Aghọghọ Uruemru rẹ Osolobrugwẹ o Tiobọnu rẹn Ọwan

IHWORHO i guọlọ nyerakpọ rọ vuọnren rhẹ aghọghọ. Ọrẹn, uvuẹn ẹdẹ ri koba na, kohworho kohworho a dẹrughwaroghwẹ ọke ọgbogbanhon “ra bẹn enyerẹn.” (2 Tim. 3:1) Osehiẹn, emiamo, je vwo iruo, omemwurhọ yanghene ekwakwa erọrọ ra suẹ ọfiamu ọrhẹ ojẹriọ, ina sabu lẹrhẹ aghọghọ re vwori zien. Idibo Osolobrugwẹ a tobọ dẹrughwaroghwẹ ẹhẹn ro seriotọre, aghọghọ aye no zien. Orhianẹ wu dẹrughwaroghwu erhirhiẹ ọnana ne, marhẹ wu ne ru sabu sẹrorẹ aghọghọ ọnọ?

Na sabu kpahenrhọ onọ ọrana, o fori ne rhe oborẹ obọdẹn aghọghọ ọ mevirhọ ọrhẹ oborẹ awọrọ i ru sẹrorẹ aghọghọ aye udabọ ebẹnbẹn. Ene ji yono kpahen oborẹ ene ruo na sabu sẹrorẹ aghọghọ re vwori jeghwai ruie dorhọ.

ME YẸ AGHỌGHỌ?

A vwa ha uruemru ghwologhwolo roro aghọghọ-ọ. Jerẹ udje: Oma ọnọ sabu rha merhen ọdinyo fọkime ọ da enyo vrẹn oma ne. Ọrẹn, enyo na orho nẹ ikẹruiẹ ne, oma ọ vwọ rhọ merhiẹ-ẹn, nọ rharhumu dẹrughwaroghwu ojẹriọ ọrhẹ ebẹnbẹn rọ havwọ bi. Omamerhomẹ ibiọke rọ mẹrẹnren na rhẹ obọdẹn aghọghọ-ọ.—Prov. 14:13.

Ọrẹ ovẹnẹ, aghọghọ uruemru kirighwo ro surhobọmwu ọmudu na. A rhianriẹn rhẹ “iroro rọ lẹrhẹ oma merhen ọwan fọkime e fiẹrorhọ oborẹ o rhomurun.” Aghọghọ erhirhiẹ omamerhọmẹ re vwo uvuẹn i kerhirhiẹ kerhirhiẹ. (1 Thess. 1:6) Itiọrurhomẹmro, ohworho ọnọ sabu rha ghọghọ udabọ ọfiamu re kpokpo ẹhẹn yen. Jerẹ udje, a fa idibo na fọkime aye e ghwoghwo kpahen i Kristi na. Ọrẹn, aye i ji vwo “aghọghọ, fọkime, e kelirẹ aye ba ihworho ri vwe mwuovwan fọkiẹ odẹ ye.” (Acts 5:41) Ọ dabu fiotọre taghene aye i vwa ghọghọ nime a farẹ aye-e. Ọrẹn, aye a ghọghọ nime aye i sabu sẹrorẹ emevigbanhon aye obaro Osolobrugwẹ rẹ aye e rhiẹ idibo yi na.

E vwe vwiẹ ohworho rhẹ aghọghọ ọnana-a, yanghene ọ vwọ ghwai sa kpregede-e. Mesoriẹ? Fọkime, obọdẹn aghọghọ ọ ha usuẹn iruemru ẹhẹn ọfuanfon Osolobrugwẹ. Nyoma userhumu Osolobrugwẹ, ana sabu vwo aghọghọ ro rhiẹ usuẹn “uruemru ọkpokpọ na.” (Eph. 4:24; Gal. 5:22) Erhe vwo aghọghọ, ana sabu nyerẹn ghele ofiamu akpenyerẹn.

