu tiobọnu uruemru rọ ta orharhere ẹmro.
“Ni Mie Roro Kpahen Oborẹ Akpọ mẹ Ono Rhirhiẹ Obaro na” (Oghwa Odẹrẹ, August 1, 2013)