Jehova ọ Kwosa Harẹn Ihworho ra Dabu Guọliẹ

1, 2. (a) Marhẹ ẹguọlọ ọrhẹ esegburhomẹmro i ru surhobo mwu ọwan? (b) Enọ ego ye ne roro kpahen?

NIME i Jehova “yo kiki vwo ẹguọlọ kpahen ọwan,” ọwan na jeghwai dje ẹguọlọ phia hariẹn. (1 John 4:19) O dje ẹguọlọ ọnana phia, nyoma ọ ha ebrurhọ rẹn idibo yi ri vwo atamwu. Ọwan i rhe vwo imwẹro taghene Osolobrugwẹ ọ havwiẹ, ọye yọ jeghwai kwosa rẹn ihworho rẹ ọye o vwo ẹguọlọ kpahen, ọnọ lẹrhẹ ẹguọlọ ọrhẹ esegburhomẹmro ọwan i vwo kpahiẹn gbanhonrhọ.​—⁠Se Hebrews 11:⁠6.

² Jehova ọ kwosa rẹn idibo yi, ọnana usuẹn uruemru rẹ ọye o vwori. Omarana, ọwan erhe vwo imwẹro taghene i Jehova yọ kwosa harẹn ihworho ra dabu guọliẹ-ẹ, nọyẹ ọwan e ji vwo esegburhomẹmro-o, nime “esegburhomẹmro yẹ imwẹro kpahen oborẹ e fiẹrorhọ.” (Heb. 11:⁠1) Itiọrurhomẹmro, esegburhomẹmro o sekpahen ọre fiẹrorhọ ebrurhọ Osolobrugwẹ re ha obaro na. Ọrẹn, marhẹ ifiẹrorhọ re vwo kpahen osa ẹkwa na, o ru yẹ ọwan erere? Marhẹ i Jehova o ru kwosa rẹn idibo yi ọke ahwanren ọrhẹ ọke ọwan na? Jene yono kpahiẹn.

JEHOVA O VIVE TAGHENE ỌNỌ YẸ IDIBO YI EBRURHỌ

3. Ive ọgo yọ ha uvuẹn i Malachi 3:⁠10?

³ Jehova o mwuegbe rọ nọ ha ebrurhọ rẹn idibo yi ri fuevwan ọke ephian, nọyẹ ọsoriẹ ọ yẹ ọwan uphẹn ra na sabu mẹrẹn ebrurhọ. Jehova ọrhọ ta: “ ‘Are i damu mẹ ni, . . . sẹ mi ghini rhie idjuwu na firhọ jeghwai yẹ are ebrurhọ buebu-un, bọmọke emru owuorowu ọnọ jọ kanren are.’ Omaran i Jehova ọgba owọnren na ọ tare.” (Mal. 3:10) Ọwan e dje ọdaremẹro phia nyoma e rhiabọ dede use i Jehova ọ haphia uvuẹn Malachi 3:10 na.

4. Mesoriẹ ọwan ine vwo imwẹro kpahen ẹmro i Jesu rọ ha uvuẹn Matthew 6:⁠33?

⁴ Jesu ọ yẹ idibo yi imwẹro taghene aye i rha ha Uvie na karo, Osolobrugwẹ ọnọ sa aye erhumu. (Se Matthew 6:33.) Jesu o vwo imwẹro kpahen ive ọrana, nime Jehova ohworho ra sabu hẹrosua. Jesu o rheri taghene ive i Jehova i vwe se fughwẹ-ẹ. (Isa. 55:11) Ọwan ina ji sabu vwo imwẹro taghene ọwan i rhe vwo esegburhomẹmro kpahen i Jehova, ọnọ ha ive yi ọnana te orugba: “O vwo ọke owuorowu mi na nyajẹ owẹwẹ vwo-o, mi jeghwai zẹ jẹ owẹwẹ vwo-o.” (Heb. 13:⁠5) Ẹmro erana i lẹrherẹ ọwan vwo imwẹro kpahen ẹmro i Jesu ọ tare uvuẹn Matthew 6:​33, taghene ọwan i ha Uvie Osolobrugwẹ karo.