IDJE RO FORI TAGHENE A HẸROKELE

Jehova ọ guọlọre taghene ekwakwa irhorhomu i rhirhiẹ akpọ na, ukperẹ ono rhiẹ ekwakwa ibiobiomu ra mẹrẹn inyenana. Ọrẹn, irueruo evwọkon, ọ vwọ lẹrhẹ aghọghọ i Jehova seriotọre-e. Baibol na ọrhọ ta: “Omẹgbanhon ọrhẹ aghọghọ i ha ekete ro rhirhiẹ.” (1 Chron. 16:27) Habaye, emamọ ewian rẹ idibo i Jehova a wian inyenana, ọ lẹrhẹ “ọmudu i [Jehova] ghọghọ.”—Prov. 27:11.

Orhianẹ ekwakwa e serhọ-ọ, o fo ne brudu-u, nime, a hẹrokele i Jehova. Ukperẹ aghọghọ ọwan ono seriotọre, ana sabu tẹnrovi omamọ ekwakwa re vwori ọke ọnana, na jeghwai hẹrhẹ omamọ ekwakwa ri ha obaro na.a

Ana sabu mẹrẹn idje ihworho buebun uvuẹn i Baibol na ri sẹrorẹ omamerhomẹ aye, ọke aye a dẹrughwaroghwu edamuni. Abraham ohworho rọ dẹrughwaroghwu erhirhiẹ ri na sabu suẹ uhwu riẹn ọrhẹ ebẹnbẹn erọrọ ri ihworho i so ha riẹn. (Gen. 12:10-20; 14:8-16; 16:4, 5; 20:1-18; 21:8, 9) Udabọ ọhiẹn enana, Abraham o ji sẹrorẹ aghọghọ uvuẹn ọmudu ọnẹyen. Marhẹ o ru ọnana lele? Ọ sẹrorẹ aruefirhọ kpahen akpọ ọkpokpọ na, ri Jesu ono sun rhẹ uvuẹn ọmudu ọnẹyen. (Gen. 22:15-18; Heb. 11:10) Jesu ọ tare: “Abraham ọsẹ are ọ ghọghọren omamọ, nime o fiẹrorhọ taghene ọnọ mẹrẹn ẹdẹ mẹ.” (John 8:56) Ana sabu hẹrokele Abraham nyoma re ne roro kpahen ebrurhọ ri ha obaro na.—Rom. 8:21.

Jerẹ Abraham, ọnyikọ Paul ọrhẹ i Silas i tẹnroviẹ ive Osolobrugwẹ. Aye i vwo esegburhomẹmro ọgbogbanhon, jeghwai sẹrorẹ aghọghọ aye udabọ erhirhiẹ ebẹnbẹn. Jerẹ udje, ọke aye e vwo edirin ekpe ọgbogbanhon, jeghwai fi aye rhẹ ekanrọn hin, “uvwre erhẹrhẹ ason, [aye] na nẹrhomo jeghwai so ijoro jiri Osolobrugwẹ.” (Acts 16:23-25) Erhe ti ọnana niẹ, Paul ọrhẹ i Silas i ghọghọren fọkime aye a rioja fọkiẹ odẹ i Kristi. Ana sabu hẹrokele udje i Paul ọrhẹ i Silas izede ana rha karorhọ ebrurhọ ra na mẹrẹn erhe fiomarhọ ogame i Jehova.—Phil. 1:12-14.

