Mesoriẹ Emẹse Ina Homariotọre Rẹn Urhomu Ekrun?
“Urhomu harẹn ọmase ọyẹ ọhworhare.”—1 COR.11:3.
1, 2. (a) Me yẹ ọnyikọ Paul ọ ya kpahen ẹkwaphiẹrhotọre i Jehova kpahen urhomu ekrun ọrhẹ ọra homariotọre? (b) Enọ ego ya na kpahenrhọ uvuẹn urhomẹmro ọnana?
JEHOVA yọ ha ẹkwaphiẹrhotọre rẹ ọnyikọ Paul ọ ta kpahen mwu taghene, “urhomu harẹn ehworhare ephian yi Kristi,” habaye “urhomu harẹn i Kristi ne rha Osolobrugwẹ.” (1 Cor. 11:3) Uvuẹn urhomẹmro rọ vrẹnren, e yonorin taghene oma ọmerhen i Jesu rọ homariotọre rẹn Urhomie ro rhie Jehova Osolobrugwẹ, e ji yono taghene Kristi yẹ urhomu rẹn Ilele Kristi ehworhare. Kristi o vwo uruemru esiri, uruemru dẹndẹn, arodọmẹ, ọrhẹ uruemru ra ha edamẹ awọrọ karo. O ji fo nẹ ehworhare uvuẹn ukoko na i dje aruẹ iruemru enana rẹn awọrọ, maido rẹn ene aye.
2 Ọrẹn, nẹ emẹse vwo? Ọrọmo yẹ urhomu harẹn aye? Paul nọ yare, “Urhomu harẹn ọmase ọyẹ ọhworhare.” Ukẹro ọgo yo fori nẹ emẹse i ha nẹ ẹmro i Baibol ọnana? Uruemru-urhi ọnana o ji sekpahen emẹse rẹ esa aye i vwa ga Jehova? Ọnana no mevirhọ taghene ọmase na ọ sabu ta oborẹ ọ ha ẹhẹn yen, orhianẹ aye a guọlọ brorhiẹn? Me yẹ ane ono ruo nẹ esa ye ọ ha ujiri riẹn?
“Mi na ma Ohworho rọ nọ ha Userhumu Riẹn”
3, 4. Mesoriẹ ẹkwaphiẹrhotọre urhomu ekrun uvuẹn orọnmo o rhomu?
3 Osolobrugwẹ yo brorhiẹn ohworho ro no riẹ urhomu ekrun. Ọke a ma Adam hin, Jehova Osolobrugwẹ nọ tare: “O fo nẹ ọhworhare na ọvo rhirhiẹ ye kologho-o. Mi na ma ohworho rọ nọ ha userhumu riẹn, nọ lẹrhiẹ gba.” Oma ọ merhẹn Adam ọke ra ma Eve hin, nọ tare: “Ọnana usuaso ọrhẹ uhwen mẹ.” (Gen. 2:18-24) Adam ọrhẹ Eve i vwo uphẹn rẹ aye ine rhiẹ ọsẹ ọrhẹ izu rẹn ituakpọ ephian ri gbare, ri ne rhirhiẹ i paradais bẹmẹdẹ rhẹ omamerhomẹ.
4 Fọkime Adam ọrhẹ Eve a huvwele Osolobrugwẹ-ẹ, aye ni kpare uphẹn rẹ aye ine rhirhiẹ ogba Eden bẹmẹdẹ fughwẹ. (Se Romans 5:12.) Ọrẹn, Osolobrugwẹ o ji nie taghene ọhworhare na yẹ urhomu rẹn ekrun na. Eri rọnmọ ne i rha nyalele ẹkwaphiẹrhotọre ọnana, aye ina mẹrẹn erere ọrhẹ omamerhomẹ. Omamerhomẹ aye ọnọ họhọ ọrẹ i Jesu ọ mẹrẹnren, ọke rọ homariotọre rẹn i Jehova ro rhiẹ Urhomu riẹn. Ọke i Jesu ọ ha otọrakpọ na, ọ ‘ghọghọre obaro i [Jehova] ọke ephian.’ (Prov. 8:30) Rẹ rhiẹ ihworho ri vwa gba na, ehworhare i vwa rha sabu rhiẹ urhomu ekrun ri gbare-e, emẹse i vwa ji sabu homariotọre izede ọgbagba-a. Ọrẹn, esa ọrhẹ ane i rha damoma ruẹ ekete omẹgbanhon aye o teri, orọnmo aye ọnọ ji rhua omamerhomẹ ọduado rhe.