5. Mesoriẹ ẹmro i Jesu ọ ta rẹn i Peter orhiẹ oborẹ ọ bọn esegurhomẹmro gbanhan?

⁵ Ọnyikọ Peter ọrhọ nọ i Jesu taghene: “Ame i nyaji ekwakwa ephian vwo, nẹ ame i nyaleluo, nẹ me yẹ ame ine vwo?” (Matt. 19:27) Ukperẹ i Jesu ọnọ van ghwẹ i Peter fọkiẹ onọ ọrana, nọ ta rẹn idibo yi taghene aye ina mẹrẹn ebrurhọ fọkiẹ omẹhakpahontọre aye. Inyikọ ye ọrhẹ awọrọ ri fuevwan ine lelie sun obẹ odjuwu. Ọrẹn, ọwan a ji mẹrẹn ebrurhọ ọke ọnana. Jesu nọ tare: “O vwo ohworho owuorowu rọ nyaji oghwa vwo, imizie ehworhare yanghene emẹse, ọsẹ yanghene izu, emọ yanghene otọre fọkiẹ odẹ mẹ, ro no jo vwo akwa uzusiorin buebun ọrhẹ arhọ ri bẹmẹdẹ-ẹ.” (Matt. 19:29) Ebrurhọ rẹ idibo yi ina mẹrẹn, ine bun ghwẹ ekwakwa ugboma rẹ aye i tiobọnu. Esẹ, izu, imizu ehworhare ọrhẹ emẹse, kugbe emọ ri ha uvuẹn ukoko na, i ghanren ghwẹ kemru kemru rẹ aye i tiobọnu fọkiẹ Uvie na.

IFIẸRORHỌ RẸ ỌWAN I VWORI

6. Mesoriẹ i Jehova o vive taghene ọnọ yẹ idibo yi ebrurhọ?

⁶ Jehova o vive rọ nọ yẹ idibo yi ebrurhọ obaro na, rẹ ọwan e rhe ọnana ọ lẹrhẹ ọwan vwo edirin udabọ edamuni. Erhe ti ebrurhọ rẹ ọwan a mẹrẹn inyenana nie, idibo i Jehova i tẹnrovi ebrurhọ ọduado rẹ aye ina mẹrẹn obaro na. (1 Tim. 4:⁠8) Itiọrurhomẹmro, imwẹro rẹ ọwan i vwori taghene Jehova ọ “kwosa harẹn ihworho ra dabu guọliẹ,” ọnọ ha userhumu rẹn ọwan mevigbanhon uvuẹn urhomẹmro na.​—⁠Heb. 11:⁠6.

7. Marhẹ yẹ ifiẹrorhọ ọwan o ru họhọ ọtan ra gba mwu owọ?

⁷ Ọke i Jesu ọ ha uvuẹn oberun ugbenu na, nọ tare: “Are i ghọghọ nẹ oma ọ ji dabu merhen are, nime osa ẹkwa are ọ doro obẹ odjuwu, nime omaran ya ji kparehaso emẹraro ọke ahwanren.” (Matt. 5:12) Ihworho ri ne riẹ odjuwu ọrhẹ ihworho ri ne nyerẹn uvuẹn otọrakpọ na, ina sabu ghini “ghọghọ” fọkiẹ ebrurhọ rẹ aye ine nyerẹn bẹmẹdẹ. (Ps. 37:11; Luke 18:30) Sẹ ọwan i vwo ifiẹrorhọ re ne riẹ odjuwu yanghene ene nyerẹn uvuẹn otọrakpọ obonẹ, ifiẹrorhọ ọwan ọnọ sabu rhiẹ usimirhọ harẹn arhọ ọwan. (Heb. 6:​17-20) Jerẹ oborẹ ọtan ra gba mwu owọ, ọ lẹrhiẹ daji ekete owu ọke ogiribo orho zuẹ, omaran ifiẹrorhọ rẹ ọwan i vwori kpahen ebrurhọ ri ha obaro na ina ji sa ọwan erhumu arha dẹrughwaroghwu erhirhiẹ egbogbanhon. Ọnọ ji sabu lẹrhẹ ọwan vwo omẹgbanhon re ne din ebẹnbẹn.

8. Marhẹ ifiẹrorhọ o ru sabu lẹrhẹ ọfiamu ọwan riotọre?

⁸ Ifiẹrorhọ rẹ ọwan i vwori, ọnọ lẹrhẹ ọwan sabu nyerẹn ghele ọfiamu. Ive Osolobrugwẹ ọ họhọ amivi rọ lẹrhẹ ọmudu ọwan sasa. Orhiẹ emru urhebro, ra na ‘kpare ohwan ọwan harẹn i Jehova,’ rẹ ọwan e rhe taghene ‘ọye ọnọ sẹrorẹ ọwan.’ (Ps. 55:22) Jenẹ ọwan i fiudugbere taghene Osolobrugwẹ ọnọ sabu “ru vrẹn ekwakwa rẹ ọwan i nekpẹn yen mie yi yanghene erẹ ọwan i tobọ roro kpahen.” (Eph. 3:20) Gbe roro kpahiẹn, Jehova ọ vwọ ghwai yẹ ọwan oborẹ ọwan i guọlọre-e, ọrẹn ọ yẹ ọwan ghwẹ “ekwakwa rẹ ọwan i nekpẹn yen mie yi.”