Uvuẹn ukoko i Jehova inyenana, o vwo udje imizu buebun ri sẹrorẹ omamerhomẹ aye ọke aye a dẹrughwaroghwu edamuni. Jerẹ udje, uvuẹn i November 2013, ogiribo ọgbogbanhon nọ ghwọghọ erhẹrhẹ amwa i Philippine, ogiribo na ọ ghwọghọ eghwa Iseri Jehova ri te 1,000. George, rẹ ogiribo na ọ ji ghwọghọ oghwa ye rọ ha amwa re se Tacloban nọ tare: “Udabọ oborẹ ọ phiare na, imizu na a ji ghọghọ. Ọ bẹnrẹn mi na sabu dje aruẹ aghọghọ ri mi vwori.” Arha dẹrughwaroghwu ebẹnbẹn, ana sabu sẹrorẹ aghọghọ ọwan erhe roro kpahen oborẹ i Jehova o ru harẹn ọwan ne. Me yẹ emru ọrọrọ ri Jehova o tiobọnu rẹn ọwan, rọ ji yẹ ọwan aghọghọ?

OBORẸ Ọ LẸRHẸ ỌWAN GHỌGHỌ

O vwo emru ọrọrọ rọ nọ sabu yẹ ọwan aghọghọ ghwẹ onyerẹnkugbe ọwan rhẹ Osolobrugwẹ-ẹ. Roro kpahen ọnana: Ọwan i rhe Osuisuensun rọ Maido na. Ọye yẹ Ọsẹ, Osolobrugwẹ, ọrhẹ Ugbehian ọwan!—Ps. 71:17, 18.

Ọwan a ji ha ukẹro ọghoghanren ni arhọ ọrhẹ uphẹn ra na riamerhen akpenyerẹn. (Eccl. 3:12, 13) Nime ọwan emama ri vwo ẹghwanren, ri Jehova ọ ji ha kẹrẹ oma, nọ sa ọwan erhumu sabu rhe ọhọrẹ Osolobrugwẹ kpahen ọwan. (Col. 1:9, 10) Omarana, ne me rhe oborẹ ọsoriẹ a ma ọwan. Habaye, ihworho buebun e rhe oborẹ ọsoriẹ a ma aye-e. Fọkiẹ ovẹnẹ ọnana, Paul nọ tare: “‘Ukẹro ọ ji mẹrẹ-ẹn, orhọ o ji rho-on, yanghene ọmudu ituakpọ o ji rhotọrẹ ekwakwa rẹ Osolobrugwẹ o mwuegbe rẹn ihworho ri vwo ẹguọlọ kpahiẹ-ẹn.’ Fọkime, Osolobrugwẹ o ghwolo aye ephian phia rẹn ọwan nyoma ẹhẹn ọfuanfon ọnẹyen ne.” (1 Cor. 2:9, 10) O fo na ghọghọ nime a dabu rhe otọrẹ ọhọre Osolobrugwẹ ne?

Jene roro kpahen emru ọrọrọ ri Jehova o ru rẹn ọwan ne. Oma ọ vwọ merhen ọwan taghene i Jehova ọnọ sabu ha ọdandan ọwan rhomu ọwan? (1 John 2:12) Fọkiẹ arodọmẹ Osolobrugwẹ, ọwan i vwo ifiẹrorhọ taghene akpọ ọkpokpọ ọ samọ rhiọ phẹrẹkpẹ. (Rom. 12:12) Ọke ọnana, Jehova o vwo ihworho ra ha ẹga riẹn nẹ ẹhẹn sa. (Ps. 133:1) Habaye, Baibol na ọ yẹrẹ ọwan imwẹro taghene Jehova o simi ihworho enẹyen nẹ abọ Echu ọrhẹ ikpodje yi. (Ps. 91:11) Erhe roro kpahen ọsoso ebrurhọ enana ri nẹ obẹ Osolobrugwẹ rhe, aghọghọ ọwan nẹ ọnọ dorhọ jeghwai kodorhọ.—Phil. 4:4.