5. Mesoriẹ o fo nẹ eri rọnmọ ne i ha ẹmro rọ ha Romans 12:10 ruiruo?
5 Nẹ eri rọnmọ ne i sabu mẹrẹn omamerhomẹ, o fori nẹ aye i ha urhebro rọ ha uvuẹn i Baibol na ruiruo, rọ tare: “Are i dje ẹguọlọ okokodo rẹn owuowọnwan. Are i kobaro ọghọ e djephia rẹn owuowọnwan.” (Rom. 12:10) Habaye, o fori nẹ esa ọrhẹ ane i wian gbanhon nẹ ‘aye i dje uruemru esiri phia harẹn owuowọnwan, nẹ aye i rhe dje arodọmẹ phia, ji harhomu owuowọnwan nẹ ẹhẹn rhe.’—Eph. 4:32.
Orhianẹ Ohworho wa Rọnmọ o Rhiẹ Olele Kristi-i
6, 7. Me yọ nọ sabu nerhumie rhe, orhianẹ ane ọ homariotọre rẹn esa ye rọ vwọ ga Jehova?
6 Me wu ne ruo orhianẹ ohworho wa rọnmọ ọ vwo ga i Jehova-a? Ọgbọ buebun, esa na yọ vwo ga i Jehova. Me yẹ ane na ono ruo uvuẹn aruẹ erhirhiẹ ọnana? Oborẹ i Baibol na ọ tare: “Omaran ọ ji havwọ, ene, are i homariotọre rẹn esa are, neneyo orhianẹ aye i vwa huvwele ẹmro na-a, aye ina sabu ghwẹriẹ nyoma uruemru ane aye, fọkime aye i rhiẹromẹrẹn omamọ uruemru ọrhẹ ọghọ okokodo are.”—1 Pet. 3:1, 2.
7 Baibol na ọ tare taghene emẹse i dje uruemru omeriotọre rẹn esa aye rọ vwọ ga i Jehova. Omamọ uruemru ọmase na, ọnọ sabu hobọte uruemru esa ye. Ọnana nọ nọ sabu lẹrhẹ esa na vwo omwemẹ ro no yono i Baibol na jeghwai rhiẹ odibo i Jehova.
8, 9. Me yẹ ane ro rhiẹ Olele Kristi ono ruo orhianẹ esa ye rọ vwọ ga Jehova, o vwo ni omamọ uruemru ro vwori fiemru-u?
8 Orhianẹ esa na o kwe ghwẹriẹ ma ga i Jehova vwo? Baibol na ọ ha urhebro rẹn imizu emẹse taghene aye i dje omamọ uruemru phia ọke ephian, dedevwo ọ lọhọ-ọ. Jerẹ udje, 1 Corinthians 13:4 ọ tare taghene: “Ẹguọlọ o vwo erhionrin.” Ane ro rhiẹ Olele Kristi, ono rho dje ‘omeriotọre, uruemru dẹndẹn, ọrhẹ erhionrin’ phia, ji rha harhomu owuowọnwan ọrẹ ẹguọlọ. (Eph. 4:2) Orhianẹ erhirhiẹ na ọ gbanhonron dede, nyoma userhumu ẹhẹn ọfuanfon Osolobrugwẹ, ane na ọnọ sabu dje iruemru enana phia.