9. Marhẹ yo fori nẹ ọwan i vwo imwẹro kpahen ebrurhọ i Jehova te?

⁹ Na sabu mẹrẹn ebrurhọ na, no fori nẹ ọwan i dje esegburhomẹmro phia kpahen i Jehova, jeghwai nyalele ọkpọvi rọ yẹ ọwan. Moses nọ ta rẹn emọ Israel: “Jehova ọnọ yẹ are ebrurhọ uvuẹn otọre ri Jehova ọ harẹn are nẹ are i ha riuku na, are i rha dabu huvwele i Jehova Osolobrugwẹ are jeghwai nyalele ọsoso irhi mia yẹ are inyenana. Nime i Jehova Osolobrugwẹ are ọnọ ha ebrurhọ rẹn are jerẹ oborẹ o veri.” (Deut. 15:​4-6) Wu vwo imwẹro taghene i Jehova ọnọ yọ ebrurhọ wu rha fuevwan ga ye? O fori ne wu vwo imwẹro ọrana.

JEHOVA YỌ YẸRẸ AYE EBRURHỌ

10, 11. Marhẹ yi Jehova ọ ha ebrurhọ rẹn i Joseph lele?

¹⁰ A ya i Baibol na fọkiẹ erere ọwan. O vwo iyẹnrẹn sansan uvuien ro dje kpahen oborẹ Osolobrugwẹ o ru yẹ idibo yi ebrurhọ ọke ahwanren. (Rom. 15:⁠4) Joseph owuọwan usuẹn aye. Fọkiẹ utuoma rẹ imizu i Joseph i vwo kpahiẹn ọrhẹ orharhere ẹhẹn rẹ ane onini ọnẹyen o vwori, ne fi Joseph rhẹ ekanron uvuẹn Egypt. Joseph ọ sẹrẹ Osolobrugwẹ ẹro? Ẹjo! “Jehova ọrhẹ i Joseph i gba havwiẹ, nọ jeghwai dje ẹguọlọ atamwu hariẹn . . . Jehova no ru kemru kemru ro ruru fikparobọ.” (Gen. 39:​21-23) Udabọ erhirhiẹ egbogbanhon erana, Joseph o vwo edirin hẹrhẹ Osolobrugwẹ.

¹¹ Ẹgbukpe ezẹko a nyavrẹn, Pharoah no ti Joseph nẹ ekanron, nọ jeghwai haye mwu ẹrhẹ ohworho ọreva uvuẹn Egypt. (Gen. 41:​1, 37-43) Ọke ane i Joseph o vwiẹ emọ ehworhare eva, “Joseph no se ọmọyen ọkpako Manasseh, nọ tare, ‘Osolobrugwẹ ọ lẹrhẹ oja mẹ ọrhẹ uvwioghwa ọsẹ mẹ sẹre mẹ ẹro ne.’ No se ọmọyen ọreva Ephraim, nọ tare, ‘Osolobrugwẹ ọ lẹrhere mẹ bun uvuẹn otọre re mia rioja ne.’ ” (Gen. 41:​51, 52) Nime i Joseph ọ sẹrorẹ atamwu ro vwo kpahen i Jehova, Jehova nọ yẹriẹ ebrurhọ nọ sabu simi arhọ emọ Israel ọrhẹ otu Egypt. Ọrẹ imwẹro, Joseph o rheri taghene i Jehova yọ rọ ha ebrurhọ riẹn.​—⁠Gen. 45:​5-9.

12. Marhẹ yi Jesu o ru huvwele ọke rọ dẹrughwaroghwu edamuni?

¹² Jesu Kristi ọ ji huvwele Osolobrugwẹ udabọ edamuni sansan, Jehova nọ jeghwai yẹ ye ebrurhọ. Me yọ sa riẹ erhumu fikparobọ? Baibol na nọ tare: “Fọkiẹ aghọghọ rọ ha obaruiẹ, no vwo edirin uvuẹn orhan oja, ọ zofa-a.” (Heb. 12:⁠2) Jesu ọ ghini ghọghọ, nime ọ sabu ru odẹ Osolobrugwẹ fon. Habaye, Jehova no vwo omamerhomẹ kpahiẹn jeghwai yẹ ye ebrurhọ ọduado. Baibol na ọ tare taghene i Jesu “o siyẹ obọrhe aga usuon Osolobrugwẹ ne.” Baibol na ọ ji ta taghene: “Osolobrugwẹ nọ hariẹ mwu ẹrhẹ ro rierun, nọ jeghwai yẹ ye odẹ rọ vrẹn edẹ ephian.”​—⁠Phil. 2:⁠9.

