Ọkiọgo yẹ Uvie Osolobrugwẹ ọ Tuẹn Usun Rhọ—OBỌREVA

ẸZẸKOKO EMENA I NEBUCHADNEZZAR

Cameron: Marhẹ Jon? Oma ọ merhenren mẹ mia rharhumu mẹruọn. Mia riamerhen uyono i Baibol re ruẹ kọkprughwre kọkprughwre.a

Jon: Omamẹ odori, wẹ nobiruo wa nọ.

Cameron: Oma ọmerhenren mẹ taghene ekwakwa i serhọ. Ọke mia rhe kperhumu, a ta kpahen oborẹ ọsoriẹ Iseri Jehova a ta taghene Uvie Osolobrugwẹ ọ tuẹn usun rhọ ẹgbukpe 1914.b Jerẹ oborẹ a ta kpahen, ọwan i mẹrẹn oborẹ o djerie phia uvuẹn Daniel urhomu-ẹmro 4. Wu ji karorhọ oborẹ avwaye ọ tare?

Jon: Ee, ọ ta kpahen emena Orodje Nebuchadnezzar kpahen orhan ọduado na.

Cameron: Ọye dẹn. Uvuẹn emena na, Nebuchadnezzar nọ mẹrẹn orhan ọduado owu ro rhi te odjuwu. Ọmakashe owu nọ tare taghene a hẹn orhan na se, ọrẹn a nyajẹ esiri orhan na vwo rhotọre. “Ọke irhiruẹ” ọrhọ vrẹn ne, orhan na nọ nọ rharhumu mwu.c A ji ta kpahen oborẹ ọsoriẹ aruẹmẹrẹn na o vwo orugba eva. Wu karorhọ oborẹ o kiki rugba lele?

Jon: Ọnana oborẹ ọ phia rẹn Nebuchadnezzar, rhomaran? O kpomorhuẹ ẹgbukpe irhiruẹ.

Cameron: Ọgbare dẹn. Nebuchadnezzar o kpomorhuẹ ibiọke, uvwrọke ọrana, ọ sabu sun ẹrhẹ orodje-e. Ọrẹn, ọke aruẹmẹrẹn na ono te orugba vuọnvuọn, Usun Osolobrugwẹ ono toba ibiọke, nọyẹ ọke irhiruẹ. Jerẹ oborẹ ọwan i mẹrẹnvwrurhe ne, ọke irhiruẹ na ọ tonrhọ ọke ra ghwọghọ i Jerusalem uvuẹn ẹgbukpe 607 B.C.E. Nẹ ọke ọrana rhe, orho vwo orodje owuorowu ro mevi rẹn i Jehova sun ihworho yi-i. Ọke irhiruẹ na orho toba ne, Osolobrugwẹ nọ nọ ha ohworho ọrọrọ mwu, ro no suẹn ihworho yi nẹ obẹ odjuwu rhe. Nọyẹ, ọke irhiruẹ na orho toba ne, Uvie Osolobrugwẹ nọ nọ tuẹn usun rhọ obẹ odjuwu. Ọwan i ji ta kpahen uvwrọke rẹ ọke irhiruẹ na ọ tonrhọ. Omarana, arha sabu rhe oborẹ ọke irhiruẹ na ono jiri te, nọyẹ ana sabu rhe ọke Uvie Osolobrugwẹ ọ tuẹn usun rhọ. Wu vwẹruọ ye?

Jon: Ee, ẹzẹkoko na ọ ha userhumu mẹ karorhọ oborẹ e yono vrẹn ne.

Cameron: Oserhọ dẹn. Jenẹ a tonrhọ jeghwai ta kpahen oborẹ ọke irhiruẹ na o jiri te. Mi ghwai se oghwẹmro ọrana hin obọ, ne mi sabu karorhọ ihwẹnmro kirighwo vwọye. Mi na damoma djeyi ne wu vwẹruọ ye.

Jon: Orhoma.

ỌKE IRHIRUẸ NA O TOBA—ẸDẸ RI KOBA NA NI TONRHỌ

Cameron: Uvuẹn aruẹmẹrẹn ọrukaro ro rugba sekpahen Nebuchadnezzar, ọke irhiruẹ na o mevirhọ ẹgbukpe irhiruẹ. Ọrẹn, ọrẹ o rugba sekpahen Uvie Osolobrugwẹ, ọke irhiruẹ na ono jiri ghwẹ ẹgbukpe irhiruẹ.

Jon: Mesoriẹ wa ta omaran?

Cameron: Karorhọ taghene ọke irhiruẹ na ọ tonrhọ ọke a ghwọghọ i Jerusalem ẹgbukpe 607 B.C.E. Erhe kelie nẹ ẹgbukpe ọrana rhe, ẹgbukpe irhiruẹ ọnọ ha ọwan riẹ ẹgbukpe 600 B.C.E. Ọrẹn uvwrọke ọrana, emru oka owuorowu ọ phia sekpahen usun Osolobrugwẹ-ẹ. Habaye, jerẹ oborẹ ọwan i yono vrẹn ne, ẹgbukpe buebun ri vrẹn ne ọke i Jesu ọ ha otọrakpọ na, ọ tare taghene ọke irhiruẹ na e ji toba-a.

Jon: Omaran e ghini yono. Mi karorhọ ne.

Cameron: Omarana, ukperẹ ono rhiẹ ẹgbukpe kpekpa, ọke irhiruẹ na ono vi jiri omamọ.

Jon: Ni marhẹ ono jiri te?