9 Ọnyikọ Paul nọ yare, “Mi vwo omẹgbanhon mie ru ekwakwa ephian nyoma ohworho rọ yẹre mẹ omẹgbanhon.” (Phil. 4:13) Ẹhẹn ọfuanfon Osolobrugwẹ ọ ha userhumu rẹn eri rọnmọ ne ri rhiẹ Ilele Kristi nẹ aye i sabu ru oborẹ o serhọ. Jerẹ udje, orhianẹ ohworho wa rọnmọ no ru ruo sọ, wu na sabu vwo ẹhẹn wu ne ruie kele. Ọrẹn, Baibol na ọ ta rẹn Ilele Kristi ephian taghene: “Are i vwa ha ọdandan kwosa ọdandan rẹn ohworho owuorowu-u. . . . Fọkime a yariẹ rhotọre: ‘Orukele ọnẹmẹ; mi na kwosa, omaran i Jehova ọ tare.’ ” (Rom. 12:17-19) Habaye 1 Thessalonians 5:15 nọ ji ha urhebro rẹn ọwan: “Are i rha damoma neneyo ohworho owuorowu ọ jọ rhọ ha ọdandan kwosa ọdandan rẹn owuorọwan, ọrẹn are i rhe ruẹ oborẹ orhomurun rẹn owuowọnwan ọrhẹ awọrọ.” Nyoma userhumu ẹhẹn ọfuanfon i Jehova, ana sabu vwo omẹgbanhon re ne ru oborẹ e vwe fiẹrorhọ. Ọnana yẹ ọsoriẹ o fo na rẹ Osolobrugwẹ nọ sa ọwan erhumu nyoma ẹhẹn ọfuanfon ọnẹyen!
10. Marhẹ i Jesu ọ kpahenrhọ ẹmro ọrhẹ uruemru gbalogbalo awọrọ?
10 Jesu o dje omamọ udje rhotọre ọke ihworho e ruie gbalogbalo. 1 Peter 2:23 nọ tare, “Ọke re phien yi, o phien aye kele-e. Ọke rọ rioja, ọ djofẹn mwu aye-e, ọrẹn nọ homariotọre harẹn Ohworho ro rhiẹ oguẹnzọn ọvwata na.” Jena hẹrokele udje ọnẹyen. Wu vwa tuekwẹre kpahen orharhere uruemru awọrọ e dje phia-a. Ọrẹn, jenẹ Ilele Kristi ephian i dje iruemru enana phia, ‘ẹguọlọ okokodo ọrhẹ omeriotọre. Are i vwa ha ọdandan kwosa ọdanda-an, yanghene ha aruehinmo kwosa aruehinmo-o.’—1 Pet. 3:8, 9.
Ane Ọnọ Sabu ha Irorẹdjẹ Phia?
11. Aruẹ uphẹn ego yẹ imizu emẹse ezẹko i vwori?
11 Nime ane ono dje uruemru omeriotọre rẹn esa ye, ọnana no mevirhọ taghene o vwo uphẹn rọ nọ tẹmro uvuẹn ekrun na yanghene ha irorẹdjẹ phia-a? Ẹjo. Jehova ọ yẹ emẹse ọrhẹ ehworhare uphẹn buebun. Roro kpahen uphẹn ọduado ri Jehova ọ yẹ awan 144,000 ri ne lele Jesu suon ẹrhẹ irodje ọrhẹ irherẹn obẹ odjuwu, ọke i Jesu ono suẹn otọrakpọ na! Emẹse i ji ha usuẹn aye. (Gal. 3:26-29) Owian ọghoghanren ọnana ri Jehova ọ yẹ emẹse, o djephia taghene o vwo ọdamẹ kpahen aye.
12, 13. Dje udje ro djephia taghene emẹse i ji mẹraro.
12 Jerẹ udje, uvuẹn ọke ahwanren, emẹse i ji mẹraro. Joel 2:28, 29 nọ tare: “Mi ne rhie ẹhẹn ọfuanfon mẹ ghwu aruẹ ihworho ephian, emọ ehworhare ọrhẹ emọ egbọtọ are ni na mẹraro. . . . Mi na tobọ ji rhie ẹhẹn ọfuanfon mẹ ghwu evrẹn ehworhare ọrhẹ erẹ emẹse mi vwori uvuẹn ẹdẹ erana.”
13 Emẹse ọrhẹ ehworhare ezẹko ri rhiẹ idibo i Jesu ri te awan 120 yi kokori uvuẹn obuvun rọ ha uvuẹn i Jerusalem ọke Pentecost 33 C.E. Ẹhẹn ọfuanfon Osolobrugwẹ no ruẹ oma aye ephian. Peter nọ sabu ta kpahen oborẹ ọmẹraro Joel ọ ta kpahen ehworhare ọrhẹ emẹse enana. Peter nọ tare: “Ọnana yẹ oborẹ a nyoma ọmẹraro Joel ta: ‘Uvuẹn ẹdẹ ri koba na,’ omaran Osolobrugwẹ ọ tare, ‘Mi ne rhie usuẹn ẹhẹn ọfuanfon mẹ ghwu aruẹ ihworho ephian, emọ ehworhare are ọrhẹ emọ egbọtọ are ni na mẹraro . . . ; mi ne ji rhie ezẹko usuẹn ẹhẹn mẹ ghwu evrẹn ehworhare mẹ ọrhẹ emẹse uvuẹn ẹdẹ erana, aye ni na mẹraro.’”—Acts 2:16-18.
14. Ewian ego yẹ emẹse i vwobọrhọ uvuẹn ọke Ilele Kristi erukaro na?
14 Uvuẹn ọke Ilele Kristi erukaro na, owian emẹse i wianren o toroba oborẹ ọ lẹrhẹ iyẹnrẹn esiri na kerabọ. Aye i ghwoghwo kpahen Uvie Osolobrugwẹ ji ha userhumu phia izede sansan. (Luke 8:1-3) Jerẹ udje, ọnyikọ Paul o se Phoebe “omizu ọmase ọrhẹ oghwoghwẹmro rọ ha ukoko i Cenchreae.” Ọke i Paul ọ ha ẹmroma vwe imizu ukoko na, nọ hunute edẹ imizu emẹse enana ri fuevwan, edẹ aye yẹ “Tryphaena ọrhẹ Tryphosa, aye emẹse ra wian gbanhan uvuẹn Ọrovwori na.” Nọ ji habaye ‘Persis rẹ ame i vwo ẹguọlọ kpahen, ọ wian gbangbanhon uvuẹn Ọrovwori na.’—Rom. 16:1, 12.
15. Ewian ego yẹ emẹse a wian uvuẹn ọke ọwan na?
15 Uvuẹn ọke ọwan na, imizu emẹse buebun ri ha ẹgbukpe sansan ye ghwoghwo kpahen Uvie Osolobrugwẹ uvuẹn ekete akpọ na o keri te. (Matt. 24:14) Ezẹko usuẹn aye a ga ẹrhẹ ekobaro ọke ephian, imishọnari, ọrhẹ uvuẹn Oghọn Ukoko. Ọbo ijoro David nọ soro: “Jehova yọ tariẹ; emẹse re ghwoghwo iyẹnrẹn esiri na i bunrun omamọ.” (Ps. 68:11) Ọnana ghini urhomẹmro! Jehova ọ ha ukẹro ọghoghanren ni ewian emẹse a wian, rẹ aye e vwobọrhọ owian aghwoghwo Uvie na, jeghwai ruẹ ọhọre ọnẹyen. Nime a tare taghene emẹse Ilele Kristi i dje uruemru omeriotọre phia, orho mevirhọ taghene aye i sabu tẹmro-o.
Emẹse Awanva ri Tẹmro Phia
16, 17. Marhẹ udje Sarah o ru dje phia taghene o fori nẹ ene i tẹmro phia uvuẹn orọnmo aye?
16 Jehova ọrhọ sabu tiobọnu ewian rẹn emẹse, orho fo nẹ esa i lele ene aye djiroro kugbe ọke aye arha guọlọ brorhiẹn eghoghanren? O fori nẹ aye i ru omaran. Baibol na ọ ta kpahen emẹse ezẹko ri tẹmro phia, dedevwo esa aye a nekpẹn userhumu mie aye-e. Roro kpahen erhirhiẹ eva.
17 Sarah ro rhiẹ ane Abraham, nọ ta rẹn esa ye no le ophruphẹn yen re se Hagar kugbe ọmọ yen nẹ oghwa na, nime aye i vwe dje ọghọ phia-a. ‘Oborẹ ọ ta rẹn Abraham nọ lẹrhẹ evwan biomie,’ ọrẹn Osolobrugwẹ o kwerhọ ye. Jehova nọ ta rẹn Abraham: “Wu vwe biomevwan fọkiẹ oborẹ i Sarah ọ ta wẹn kpahen ọmọ na ọrhẹ ọvrẹn ọgbọtọ ọnọ na-a. Huvwele yi.” (Gen. 21:8-12) Abraham nọ ha uvwele i Jehova, nyoma rọ kerhọ aniẹ Sarah, ji ru lele oborẹ ọ ta riẹn.
18. Udjoghwẹ ọgo yẹ Abigail ọ kparare?
18 Roro kpahen udje Abigail ro rhiẹ ane i Nabal. Ọke i David ọ zẹ fọkiẹ Orodje Saul, David nọ fan ọko kẹrẹ ekete isurhe i Nabal i havwọ. Ukperẹ i David ọnọ ha enyerẹn ọdafe ọnana, ọye ọrhẹ ihworho re lelie ni sẹrorẹ aye. Ọrẹn, Nabal “o ruẹ gbalogbalo o ji ruẹ oborẹ ọsọre,” habaye ‘no phien’ ihworho ri David o dje rhe na. Ọye “orharhere” ọhworhare, o “vwo ọhọ-ọ.” Ọrẹn, ọke ihworho i David a nekpẹn userhumu mie Nabal izede ọghọ, nọ tenren. Marhẹ Abigail ọ kpahenrhọ ye lele ọke o rhon kpahen oborẹ ọ phiare? Abigail no ruẹ oborẹ oserhọ, uvuẹn oberhumu i Nabal no “brokpakpa ha ikoli ibrẹdi 200, eriẹ enyo eduado eva, igegede ra bọnrẹn ẹtuẹn aye ne, ovwanvwọn i seah isionrin ọrẹ ọka ra tọn ne, ikara i raisin 100, ọrhẹ ikara i fig 200 ra dabu min” nọ harẹ aye rẹn David ọrhẹ ihworho yi. Abigail o ruẹ oborẹ ọgbare? Baibol na nọ tare taghene “Jehova no kpe i Nabal hwu.” Ọke oru David nọ rọnmọ Abigail.—1 Sam. 25:3, 14-19, 23-25, 38-42.
‘Ọmase ra ha Ujiri Riẹn’
19, 20. Me yọ nọ sabu lẹrhẹ ọmase mwuovwan ujiri?
19 Baibol na ọ ha ujiri rẹn ane ro ruẹ ekwakwa lele izede i Jehova. Ọbe i Proverbs o se aruẹ ọmase ọrana “omamọ ane,” nọ tare: “Ọghanronmẹ ye ọ vrẹn ikora dibridibri. Esa ye ọ hẹrosuiẹ nẹ ọmudu ọnẹyen sa, ekwakwa eghoghanren i vwa kanriẹ-ẹn. Uvuẹn ọsoso akpọ ọnẹyen, ọmase na ọ ha oborẹ orhomurun kwosa riẹn, orhiẹ oborẹ obiomuru-un.” Habaye, “ẹmro ẹghwanren ye nẹ unuie sa; Urhi ọrẹ uruemru esiri ọ ha uvuẹn ẹrẹnmo ọnẹyen. Ọ hẹrote owian oghwa ọnẹyen, ọ vwọ riẹ emaren ọvwiẹlẹ-ẹ. Emọyen a rhọmọ, aye ne jirie; esa ye ọ rhọmọ, no jirie.”—Prov. 31:10-12, 26-28.
20 Me yọ nọ sabu lẹrhẹ ọmase mwuovwan ujiri? Proverbs 31:30 nọ tare, “Osẹme ọnọ sabu se fa, erhumu ọnọ sabu rhiẹ emru kpekpa, ọrẹn ene jiri ọmase ro vwo ofẹnzẹ i Jehova.” Ọmase ro vwo ofẹnzẹ i Jehova o rhẹ oborẹ ọghanren te rọ nọ homariotọre rẹn ihworho ri rhiẹ urhomu uvuẹn ekrun ọrhẹ uvuẹn ukoko na. “Urhomu harẹn ọmase ọyẹ ọhworhare,” jerẹ oborẹ “urhomu harẹn ehworhare ephian yi Kristi,” habaye “urhomu harẹn i Kristi ne rha Osolobrugwẹ.”—1 Cor. 11:3.
Dje Ọdaremẹro Phia Kpahen Ẹghẹlẹ Osolobrugwẹ
21, 22. (a) Iroro ego yi na lẹrhẹ Ilele Kristi ri rọnmọ ne, dje ọdamẹ kpahen ẹghẹlẹ orọnmo ri Jehova o tiobọnu rẹn aye? (b) Mesoriẹ o fo ne dje ọghọ phia rẹn ihworho re suẹn kugbe ihworho ri Jehova ọ ha mwu ni rhiẹ urhomu? (Se ekpeti rọ ha aruọbe 17.)
21 O vwo ekwakwa buebun ri soriẹ o fo nẹ Ilele Kristi ri rọnmọ ne i ha ujiri vwe Osolobrugwẹ! O fori nẹ esa ọrhẹ ane i rha wian kugbe ọke ephian. Ọnana ọnọ yẹ aye uphẹn rẹ aye ina sabu ga Jehova vuọnvuọn. (Ruth 1:9; Mic. 6:8) Nime Jehova yọ ha orọnmo mwu, o rhe oborẹ eri rọnmọ ne ine ruo nẹ oma ọ sabu merhen aye. Rhe ruẹ oborẹ i Jehova ọ guọlọre ọke ephian, ‘aghọghọ i Jehova no no rhiẹ omẹgbanhuọn,’ tobọ te uvuẹn akpọ ọnana ro vwo ebẹnbẹn.—Neh. 8:10.
22 Esa ro rhiẹ Olele Kristi ro ji vwo ẹguọlọ kpahen aniẹ, ono rho dje uruemru esiri ọrhẹ ẹguọlọ rẹn ekrun ọnẹyen. Ọnana nọ nọ lẹrhẹ aniẹ vwo ẹguọlọ kpahiẹn, ane na nọ nọ ji hobọtua ye ji dje ọghọ okokodo phia riẹn. Ọrọ mai ghanren, orọnmo aye nọ nọ ha ujiri vwe i Jehova Osolobrugwẹ.
Wu Ji Karorhọ?
• Ẹkwaphiẹrhotọre ọgo yi Jehova o ha mwu sekpahen ọro no rhiẹ urhomu?
• Mesoriẹ o fo nẹ eri rọnmọ ne i dje ọghọ phia rẹn owuowọnwan?
• Marhẹ ane ro rhiẹ Olele Kristi ono lele esa ye ro vwo rhiẹ Olele Kristi nyerẹn?
• Mesoriẹ o fo nẹ esa i lele ene aye tẹmro ọke aye a guọlọ brorhiẹn eghoghanren?
[Ekpeti]
Mesoriẹ o fo na Họghọ Rẹn Ihworho re Suẹn?
Jehova yo brorhiẹn kpahen aruẹ ihworho ri ne suon ọrhẹ oborẹ aye ine sun lele. O ruẹ ẹkwaphiẹrhotọre ọnana fọkiẹ erhumu ituakpọ ọrhẹ emakashe. Ọnana ọnọ yẹ aye ugbomọphẹ rẹ aya ha ujiri vwe i Jehova ji ga ye ọrẹ okugbe.—Ps. 133:1.
Ilele Kristi ra djẹha ne e mwuọghọ rẹn usuon i Jesu Kristi. (Eph. 1:22, 23) Nime Jesu o mwu ọghọ rẹn suon i Jehova, “Ọmọ na nọ nọ ha omayen riotọre rẹn Ohworho rọ ha i kemru kemru riẹn na, neneyo Osolobrugwẹ o rhiẹ kemru kemru rẹn ihworho ephian.” (1 Cor. 15:27, 28) Omarana, no fori nẹ ọsoso ihworho ra ga i Jehova, i dje ọghọ phia rẹn ihworho ri Jehova ọ ha mwu uvuẹn ekrun ọrhẹ uvuẹn ukoko na! (1 Cor. 11:3; Heb. 13:17) Erhe ruẹ ekwakwa enana, Jehova ọnọ ha ebrurhọ rẹn ọwan.—Isa. 48:17.
[Ifoto]
Ẹrhomo ẹnẹ ọnọ sabu ha userhumu rẹn ọmase ro rhiẹ Olele Kristi dje uruemru ọ ga Osolobrugwẹ phia
[Ifoto]
Jehova o vwo ọdaremẹro kpahen owian emẹse a wian, neneyo owian Uvie na ọ sabu riarorhọ