OBORẸ ỌWAN I RURU Ọ VWỌ SẸRẸ I JEHOVA ẸRO-O

13, 14. Ukẹro ọgo yi Jehova ọ ha ni oborẹ ọwan e ruẹ riẹn?

¹³ Ọwan ina sabu vwo imwẹro taghene i Jehova o vwo ọdaremẹro kpahen omẹdamu ọwan rẹ ọwan ina ga ye. Ọye o rhe erhirhiẹ rẹ ọwan i havwọ. Ọwan i rha dẹrughwaroghwu ebẹnbẹn igho, emiamo, yanghene iroro erọrọ ra guọlọ lẹrhẹ ogame rẹ ọwan a harẹn i Jehova seriotọre, ọye ono dje arodọmẹ harẹn ọwan. Jenẹ o mwu ọwan ẹro taghene i Jehova ọnọ hẹrote idibo enẹyen ri fuevwan ga ye.​—⁠Se Hebrews 6:​10, 11.

¹⁴ Karorhọ taghene, ọwan ina sabu nẹrhomo vwe “ohworho ro rhon ẹrhomo” na, rhẹ imwẹro taghene ọnọ kpahenrhọ ye. (Ps. 65:⁠2) “Ọsẹ arodọmẹ ọrhẹ Osolobrugwẹ urhebro ephian” ọnọ rhọ yẹ ọwan urhebro rẹ ọwan i guọlọre. Ọkezẹko ọnọ sabu ruie nyoma imizu ri ha uvuẹn ukoko na. (2 Cor. 1:⁠3) Oma ọ merhẹn i Jehova, ọwan e rhe dje arodọmẹ harẹn awọrọ. “Ohworho ro dje arodọmẹ harẹn ovwiegbere, o momo i Jehova, ọye nẹ ọnọ kwosa riẹn fọkiẹ oborẹ o ruru.” (Prov. 19:17; Matt. 6:​3, 4) Omarana, ọwan i rha ha userhumu rẹn ihworho ri dẹrughwaroghwu erhirhiẹ ọgbogbanhon, Jehova no nie taghene ọwan e momo riẹn. Ọye no vive taghene ọye yọ nọ kwosa harẹn ọwan.

EBRURHỌ ỌKE ỌNANA ỌRHẸ ỌRẸ I BẸMẸDẸ

15. Ebrurhọ ego ye wu tẹnrovi? (Mẹrẹn ifoto rọ ha uvuẹn ọtonrhọ uyono na.)

¹⁵ Ihworho ri ne riẹ odjuwu i vwo ifiẹrorhọ taghene ana yẹ aye ‘erhu orodje ọrẹ ọvwata na, rẹ aye a hẹrhẹ, rẹ Ọrovwori na, oguẹnzọn ọvwata na ọnọ harẹn aye jerẹ osa ẹkwa uvuẹn ẹdẹ ọrana.’ (2 Tim. 4:​7, 8) Ọrẹn, ọwan i rhe vwo ifiẹrorhọ ọrọrọ, o mevirhọ taghene ọwan a ghanren obaro Osolobrugwẹ-ẹ. Oduduru ihworho erọrọ ine rhirhiẹ ye bẹmẹdẹ uvuẹn otọrakpọ na. “Aye ena mẹrẹn obọdẹn omamerhomẹ uvuẹn ufuoma ro gbephe.”​—⁠John 10:16; Ps. 37:⁠11.

16. Urhebro ọgo yẹ ọwan i mẹrẹnren uvuẹn 1 John 3:​19, 20?

¹⁶ Ọkezẹko, ọwan ina sabu roro taghene oborẹ ọwan e ruẹ o fiemru owuorowu-u, yanghene i Jehova ọ vwọ tobọ vwo omamerhomẹ kpahen omẹdamu ọwa-an. Ọwan ina sabu rhe roro taghene ọwan e mwuovwan ebrurhọ enẹye-en. Jenẹ a karorhọ taghene “Osolobrugwẹ ọ do ghwẹ ọmudu ọwan, ọ jeghwai rhe kemru kemru.” (Se 1 John 3:​19, 20.) Ọ yẹ ọwan ebrurhọ, orhianẹ ẹguọlọ ọrhẹ esegburhomẹmro yo mwu ọwan ga ye, ọrhọ tobọ rhianẹ ọwan a ha ukẹro ọkokamu ni omẹdamu ọwan.​—⁠Mark 12:​41-44.

