Wu Rheri?

Ana sabu se ileyi ra rhẹ eranmo uvuẹn oghwa ẹga i Jerusalem taghene aye “ihi”?

SEKPAHEN iyẹnrẹn i Matthew uvuẹn i Baibol na, Jesu nọ ruẹ oghwa ẹga na, no doron ekwakwa ihworho ra rhẹ jeghwai dẹ ekwakwa uvuen oghwa ẹga na fughwẹ, nọ ji bọmọ imẹdjẹ ọrhẹ akaba ihworho re wene igho jeghwai rhẹ ilekuku na rhu. Nọ ta rẹn aye: ‘A yariẹ rhotọre, “Ene se oghwa mẹ oghwa ẹrhomo,” ọrẹn are i dẹriẹrhiẹ unu rẹ ihi erhirhiẹ.’—Matt. 21:12, 13.

Iyẹnrẹn itu i Jew, o djephia taghene ileyi ra rhẹ ekwakwa uvuẹn oghwa ẹga na, a ghwa ihworho ria nyoma aye a rhẹ ekwakwa ghanghanren. Jerẹ udje, ọbe owu rẹ itu i Jew i yare re se Mishnah (Keritot 1:7), ọ ta kpahen ọke owu uvuẹn uvwre ọke inyikọ na, ọke ilekuku eva a ghanren te denar oro owu. Ohworho ro vwo vwo ona, ọnọ wian owian ẹdọke 25 no ki vwo igho ọrana. Ivwiegbere a sabu ha ilekuku yanghene erurẹ ze izobo ọke ahwanren nime aye i kuru omamọ; ọrẹn, efẹn na i tobọ ghanren ghwẹ oborẹ ivwiegbere na ina sabu dẹ ne. (Lev. 1:14; 5:7; 12:6-8) Ọgba irherhe owu re se Simeon ben Gamaliel, nọ tuekwẹre fọkiẹ ekwakwa ra phia na, nọ ta rẹn itu i Jew na nẹ aye i kpare iroro vrẹn izobo ezẹko rẹ aye e ze bi. Ọke oru, igho ra dẹ ilekuku na no riotọre omamọ.

Sekpahen oborẹ a hunute oberun na, fọkiẹ uruemru ọghware ọrhẹ ufiuvwele ileyi ra rhẹ ekwakwa uvuẹn oghwa ẹga na, yẹ ọsoriẹ i Jesu o se aye “ihi.”