Enọ Rẹ Otu Re Se Ẹbe Ọwan I Nọren

Ọrọmo yẹ ọhworhare ro vwo ugbẹn ọyẹbe na ọrhẹ ehworhare erhan ri vwo oborẹ a ha ghwọghọ emru ra hunute uvuẹn aruẹmẹrẹn Ezekiel i mevirhọ?

Aye i mevirhọ emekashe ri ha obẹ odjuwu ri vwobọrhọ ẹghwọghọ ọrẹ i Jerusalem, ri na jeghwai vwobọrhọ ẹghwọghọ enyerakpọ ọkon ọrẹ Echu ọke Armageddon. Mesoriẹ uyono ọnana ra rharhumu vwo ẹruọ ye na, o serhọ?

Ọke rẹ Ezekiel ọ mẹrẹn ekwakwa ibiobiomu rẹ ihworho e ruẹ uvuẹn Jerusalem a ki ghwọghiẹ uvuẹn 607 B.C.E., nọ mẹrẹn emena arodo kpahen ekwakwa ri na phia bọmọke oghwọghọ na ọnọ homaphia. Nọ mẹrẹn ehworhare awan erhan ri vwo oborẹ a ha ghwọghọ emru. Nọ jeghwai mẹrẹn ọhworhare owu usuẹn aye rọ ‘ku ewun efeludu rhọ’ rọ jeghwai vwo ‘ugbẹn ọyẹbe.’ (Ezek. 8:6-12; 9:2, 3) Na ta rẹn ọhworhare ọnana: ‘Nya amwa na vrẹn, . . . fiẹ ọka rhẹ aruikpẹn ihworho re mwuomarhọ ra jeghwai brenu fọkiẹ ekwakwa ibiobiomu re ruẹ uvuẹn amwa na.’ Ọke ro ru, na ta rẹn ehworhare ri vwo oborẹ a ghwọghọ emru na nẹ aye kpe ihworho ri vwe vwo ọka, ri ha uvuẹn amwa na. (Ezek. 9:4-7) Me yẹ aruẹmẹren ọnana o yono ọwan, ọrọmo yẹ ọhworhare ro vwo ugbẹn ọyẹbe na?

A ha aruẹmẹrẹn ọnana phia uvuẹn 612 B.C.E., orugba ukukaro ọ homaphia ọke rẹ isodja Babylon a ghwọghọ Jerusalem, ọnana oborẹ ọnọ phia ẹgbukpe isiorin a nya vrẹn hin. Dedevwo otu Babylon i vwa ga Osolobrugwẹ-ẹ, Jehova ọ ha rẹ aye ruiruo oghwọghọ ọrana. (Jer. 25:9, 15-18) Ọnana ọ phiare nime i Jehova ọ ha aye ghwọghwu ihworho enẹyen ri kparehasuiẹ. Ọrẹn, ọ guọlọ ne kpe aye ephian hi-in. A vwa sa ghwọghọ evwata ọrhẹ eruedandan kugbe-e. Fọkiẹ ẹguọlọ, Jehova nọ gbẹn izede firhọ nọ sabu simi otu Jew ri vwe kwerhọ ekwakwa ibiobiomu ra phia uvuẹn amwa na.

Ezekiel o vwobọrhọ owian ra kokarhọ yanghene owian ra ghwọghọ ihworho na-a. Ukpomaran, emakashe na yi ne vwobọrhọ owian re ne kpe ihworho na. Omarana, nyoma aruẹmẹrẹn ọnana, ọwan na sabu mẹrẹn oborẹ ọ phiare oberhumu, nọyẹ a mẹrẹn oborẹ ọ phiare obẹ odjuwu. Jehova ọ ha owian na rẹn emekashe na, nẹ aye ghwọghọ evwọkon jeghwai sanọ evwata nẹ aye sabu simirhọ.a

Ọke bi, a tare taghene orugba aruẹmẹrẹn ọnana uvuẹn ọke ọwan na, ọhworhare ro vwo ugbẹn ọyẹbe na o mevirhọ eri hẹrhẹrẹ usuẹn era djẹ ha na. E rorori bi taghene eri rhiabọ dede iyẹnrẹn re ghwoghwo na, yẹ eri vwo oka esimirhọ na. Ọrẹn, uvuẹn ẹgbukpe ezẹko ri vrẹn ren na, no mo fiotọre taghene o fori ne wene oborẹ e vwo ẹruọ ye vẹrhẹ na. Sekpahen oborẹ ọ ha uvuẹn Matthew 25:31-33, Jesu yẹ ohworho rọ ha ihworho guẹnzọn. Ono brorhiẹn rọ kẹta uvwre ọke ukpokpogho rode na, rọ nọ sanọ eri họhọ igegede ri ne simirhọ nẹ eri họhọ ẹwe ra na ghwọghọ.

