Uvie Osolobrugwẹ—Oborẹ o Mevirhọ Rẹn i Jesu

Jerẹ oborẹ a mẹrẹnren uvuẹn urhomu-ẹmro rọ vrẹnren na, Jesu ọ ha ọsoso akpọ ye “ghwoghwo jeghwai ta kpahen iyẹnrẹn esiri ọrẹ Uvie” na. (Luke 8:1) Ọ dabu fiomarhọ owian na, ọ nya ugbo iseseri uvuẹn ẹkwotọre Israel neneyo o yono ihworho kpahen Uvie Osolobrugwẹ. A ya iyẹnrẹn aghwoghwo i Jesu rhẹ ọbe i Baibol ẹne, aye i hunute Uvie na vrẹn ọgbọ 100. Jesu yọ mai ta kpahen Uvie na, ọrẹn ibiẹ oborẹ i Jesu ọ tare ọvo sekpahen Uvie Osolobrugwẹ ya ya rhotọre!—John 21:25.

Mesoriẹ Uvie Osolobrugwẹ ọ ghanren rẹn i Jesu ọke ọ ha uvuẹn otọrakpọ na? Iroro owu yẹ, Jesu o rheri taghene Osolobrugwẹ ọ djẹriẹ ha no rhiẹ Orodje Uvie na. (Isaiah 9:6; Luke 22:28-30) Ọrẹn, Jesu ọ tẹnrovi oborẹ ono ru vwo omẹgbanhon usuon yanghene ujiri rẹn omaye-en. (Matthew 11:29; Mark 10:17, 18) Jesu o jiri Uvie na fọkiẹ erere omobọ ye-e. Emru ọrukaro rọ soriẹ i Jesu o vwo ọdamẹ kpahen Uviea Osolobrugwẹ yi fọkiẹ oborẹ Uvie na ono ru rẹn ihworho ro vwo ẹguọlọ kpahen, nọyẹ Ọsẹ ye obẹ odjuwu kugbe idibo yi ri fuevwan.

OBORẸ UVIE NA ONO RU RẸN ỌSẸ I JESU

Jesu o vwo ẹguọlọ okokodo kpahen Ọsẹ ye obẹ odjuwu. (Proverbs 8:30; John 14:31) O ji vwo ẹguọlọ kpahen iruemru Ọsẹ ye jerẹ ẹguọlọ, arodọmẹ ọrhẹ orhienbro ọsoso Ọnẹyen. (Deuteronomy 32:4; Isaiah 49:15; 1 John 4:8) O fiotọre dẹn taghene Jesu o vwo utuoma kpahen efian ra mọrẹn ba Ọsẹ ye, nọyẹ efian taghene Osolobrugwẹ ọ vwọ damerhọ ituakpọ ra rioja-a, ọrhẹ efian taghene Osolobrugwẹ ọ guọlọre na rioja. Ọnana yẹ iroro owu rọ soriẹ i Jesu ọ guọlọ ghwoghwo “iyẹnrẹn esiri ọrẹ Uvie na,” Jesu o rheri taghene Uvie na ono ruẹ odẹ Ọsẹ ye fon. (Matthew 4:23; 6:9, 10) Marhẹ Uvie na ono ruie lele?

Nyoma Uvie na, Jehova ọnọ kpare idjaghwẹ ro no lele fi ebrurhọ rẹn ọsoso ihworho ri ha uvuẹn akpọ na. “No no hionron amioviẹ” nẹ ikẹro ituakpọ ri fuevwan. Jehova ono ti oborẹ ọ suẹ oviẹ nie, nọyẹ “uhwu orho rhirhiẹ ye-e, orho vwo omemwurhọ-ọ, yanghene unuebo oviẹ-ẹ.” (Revelation 21:3, 4) Nyoma Uvie na, Osolobrugwẹ ono ti ojẹriọ ituakpọ nie.b

Ọnana yọ soriẹ i Jesu o vwo omwemẹ rọ nọ ta rẹn ihworho kpahen Uvie na! O rheri taghene nyoma ọrana ihworho ine rhe taghene Ọsẹ ye o vwo omẹgbanhon ọrhẹ arodọmẹ. (James 5:11) Jesu o ji rhe taghene Uvie na ọnọ ji rhua erere vwe otu erọrọ rẹ ọye o vwo ẹguọlọ kpahen, nọyẹ ituakpọ ri fuevwan.

OBORẸ UVIE NA ONO RU RẸN ITUAKPỌ RI FUEVWAN

Bọmọke i Jesu ọ ki rhiẹ otọrakpọ na, o nyerẹnren rhẹ Ọsẹ ye ọke jijiri obẹ odjuwu ne. Ọsẹ na ọ ha Ọmọ na ma ekwakwa ephian, nọyẹ idjuwu ri rierun na ọrhẹ ikereti na. kugbe otọrakpọ orhorhomu ọwan ọrhẹ eranmo ri ha uvuien. (Colossians 1:15, 16) Ọrẹn usuẹn ekwakwa ra maren na, ituakpọ yi Jesu ọ “mai vwo ẹguọlọ kpahen.”—Proverbs 8:31.

Ẹguọlọ yo mwu i Jesu ghwoghwo. Nẹ ọtonrhọ rhe yi Jesu ọ ta taghene ọ rhiẹ otọrakpọ na me “ghwoghwo iyẹnrẹn esiri” rẹn ivwiegbere na. (Luke 4:18) Ọrẹn, Jesu o ru vrẹn ọrọ tẹmro kpahen oborẹ ono ru ha userhumu rẹn ihworho. Ọgbọ buebun o dje ẹguọlọ ye rẹn ihworho. Jerẹ udje, ọke otu buebun e koko ma kerhọ ẹmro i Jesu, “aro aye nọ dọn riẹn, no simi emiamo ihworho re kpomẹ.” (Matthew 14:14) Ọke ọhworhare owu ro kpomẹ emiamo ọgbogbanhon o dje esegburhomẹmro phia taghene i Jesu ọnọ sabu simie orhianẹ ọ guọlọre, ẹguọlọ no mwu i Jesu kpare idjaghwẹ. No simi ọhworhare na ji dje arodọmẹ riẹn nyoma ọ ta riẹn: “Mi guọlọre! Gba fon.” (Luke 5:12, 13) Ọke i Jesu ọ mẹrẹn ugbehian yen re se i Mary rọ viẹ fọkiẹ omizie re se Lazarus ro hwuru, Jesu “nọ guanren uvuẹn ẹhẹn yen nọ ji da ye omamọ,” omarana Jesu “nọ viẹre.” (John 11:32-36) Jesu no ruẹ oborẹ e vwe roro rhọ, nọ rhọmọ i Lazarus nuhwu dedevwo o hwu te ẹdẹ ẹne ne!—John 11:38-44.

Itiọrurhomẹmro, Jesu o rheri taghene ibiọke ọvo yẹ oborẹ o ruru na ọnọ tọ te. O rheri taghene orho ru, ihworho ro simirin ina ji rharhumu kpomu, erẹ ọ rhọmọnuhwu ina ji rharhumu hwu. Ọrẹn, Jesu o rheri taghene Uvie Osolobrugwẹ ọvo yo no fioba rhẹ aruẹ ebẹnbẹn erana. Ọnana yọ soriẹ i Jesu ọ dabu ghwoghwo “iyẹnrẹn esiri ọrẹ Uvie na” rhẹ oruru ukperẹ ọnọ ghwai ruẹ igbevwunu ọvo. (Matthew 9:35) Igbevwunu i Jesu a rionbọrhọ oborẹ Uvie Osolobrugwẹ ono ruo uvuẹn ọsoso otọrakpọ na. Roro kpahen oborẹ i Baibol na ọ ta kpahen ọke ọrana.

• 

  O vwo emiamo ghwomara-an.

  “Ọke ọrana, ihworho ri tuẹro ni na mẹrẹn ude, Idienrhọ ni na jeghwai rhon ẹmro. Ọke ọrana ikpolo na ni ne pho jerẹ ẹrhuọghwa, ẹrẹnmo era vwa sabu tẹmro ni ne kperi ukperi aghọghọ.” Habaye, “orho vwo ọrọ nọ ta taghene: ‘Mie kpomẹ-ẹ.’ ”—Isaiah 33:24; 35:5, 6.

• 

  Orho vwo uhwu-u.

  “Evwata na ina ha otọrakpọ na riuku, aye ine nyerẹn uvuien bẹmẹdẹ.”—Psalm 37:29.

  “Ono mwu uhwu rọ bẹmẹdẹ, Osuinsuensun Rọmaido Ọrovwori Jehova ono hionron amioviẹ nẹ ughwaro ephian.”—Isaiah 25:8.

• Ana rhọmọ eri hwuru nuhwu.

  “Ihworho ri ha uvuẹn usin okarorhọ ine rhon uvwele yi, aye ni ne vẹnrẹn rhe.”—John 5:28, 29.

  “Ono vwo ẹrhọmọnuhwu.”—Acts 24:15.

• 

  Ihworho ephian ine vwo eghwa ọrhẹ iruo.

  “Aye ina bọn eghwa jeghwai rhirhiẹ uvuẹn aye, aye ina wọ i vine jeghwai riẹ emamọ aye. Aye i bọn nẹ awọrọ i rhirhiẹ uvuie-en, yanghene aye i wọ nẹ awọrọ i riẹ-ẹ. . . . Ihworho mi djẹha na ni na jeghwai riẹ omamerhomẹ owian aye vuọnvuọn.”—Isaiah 65:21, 22.

• 

  Orho vwo uvweri-i.

  “Ọye ono fioba rhẹ uvweri uvuẹn otọrakpọ na ephian.”—Psalm 46:9.

  “Agbamwa i rha wọnrọn haso agbamwa-a, yanghene aye i rhe yono uvweri ghwomara-an.”—Isaiah 2:4.

• 

  O rho vwo ọkanronmẹ emare-en.

  “Otọrakpọ na nẹ ono rhomu emaren; Osolobrugwẹ, Osolobrugwẹ ọwan nẹ ọnọ ha ebrurhọ rẹn ọwan.”—Psalm 67:6.

  “Emaren no no gbephe uvuẹn akpọ na; ono gbephe omamọ uvuẹn oberun ugbenu na.”—Psalm 72:16.

• Erhirhiẹ ogbere ono nẹ otọre.

  “Rhẹ ọke ephian ya na kpariroro vrẹn ivwiegbere na-a.”—Psalm 9:18.

  “Fọkime ono simi ivwiegbere ra nekpẹn userhumu, omaran ji te ihworho dẹndẹn ọrhẹ eri vwe vwo userhumu. Ọye ono gbe arodọmẹ rẹn ihworho dẹndẹn ọrhẹ ivwiegbere na, ono simi arhọ ivwiegbere na.”—Psalm 72:12, 13.

Ru wa dabu roro kpahen ive enana ri sekpahen Uvie Osolobrugwẹ na, wu sabu djokarhọ oborẹ ọsoriẹ Uvie na ọ ghanren rẹn i Jesu? Ọke i Jesu ọ ha otọrakpọ na, o vwo omwemẹ ro no ghwoghwo Uvie Osolobrugwẹ rẹn ihworho ri guọlọ kerhọ, fọkime o rheri taghene Uvie na ono fioba rhẹ ebẹnbẹn re rhiẹromẹrẹn inyenana.

Ive enana ri sekpahen Uvie na i jeruo? Orho rhiẹ omaran, marhẹ wu ne ru yono rhọ kpahen Uvie ọrana? Me wu ne ruo neneyo ebrurhọ Uvie na i sabu te owẹwẹ obọ? Urhomu-ẹmro rọ kẹta uvuẹn ifi urhomu-ẹmro ọnana ọnọ kpahenrhọ enọ erana.