Ifoto Yanghene Ughe Ihworho ri Banfirhọ—Ọ Suẹ Ẹkuọn Gbinẹ ọ Vwọ Suẹ Ẹkuọ-ọn?

Akpọ na inyenana ọ vuọnren rhẹ ifoto ọrhẹ ughe ihworho ri banfirhọ.a Ana sabu mẹrẹn aye uvuẹn ẹbe re jiri eheri ọrhẹ osẹme, ughe, ikpekporo, ọrhẹ imagazini sansan, ana ji sabu mẹrẹn aye uvuẹn ekpetughe, ividio gemu, ifonu ọwan, ana ji sabu dje yi vwe ọwan nyoma itanẹti. Uruemru re ni ifoto yanghene ughe ihworho ri banfirhọ o titiri omamọ inyenana. Nime ifoto yanghene ughe ihworho ri banfirhọ ọ vuọnriẹn inyenana, ihworho buebun na ghwọghọ ọke ni aye vrẹn ọke bi.—Se ekpeti na “Urhomẹmro Kpahen Ifoto Yanghene Ughe Ihworho ri Banfirhọ.”

Oborẹ ọ homaphia lele o wene ọke ephian. Ọgba irherhe re se Gail Dines ọrhọ ya: “Ifoto ri havwiẹ inyenana i biomurun te erhirhiẹ taghene, ihworho i vwe rhe ni aye fiemru ghwomara-an.”

Ukẹro ọgo wa ha ni aye? Re ni ifoto yanghene ughe ihworho ri banfirhọ, ọ suẹ ẹkuọn gbinẹ ọ vwọ suẹ ẹkuọ-ọn? Jesu ọrhọ ta: “Orhan ro rhomurun ọ mọ omamọ emamọ, ọrẹn orharhere orhan ọ mọ erharhere emamọ.” (Matthew 7:17) Ẹkuọn ọgo yẹ ifoto yanghene ughe ihworho ri banfirhọ ọ rhua sa? Na sabu mẹrẹn ẹkpahenrhọ na, jene roro kpahen enọ ezẹko.

Marhẹ ifoto yanghene ughe ihworho ri banfirhọ ọ hobọte ihworho lele?

OBORẸ EWENA I TARE: Ifoto yanghene ughe ihworho ri banfirhọ ọ rienrian ihworho ezẹko oma omamọ, a tobọ haye dje imwu egbogbanhon ẹha.

Brian,b ro vwo uruemru re ni ifoto yanghene ughe ihworho ri banfirhọ nọ tare: “Emru owuorowu ọ vwọ lẹrhe mẹ dobọjẹ-ẹ. Nọ họhọre taghene mia menemena. Omamẹ no kpogho, urhomu no ji kpori mẹ. Mi damoma mi na dobọji, ọrẹn mia sabu dobọ ye ji uvwre ẹgbukpe buebu-un.”

Ihworho re vwobọrhọ uruemru ọnana e tiẹ uruemru aye nẹ. Aye a sẹrorẹ odjahen omamọ, a vwa ji hẹrosuẹ aye-e. Itiọrurhomẹmro, ihworho buebun a rioja erhirhiẹ kologho, ofa, ọfiamu, ẹhẹn ro seriotọre, ọrhẹ ekwẹre ọgbogbanhon. Uvuẹn erhirhiẹ ezẹko, aye a tobọ vwo iroro aye ine kpe oma aye. Serge ro fiẹ ifoto ọrhẹ ughe ihworho ri banfirhọ rhẹ ifonuie nọ tare taghene, “Omamẹ ọvo mie roro kpahan ọke ephian. Ni mie ni omamẹ sakamu, mi ji havwiẹ kologho. Ofa ọrhẹ ofẹn ọ vwọ rhọ lẹrhe mẹ nekpẹn userhumu-u.”

Arha tobọ mẹrẹn ifoto yanghene ughe ihworho ri banfirhọ kpregede, ọnọ sabu hobọte ọwan izede ro biomurun. Ọke ume re se U.S. Senate a nọ Dr. Judith Reisman kpahen ifoto yanghene ughe ihworho ri banfirhọ, nọ tare: “Ifoto yanghene ughe ihworho ri banfirhọ ọ ghwọghọ aphẹrhiẹn na, ọrhọ tobọ homaphia kpregede, ọ bẹn ra sabu tie nẹ iroro ọwan.” Susan rọ ha ẹgbukpe 19, ro riẹ iwẹbsaiti re jiri ifoto yanghene ughe ihworho ri banfirhọ, nọ tare: “Ifoto na a dajẹ uvuẹn ẹhẹn mẹ. Aye a homaphia kpregede. Nọ họhọre taghene mi sabu tiẹ aye nẹ ẹhẹn mẹ-ẹ.”

OBORẸ Ọ MAI GHANREN: Ifoto yanghene ughe ihworho ri banfirhọ, ọ lẹrhẹ ohworho rhiẹ ọvrẹn rẹn ojemẹ yen.—2 Peter 2:19.

Marhẹ uruemru re ni ifoto yanghene ughe ihworho ri banfirhọ ọ hobọte ekrun lele?

OBORẸ EWENA I TARE: “Orọnmo ọrhẹ ekrun sansan a ghwọghọ fọkiẹ uruemru re ni ifoto ọrhẹ ughe ihworho ri banfirhọ.”—The Porn Trap, ri Wendy ọrhẹ Larry Maltz i yare.

Uruemru ọnana ọ ghwọghọ ekrun nyoma

• Ro jiri ọdamẹ omobọ ọvo, ọrhẹ uruemru ra kẹnoma rẹn oborẹ o rhiẹ ọdamẹ rẹn ọrẹ a rọnmọren.—Ephesians 5:28, 29.

• Rọ lẹrhẹ ohworho vwo oruru ehware ro vwo serhọ.—2 Peter 2:14.

• Rọ lẹrhẹ ihworho gba erẹ aye i rọnmọren ruẹ irueruo ehware izede ro vwo serhọ.—Ephesians 5:3, 4.

• Ro jiri uruemru re vwe dje atamwu phia kpahen ọrẹ a rọnmọren.—Matthew 5:28.

Baibol na ọ ha urhebro rẹn eri rọnmọ ne taghene aye i vwe lele erẹ aye i rọnmọren “nyerẹn gbalogbalo-o.” (Malachi 2:16) Ọwiẹghwọ ọ sabu lele fiẹ ẹhẹriẹ yanghene orọnmo ẹfan. Ọnana ọnọ sabu hobọte emọ re vwiẹ rhẹ orọnmo na.

Uruemru re ni ifoto yanghene ughe ihworho ri banfirhọ, ọnọ ji sabu ha ẹkuọn rẹn emọ na. Brian ra hunute vrẹn ne nọ tare: “Ọke mia joma te ẹgbukpe ikpe, ọke mie ruiruẹn ni mi mẹrẹn ọbe ro vwo ifoto eri banfirhọ rẹ Ọsẹ mẹ o nẹ. Ni mia bẹbẹ ni aye uvuẹn odjahen, mia tobọ rhe oborẹ ọ merhen mẹ oma vwọye-e. Uruemru ọnana ọ hobọte mẹ nẹ ọke ọrana tẹ ọke mie te omirẹghwa.” Iyẹnrẹn o djephia taghene uruemru re ni ifoto yanghene ughe ihworho ri banfirhọ ọnọ sabu lẹrhẹ iphuphẹn vwo orharhere oruru kpahen ehware, lele ihworho sansan djọse, vwobọrhọ irueruo ehware izede ro vwo serhọ, ọ tobọ lẹrhẹ ezẹko kpomorhuẹ dede.

OBORẸ Ọ MAI GHANREN: Re ni ifoto yanghene ughe ihworho ri banfirhọ ọ suẹ obẹnbẹn ọrhẹ omiamiamo.—Proverbs 6:27.

Me yi Baibol na ọ ta kpahen uruemru re ni ifoto yanghene ughe ihworho ri banfirhọ?

ẸMRO OSOLOBRUGWẸ NỌ TARE: “Are i gbe kpe oruru ugboma are . . . jerẹ uruemru ọfanrhiẹn, ijẹfuọn, oruru ehware ọgbogbanhon, iroro ọsọsọ, ọrhẹ ufiuvwele ro rhiẹ omẹgọ.”—Colossians 3:5.