OBORẸ WU NE RU SABU RU AGHỌGHỌ ỌNỌ DORHỌ

Olele Kristi ọnọ sabu ru aghọghọ ro vwori bi nọ dorhọ? Jesu nọ tare: “Mi ta ekwakwa enana rẹn are, neneyo are i vwo aruẹ aghọghọ mi vwori, nẹ are i ji vwo aghọghọ vuọnvuọn.” (John 15:11) Ọnana o djephia taghene ana sabu ru aghọghọ re vwori nọ dorhọ? Ne wu sabu rhe sẹ aghọghọ ọnọ ọ duarhọ, haye vwanvwọn erhanren re kokophie. Wu rha guọlọ nẹ erhanren na ọ rhọ bara, wu ne rhe dumu erhan rhẹ uvuien. Omaran ọ ji havwọ, wu rha guọlọ nẹ aghọghọ wu vwori nọ dorhọ, ne wu ne ruẹ ẹguọlọ wu vwo kpahen i Jehova no kodorhọ. Karorhọ: Ẹhẹn ọfuanfon Osolobrugwẹ yọ lẹrhẹ aghọghọ dua. Omarana, wu ne vwo aghọghọ vuọnvuọn nyoma wu na nekpẹn userhumu ẹhẹn ọfuanfon i Jehova, ẹrhomo ẹnẹ ọrhẹ eroro kodo kpahen i Baibol na.—Ps. 1:1, 2; Luke 11:13.

Wu na sabu ru aghọghọ ọnọ dorhọ nyoma wu ne fiomarhọ ewian ra lẹrhẹ oma merhen i Jehova. (Ps. 35:27; 112:1) Mesoriẹ? Nime, a marẹn ọwan neneyo a ‘zofẹn Osolobrugwẹ urhomẹmro na, na ji sẹrorẹ ekama enẹyen, fọkime ọnana yẹ ọsoso owian ro te onyakpọ.’ (Eccl. 12:13) Habaye, a marẹn ọwan na ha ẹga rẹn i Jehova. Omarana, arha ha ẹga rẹn i Jehova, na mẹrẹn aghọghọ.b

ERERE RA MẸRẸN ERHE VWO AGHỌGHỌ

Arha damoma nẹ aghọghọ ọrẹ Osolobrugwẹ re vwori na nọ dorhọ, ana mẹrẹn erere ri vrẹn oborẹ e fiẹrorhọ. Jerẹ udje, arha ha ẹga rẹn Ọsẹ ọwan obẹ odjuvwu udabọ erhirhiẹ ebẹnbẹn, oma nọ merhiẹn. (Deut. 16:15; 1 Thess. 5:16-18) Habaye, nime e vwo obọdẹn aghọghọ ne, ana sabu tiẹn uruemru ra hatua ekwakwa ugboma, jeghwai homakpanhontọre wian rẹn Uvie Osolobrugwẹ. (Matt. 13:44) Arha mẹrẹn erere rẹ ọnana ọ ha rhe ne, aghọghọ ọwan nẹ ọnọ rhọ dua, ana sabu nyerẹn omamọ akpọ, jeghwai toroba aghọghọ awọrọ.—Acts 20:35; Phil. 1:3-5.

“Oma ọrhọ merhuọn kpahen akpenyerẹn ọnọ ọke ọnana, nọyẹ, omọkpokpọ ọnọ sabu rhirhiẹ ye wẹn ọke rọ sa na.” Ọnana oborẹ ọgba irherhe owu rọ wian uvuẹn i University ọrẹ Nebraska rọ ha uvuẹn i United States ọ tare, ọke rọ dabu ni eghwẹmro sansan ri tẹmro kpahen akpọ. Ọnana o serhọ rhẹ oborẹ ọ ha uvuẹn i Baibol na, rọ tare: “Ọmudu rọ ghọghọ omamọ umwu.” (Prov. 17:22) Itiọrurhomẹmro, omamerhomẹ wu vwori ọrhọ duarhọ, nọyẹ, wu na sabu vwo omọkpokpọ ọke ọnana.

Omarana, ana sabu vwo obọdẹn aghọghọ rọ nọ ji tọ uvuẹn akpọ ọgbogbanhon ọnana, nime, Jehova o tiobọnẹ ẹhẹn ọfuanfon ọnẹyen rẹn ọwan nyoma ