Mesoriẹ Osolobrugwẹ ọ ha Uphẹn Rẹn Ojẹriọ?

MARHẸ OMA O RUẸ OSOLOBRUGWẸ KPAHEN OJẸRIỌ ỌWAN?

Michelle: Marhẹ Sophia? Oma ọ merhenren mẹ mia mẹruọn oghwa.

Sophia: Omaran ji te omẹmẹ.

Michelle: Ọke mia rhe kperhumu, a ta kpahen oborẹ oma o ruẹ Osolobrugwẹ kpahen ojẹriọ ọwan.a Wu tare taghene ọnana yẹ oborẹ we roro kpahan ọke jijiri ne, maido ọke izuo o vwo asidẹti imoto. Ọrẹn, marhẹ oma izuo ọ havwọ vwana?

Sophia: Oma yen ọ ji dabu serhọ-ọ. Ọrẹn, o rhoma bibiesuọn ne.

Michelle: Oma ọ merhenren mẹ mie rhon ọrana. Nime uvuẹn aruẹ erhirhiẹ ọnana, ọ bẹn rẹ oma ọ merhen ohworho.

Sophia: Omaran. Ọkezẹko, mie roro kpahen oborẹ ọnọ rioja jiri te dede.

Michelle: Ihworho ephian e roro omaran. Wu rha karorhọ, ọke mia rhe kperhumu mi nọruọn onọ owu kpahen oborẹ ọsoriẹ Osolobrugwẹ ọ ha uphẹn rẹn ojẹriọ no rhirhiẹ ye, dedevwo o vwo omẹgbanhon ro no fioba rhọye.

Sophia: Omaran, mi karorhọ.

Michelle: Bọmọke ana ki guọlọ ẹkpahenrhọ onọ na uvuẹn Baibol, jene roro kpahen oborẹ a ta vrẹn ne.

Sophia: Orhoma.

Michelle: Wu rha karorhọ, e yonorin taghene ọhworhare owu ọke ahwanren ro vwo esegburhomẹmro kpahen i Jehova, ọ nọ Osolobrugwẹ oborẹ ọsoriẹ ọ ha uphẹn rẹn ojẹriọ. Ọrẹn, Osolobrugwẹ ọ tuekwẹre kpahiẹn nime ọ nọriẹn onọ-ọ, yanghene nọ ta riẹn taghene o vwo esegburhomẹmro te-e.

Sophia: Mie ji rhon ọrana bi-i.

Michelle: E ji yono ne taghene oma ọ vwọ merhen i Jehova ọke ra rioja-a. Jerẹ udje, Baibol na ọ tare taghene ọke ihworho yi a rioja, “no ji te yi oma.”b Orhiẹ oborẹ orhomurun re rhe taghene Osolobrugwẹ o vwo aruẹdọn kpahen ọwan ọke ra rioja, rhomaran?

Sophia: Ee.

Michelle: O mwurun ọwan ẹro taghene Ọmemama ọwan ọnọ sabu dobọ ojẹriọ ji uvuẹn ọke ro serhọ, nime o vwo omẹgbanhon omamọ.

Sophia: Mia ghwai vwẹruọ ọrana-a. Mesoriẹ Osolobrugwẹ ọ ha uphẹn rẹn ekwakwa ibiobiomu enana, ọrẹn o vwo omẹgbanhon rọ nọ dobọ aye ji?

ỌRỌMO YỌ TA URHOMẸMRO?

Michelle: Na sabu mẹrẹn ẹkpahenrhọ onọ ọrana, jene roro kpahen oborẹ ọ ha uvuẹn ọbe i Genesis. Wu dabu rhe ikuegbe ọrẹ Adam, Eve ọrhẹ omamọ ra ta rẹn aye taghene aye i vwa riọ na-a?

Sophia: Ee, mi yono kpahiẹn uvuẹn ishọshi. Osolobrugwẹ ọ ta rẹn aye taghene aye i vwa re nẹ orhan owu-u, ọrẹn aye ni reriẹ.

Michelle: Ọgbare dẹn. Omarana, jene roro kpahen oborẹ ọ lẹrhẹ Adam ọrhẹ Eve ruẹ ọdandan. Ọrana o surhobọmwu oborẹ ọsoriẹ ọwan a rioja inyenana. Biko wu na sabu se Genesis urhomu-ẹmro 3, oghwẹmriẹn 1 ye te 5?