Ọnana o djephia taghene Jehovac o vwo utuoma kpahen uruemru re ni ifoto yanghene ughe ihworho ri banfirhọ. Ọ vwọ ha ukẹro sakamu ni ehware-e. Ọ ma oruru ehware rhẹ oma ọwan nime ọ guọlọre taghene eri rọnmọ ne i riamerhiẹn, lẹrhẹ eri rọnmọ ne tikẹrẹ omomaye, jeghwai vwiẹ emọ vuọn akpọ na.—James 1:17.

Mesoriẹ o mwu ọwan ẹro taghene Jehova o vwo utuoma kpahen uruemru re ni ifoto yanghene ughe ihworho ri banfirhọ? Roro kpahen iroro enana.

• Jehova o rheri taghene uruemru re ni ifoto yanghene ughe ihworho ri banfirhọ ọ ghwọghọ akpenyerẹn ohworho.—Ephesians 4:17-19.

• O vwo ẹguọlọ kpahen ọwan, ọ ji guọlọ sẹrorẹ ọwan nẹ ẹkuọn.—Isaiah 48:17, 18.

• Jehova ọ guọlọ sẹrorẹ ekrun ọrhẹ orọnmo sansan.—Matthew 19:4-6.

• Ọ guọlọre na fon ọrẹ iroro, na ji rha họghọ rẹn odjẹ awọrọ.—1 Thessalonians 4:3-6.

• Ọ guọlọre na họghọ rẹn eghọn ugboma ọwan, jeghwai ruẹ irueruo ehware lele izede ro serhọ.—Hebrews 13:4.

• Jehova o rheri taghene uruemru re ni ifoto yanghene ughe ihworho ri banfirhọ ọ sọre, nime o jiri aruẹ ukẹro rẹ Echu ọ ha ni ehware.—Genesis 6:2; Jude 6, 7.

OBORẸ Ọ MAI GHANREN: Ifoto yanghene ughe ihworho ri banfirhọ, ọ ghwọghọ onyerẹnkugbe rẹ ohworho o vwori rhẹ Osolobrugwẹ.—Romans 1:24.

Ọrẹn, Jehova o vwo arodọmẹ okokodo kpahen eri guọlọ tiobọnẹ uruemru ọnana. Baibol na ọ tare: “Jehova o dje arodọmẹ ọrhẹ uruemru aruẹdọn phia, ọ vwọ kiki tuekwẹre-e, ọ vuọnren rhẹ ẹguọlọ atamwu. Fọkime ọye ọ dabu rhe oborẹ a maren ọwan lele, ọ karorhọ taghene ọwan eyẹn.” (Psalm 103:8, 14) Ọ ha use rẹn ihworho dẹndẹn nẹ aye i bruie rhe ji vwo “ẹghẹlẹ ọphẹ rọ nọ sa ọwan erhumu ọke ra guọliẹ.”—Hebrews 4:16; se ekpeti na “Re Tiobọnẹ Uruemru re ni Ifoto Yanghene Ughe Ihworho ri Banfirhọ.”

Ihworho buebun i rhiabọ dede userhumu i Jehova ne. Ọ sabu ha userhumu rẹn aye? Djokarhọ oborẹ i Baibol na ọ ta kpahen ọrọ sabu tiobọnẹ orharhere uruemru: “E ru rẹ are fon ne; e ru rẹ are fiotọre ne; e ru rẹ are rhiẹ evwata nyoma odẹ Ọrovwori na Jesu Kristi ọrhẹ nyoma ẹhẹn ọfuanfon ọrẹ Osolobrugwẹ ọwan ne.” (1 Corinthians 6:11) Jerẹ oborẹ ọnyikọ Paul ọ tare, aruẹ ihworho erana ina sabu ta: “Mi vwo omẹgbanhon mie ru ekwakwa ephian nyoma ohworho rọ yẹre mẹ omẹgbanhon.”—Philippians 4:13.

Susan ro tiobọnẹ uruemru na ọrhọ ta: Jehova ọvo yọ nọ sabu ha userhumu wẹn tiobọnẹ uruemru re ni ifoto yanghene ughe ihworho ri banfirhọ. Wu rha nekpẹn userhumu ọnẹyen, wu na sabu fon obaruiẹ. Ọ sẹrerhumujo-o.”