Rẹ ọwan a dabu vwo ẹruọ ye ne na, iyono ego ya na sabu yono nẹ aruẹmẹrẹn Ezekiel na rhe? Orho riotọre o te isiorin:

1. A ki ghwọghọ i Jerusalem, Ezekiel ọrhẹ Jeremiah i wian owian ọdẹrotọre, jere oborẹ Isaiah o ruru. Inyenana, Jehova ọ ha Ugboma Usuon na yẹ ihworho enẹyen emaren, Ọ jeghwai ha aye ti ihworho erhọ bọmọke ukpokpogho rode na ọnọ homaphia. Omarana, ihworho i Kristi ephian ne vwobọrhọ owian aghwoghwo re ne ti ihworho erhọ na.—Matt. 24:45-47.

2. Jerẹ Ezekiel, ihworho i Jehova inyenana i vwe vwobọrhọ owian ra kokarhọ aruikpẹn ihworho ri ne simirhọ-ọ. Aye e ghwoghwo iyẹnrẹn i Jehova ọvo, ọnana usuẹn owian aghwoghwo rẹ aye e ruẹ lele ọkpọvi emekashe na.—Rev. 14:6.

3. Jerẹ oborẹ ọ havwọ uvuẹn ẹdẹ Ezekiel, o vwo ohworho owuorowu inyenana ro vwo oka re rhiẹromẹrẹn uvuẹn aruikpẹn aye-e. Me yo fori nẹ ihworho i ru, na kokarhọ aye nẹ aye sabu simirhọ? Aye ine vi rhiabọ dede aghwoghwo na, ku uruemru ọkpokpọ na rhọ, homakpahontọre rẹn i Jehova, jeghwai vwo atamwu kpahen imizu Kristi. (Matt. 25:35-40) Eri ruẹ enana ine vwo oka ọrẹ usimirhọ ọke rẹ ukpokpogho rode na ọ homaphia.

4. Orugba aruẹmẹrẹn ọnana uvuẹn ọke ọwan na, ọhworhare ro vwo ugbẹn ọyẹbe na o mevirhọ i Jesu Kristi, ọye yẹ ohworho rọ kokarhọ ihworho ri ne vwo usimirhọ na. Otu gbidigbidi na ine vwo oka na, ọke ra ha aye guẹnzọn rhiẹ igegede uvwre ọke ukpokpogho rode na ne. Ọnana ọnọ lẹrhẹ aye vwo arhọ i bẹmẹdẹ uvuẹn otọrakpọ na.—Matt. 25:34, 46.b

5. Orugba aruẹmẹrẹn ọnana uvuẹn ọke ọwan na, ehworhare erhan ri vwo oborẹ a ha ghwọghọ emru na i mevirhọ isodja i Jesu re ha obẹ odjuwu, rẹ i Jesu orhiẹ urhomu harẹn aye. Phẹrẹkpẹ, aye ina ghwọghọ egbamwa na ọrhẹ iruemru ọkon ephian nie—Ezek. 9:2, 6, 7; Rev. 19:11-21.

Erhe vwo ẹruọ uyono eghoghanren enana, ono ruẹ imwẹro ọwan gbanhon taghene Jehova ọ vwọ ghwọghọ ọvwata ọrhẹ oruọdandan kugbe-e. (2 Pet. 2:9; 3:9) Ọ jeghwai karorhọ ọwan ọghanromẹ owian aghwoghwo na uvuẹn ẹdẹ ọwan na. O fori nẹ ti kohworho kohworho erhọ bọmọke oba na ọnọ ki rhe!—Matt. 24:14.