Sophia: Orhoma. “Vwana, obodirin na yẹ aranmo rọ mai ghwanren usuẹn eranmo re rhirhiẹ egbo ri Jehova ọ maren. Omarana, nọ ta rẹn ọmase na: “Osolobrugwẹ ọ ghini ta taghene are i vwa re nẹ korhan korhan rọ ha uvuẹn ogba na-a?” Omarana, ọmase na nọ ta rẹn obodirin na: “Ame ina sabu riẹ emamọ ọrẹ erhan ri ha uvuẹn ogba na. Ọrẹn Osolobrugwẹ ọ ta kpahen omamọ ọrẹ orhan rọ ha uvuẹn erhẹrhẹ ogba na: ‘Are i vwa vi re nẹ uvuien rhe-e, ẹjo, are i vwa vi hobọte yi-i; orhiẹ omara-an are ine hwuo.’ ” Omarana, obodirin na nọ ta rẹn ọmase na: ‘Itiọrurhomẹmro, are i hwuẹ-ẹ. Nime Osolobrugwẹ o rheri taghene ẹdẹ are i re nẹ uvuien rhe, ikẹro are ni ne rhie, are ni na họhọ Osolobrugwẹ, are ni ne ji rhe oborẹ orhomurun ọrhẹ oborẹ obiomurun.’ ”

Michelle: Wẹ nobiruo. Jenẹ a rharhumu ni eghwẹmro na so. Ọrukaro, djokarhọ ye taghene obodirin ọ tẹmro rẹn ọmase na Eve. Ekete ọrọrọ uvuẹn i Baibol na o djerie phia taghene Echu yọ tẹmro rẹn ọmase na nyoma obodirin na.c Echu nọ nọ Eve kpahen oborẹ Osolobrugwẹ o jurhi rẹn aye kpahen orhan owu. Wu djokarhọ oborẹ Osolobrugwẹ ọ tare taghene ọnọ phia orhianẹ Adam ọrhẹ Eve i re nẹ orhan na?

Sophia: Aye ine hwuo.

Michelle: Ọgbare. Nyoma ẹmro enana, Echu nọ mọronfian baren Osolobrugwẹ. Djokarhọ oborẹ ọ tare: “Itiọrurhomẹmro, are i hwuẹ-ẹ.” Echu nọ haye ta taghene Osolobrugwẹ ọmọronfian!

Sophia: Mie ji rhon ọrana bi-i.

Michelle: Ọke Echu o se Osolobrugwẹ ọmọronfian, ẹmro owu nọ homaphia, ọnọ ha ọke jiriri na ki sabu kwaphiẹ ẹmro na rhọ. Wu mẹrẹn oborẹ ọsoriẹ ne?

Sophia: Hmm. O ji mwu mẹ ẹro-o.

Michelle: Oserhọ, ji mẹ dje yi omana. Gba haye taghene ẹdẹ owu ni mi bruruo rhe, ji ta wẹn taghene mi gbanhon ghwọ. Marhẹ wu ne ru djephia taghene mia gbanhon ghwọ-ọ?

Sophia: Ana damẹ omẹgbanhon ọwan ni.

Michelle: Dẹn. Ana sabu fi emru ọghwaghwa rhotọre, na mẹrẹn ọrọ nọ sabu kpariẹ. Ọrẹn, ọ bẹn re ne rhe ọrọ mai gbanhonma-a.

Sophia: Mi vwẹruọ ye ne.

Michelle: Ọrẹn, me wu ne ruo orhianẹ mi ta wẹn taghene wa mọronfian ukperẹ mi na ta wẹn taghene mi gbanhon ghwọ? Ẹmro eva na rhẹ owu-u.

Sophia: Ghini omaran.

Michelle: Itiọrurhomẹmro, uruemru ra ta urhomẹmro ọ vẹnẹ oborẹ ohworho o vwo omẹgbanhon te, rhomaran?

Sophia: Ee.

Michelle: Itiọrurhomẹmro, izede owu ọvo ra na sabu rhe ohworho rọ mai vwo omẹgbanhon, yẹ ọrẹ ana ha uphẹn rẹn awọrọ ra mẹrẹn ọwan nẹ aye ọvo i brorhiẹn.

Sophia: Udje na o dje ọhọ phia.

Michelle: Vwana, jenẹ a rharhumu ni iyẹnrẹn i Genesis fiotọre. Echu ọ tare taghene o vwo omẹgbanhon ghwẹ Osolobrugwẹ?

Sophia: Ẹjo.

Michelle: Orhianẹ ọ ta omaran bi, manẹ Osolobrugwẹ o kpeyi hwu ogege. Ọrẹn, Echu ọ tare taghene Osolobrugwẹ ọmọronfian. Nọ haye ta rẹn Eve taghene, ‘Ọye yọ ta urhomẹmro.’

Sophia: Mi vwẹruọ ye ne.

Michelle: Nime Osolobrugwẹ yọ mai ghwanren, o rheri taghene ọnọ ha ọke jijiri vwẹre ne ki rhe ohworho rọ ta urhomẹmro. Nyoma ọnana, ihworho ephian ni ne rhe ọrọ mọronfian ọrhẹ ọrọ ta urhomẹmro.

ẸMRO ỌGHOGHANREN OWU

Sophia: Ogege rẹ Eve o hwu hin, ọrana no djephia taghene Osolobrugwẹ yọ ta urhomẹmro.

Michelle: Ghini omaran. Ọrẹn Echu ọ ji guọlọ emru ọrọrọ. Gba rharhumu ni oghwẹmro ọrẹ 5. Wu djokarhọ emru ọrọrọ rẹ Echu ọ ta rẹn Eve?

Sophia: Ọ tare taghene ọrhọ re omamọ orhan na, ikẹruiẹ ine rhie.

Michelle: Omaran, ọ ji ta taghene ọnọ ‘họhọ Osolobrugwẹ, ji rhe oborẹ orhomurun ọrhẹ oborẹ obiomurun.’ Omarana, Echu nọ haye ta taghene Osolobrugwẹ o tiẹ emru orhorhomu nuẹ rẹn ituakpọ.

Sophia: Eyẹ?

Michelle: Ee, ọrana egbobọse ọduado omamọ.

Sophia: Me wa haye ta?

Michelle: Nyoma ọnana, Echu nọ haye ta rẹn Eve ọrhẹ ituakpọ ephian taghene, akpenyerẹn aye ono ji rhomu gbobọhiẹn usun Osolobrugwẹ. Habaye, Jehova o rheri taghene izede rọ mai rhomu ro no djephia taghene Echu ọ mọronfian, yẹ ọrẹ ọnọ yẹ ye ibiọke. Omarana, Osolobrugwẹ nọ ha uphẹn rẹn Echu no suẹn akpọ na ibiọke. Ojẹriọ nọ vuọn akpọ inyenana nime Echu yo suẹn, orhiẹ Osolobrugwẹ-ẹ.d Ọrẹn o vwo omamọ iyẹnrẹn.

Sophia: Ọrana ime?

Michelle: Baibol na o yono irhomẹmro irhorhomu eva kpahen Osolobrugwẹ. Ọrukaro, Jehova ọnọ hobọtua ọwan ọke ra rioja. Jerẹ udje, roro kpahen ẹmro Orodje David rọ ha uvuẹn Psalm 31:7. David ọ rioja omamọ uvuẹn ọke ọnẹyen, ọrẹn djokarhọ oborẹ ọ tare uvuẹn ẹrhomo ro nẹ vwe Osolobrugwẹ. Biko wu na sabu se oghwẹmro i Baibol ọrana?

Sophia: Ee. Orho se: “Mi na dabu ghọghọ fọkiẹ ẹguọlọ atamwu ọnọ, fọkime wu mẹrẹn ebẹnbẹn mẹ ne; wu ji rhe kpahen omiamiamo mia dẹrughwaroghwẹ.”

Michelle: Omarana, dedevwo David ọ rioja omamọ, ọ mẹrẹn urhebro nime o rheri taghene Jehova ọ mẹrẹn i kemru kemru ra phia riẹn. Ọrana ghini emru urhebro, re ne rhe taghene Jehova ọ mẹrẹn i kemru kemru ra phia, tobọ te iroro re kpokpo ẹhẹn ọwan, rẹ awọrọ ina ja sabu vwẹruọ ye.

Sophia: Ghini emru urhebro.

Michelle: Emru urhebro ọrọrọ yẹ, Osolobrugwẹ ọ ha uphẹn rẹn ojẹriọ no rhirhiẹ ye bẹmẹdẹ-ẹ. Baibol na o yonirin ọwan taghene Jehova ono fiobarhọ usun ọkon ọrẹ Echu phẹrẹkpẹ. Ọnọ kwaphiẹ ekwakwa ibiobiomu ephian rhọ, tobọ te ekwakwa ri phia wẹn ọrhẹ izuo. Mi na sabu rhe ọkprughwre ọrọ sa, ni mi dje wẹn oborẹ ọsoriẹ o mwu ọwan ẹro taghene Osolobrugwẹ ono fiobarhọ ojẹriọ ephian phẹrẹkpẹ?e

Sophia: Oserhọ.