17. Ebrurhọ ego yi Jehova ọ yẹ ihworho yi inyenana?

¹⁷ Jehova ọ ji ha ebrurhọ rẹn ihworho enẹyen uvuẹn ẹdẹ ri koba enana. Ọye ọ yẹ ihworho enẹyen iyono eghoghanren inyenana ọke na ephian. (Isa. 54:13) Jerẹ oborẹ i Jesu o veri, Jehova ọ ha ebrurhọ rẹn ọwan inyenana nyoma rọ ha uphẹn rẹn ọwan ne rhiẹ usuẹn ekrun ọnẹyen ro kerabọ lele akpọ na ephian. (Mark 10:​29, 30) Habaye, ihworho ra dabu guọlọ Osolobrugwẹ, e vwo ufuoma, ẹhẹn otemẹ ọrhẹ omamerhomẹ ra na ja sabu vwanvwọn.​—⁠Phil. 4:​4-7.

18, 19. Marhẹ oma o ru idibo i Jehova kpahen ebrurhọ rọ yẹ aye?

¹⁸ Idibo i Jehova ekete akpọ na o keri te, e se oseri kpahen ebrurhọ rẹ aye a mẹrẹn mie yi. Jerẹ udje, Bianca ro nẹ i Germany rhe, nọ tare: “Mia kpẹmẹ i Jehova ọke ephian, nime ọ ha userhumu mẹ kpare iroro vrẹn ọfiamu mẹ, rọ jeghwai mevi kẹre mẹ ọke ephian. Akpọ na ọ vuọnren rhẹ ukpokpogho. Ọrẹn, re mia nya rhẹ i Jehova, ofẹn o vwo rho mwu mẹ-ẹ. Mi rhe tiobọnu ekwakwa fọkiẹ i Jehova, ọye nọ kwosa ye mẹ rhẹ ebrurhọ buebun.”

¹⁹ Gbe ji roro kpahen udje Omizu ọmase obẹ i Canada re se i Paula, rọ ha ẹgbukpe 70, o ji vwo emiamo rọ lẹrhẹ ugbuko yi miamiẹ omamọ. Ọrhọ ta: “Dedevwo mi vwa sabu nya-a, o mevirhọ taghene mi sabu ghwoghwo-o, ni mie vwobọrhọ ena aghwoghwo sansan, jerẹ aghwoghwo ra ha ifonu ruẹ ọrhẹ aghwoghwo kpregede. Mi vwo ọbe owu ri mia ya ekete i Baibol sansan ri nẹ ẹbe ọwan rhọ, ni mie se yi ọke na ephian, ni mi sabu mẹrẹn urhebro nie rhe. Ni mi mwu odẹ na ‘Ọbe Usimirhọ mẹ’ rẹn ọbe na. Ọwan i rha tẹnrovi ive i Jehova, ẹhẹn ọwan orho seriotọre-e. Jehova ọnọ rhọ ha userhumu rẹn ọwan ọke na ephian, o toro erhirhiẹ rẹ ọwan i havwọ-ọ.” Erhirhiẹ ọnọ, ọnọ sabu vẹnẹ erhirhiẹ imizu Bianca yanghene Paula. Ọrẹn, karorhọ izede sansan ri Jehova ọ ha ebrurhọ wẹn ọrhẹ awọrọ vrẹn ne. Marhẹ o rhomu te ra na karorhọ oborẹ i Jehova ọ ha ebrurhọ rẹn ọwan inyenana ọrhẹ ebrurhọ rọ nọ yẹ ọwan ọke rọ sa na!

20. Me yẹ ọwan ina sabu fiẹrorhọ, arha ga i Jehova nẹ ẹhẹn rhe?

²⁰ Karorhọ taghene Osolobrugwẹ ọnọ kpahenrhọ ẹrhomo enọ ri nẹ ẹhẹn rhe. Jenẹ o mwuo ẹro taghene wu na “sabu mẹrẹn orugba ive na, [wu] rhe ru ọhọre Osolobrugwẹ hin.” (Heb. 10:​35, 36) Omarana, jenẹ ọwan i rha bọn esegburhomẹmro ọwan gbanhan, nẹ ọwan i jeghwai ga i Jehova nẹ ẹhẹn rhe. Ọwan ina sabu ru ọnana rhe imwẹro taghene Jehova ọnọ yẹ ọwan ebrurhọ.​—⁠Se Colossians 3:​23, 24.