Cameron: Ọbe i Revelation ro ji surhobọmwu ọbe i Daniel, ọ ha userhumu rẹn ọwan rhe kpahen oborẹ ọke irhiruẹ na ono jiri te. Ọ tare taghene ọke esa gbuphrophro o jiri te ẹdọke 1,260.d Omarana, ọke irhiruẹ no no rhiẹ ẹdọke 2,520. Wu vwẹruọ ye?

Jon: Ee, mi vwẹruọ ye. Ọrẹn, mia ji mẹrẹn oborẹ o ru djephia taghene Uvie Osolobrugwẹ ọ tuẹn usun rhọ ẹgbukpe 1914 na-a.

Cameron: Orhoma, jenẹ a rharhumu nie ọgbọrọrọ. Ọkezẹko uvuẹn aruẹmẹrẹn i Baibol, ẹdẹ owu ọnọ sabu mevirhọ ẹgbukpe owu.e Omarana, arha ha ẹdẹ owu dje ẹgbukpe owu, ọke irhiruẹ na ono jiri te ẹgbukpe 2,520. Erhe kelie nẹ ẹgbukpe 607 B.C.E. rhe, ẹgbukpe 2,520 ọnọ ha ọwan rhiẹ ẹgbukpe 1914.f Omaran ọwan i ru rhe taghene ẹgbukpe 1914 yẹ ọke irhiruẹ na o toba, yi jẹ ọke i Jesu ọ tuẹn usun rhọ ẹrhẹ Orodje ọrẹ Uvie Osolobrugwẹ. Jerẹ oborẹ a djokarhọ, avwẹ ẹgbukpe 1914 rhe, ekwakwa kirighwo buebun i phiare uvuẹn akpọ na ne, ri Baibol na ọ mẹraro taghene ine rhiẹ oka ẹdẹ ri koba na.

Jon: Emru kirighwo ego yi homaphia?

Cameron: Roro kpahen oborẹ i Jesu ọ tare uvuẹn Matthew 24:7. Sekpahen ọke ri Jesu ọnọ tuẹn usun rhọ obẹ odjuwu, nọ tare: “Agbamwa ọnọ kparehaso agbamwa, uvie ọnọ haso uvie, emaren ina kanren ọrhẹ etọre ine kpogho nẹ ekete owu riẹ ọreva.” Djokarhọ ye taghene Jesu ọ tare taghene emaren ina kanren, etọre ine ji kpogho uvwrọke ọrana. Akpọ ọwan ọ vi mẹrẹn ekwakwa egbogbanhon avwọke ahwanren ne, rhomaran?

Jon: Ee.

Cameron: Uvuẹn oghwẹmro ọnana, Jesu ọ ji ta taghene uvuẹn ọke ro no rhiẹ Orodje ọrẹ Uvie Osolobrugwẹ, ene ji fiuvweri buebun. Habaye, ọbe i Revelation ọ ta kpahen uvweri rọ nọ hobọte akpọ na ephian uvuẹn ọke oba na.g Wu karorhọ ọke re fiuvweri akpọ ephian ọrukaro?

Jon: Ee, ẹgbukpe 1914, jẹ ẹgbukpe ọrana ye wu tare taghene Jesu ọ tuẹn usun rhọ! Mie ji rorie omaran bi-i.

Cameron: Erhe kuẹ enana ephian kugbe, wu na mẹrẹnvwrurhe taghene aruẹmẹrẹn kpahen ọke irhiruẹ na, ọrhẹ aruẹmẹrẹn i Baibol erọrọ i dje ọhọ phia. O mwu Iseri Jehova ẹro taghene Jesu ọ tuẹn usun rhọ ẹrhẹ Orodje ọrẹ Uvie Osolobrugwẹ ẹgbukpe 1914, habaye ẹdẹ ri koba na i tonrhọ ẹgbukpe ọrana.h

Jon: Mia ji damoma mi ne vwẹruọ ọsoso ẹmro na fiotọre.

Cameron: Ọrana ọ dabu serhọ. Jerẹ oborẹ mi ta vrẹn ne, ọ ji ha mẹ ibiọke mi ki sabu vwẹruọ ye. Ọrẹn vwana, o mwurun mẹ ẹro taghene ikuegbe ọwan na ọ ha userhumu wẹn ne mẹrẹnvwrurhe taghene, dedevwo Baibol na ọ hunute ẹgbukpe 1914 na-a, ọrẹn Iseri Jehova i bọn imwẹro aye kpahen ẹgbukpe ọrana kpahen i Baibol na.

Jon: Ọrana yọ mai je mẹ kpahen are, nime are a bọn uyono are ephian kpahen i Baibol na. Rhẹ ẹmro omobọ are-e. Ọrẹn, mie ji roro kpahen oborẹ ọsoriẹ ọ bẹn omana. Mesoriẹ Osolobrugwẹ ọ vwọ ghwai ta rẹn ọwan uvuẹn i Baibol na taghene ẹgbukpe 1914, yi Jesu ọnọ tuẹn usun rhọ obẹ odjuwu?

Cameron: Jon, ọrana omamọ onọ dẹn. Itiọrurhomẹmro, o vwo ekwakwa buebun ri Baibol na ọ vwo ghwai hunute. Ọrẹn, mesoriẹ Osolobrugwẹ o tiẹ ekwakwa enana nu, neneyo e je rhe kiki vwẹruọ aye? Ana sabu ta kpahen ono ọrana ọke ọrọrọ?

Jon: Ee, ono serhọ.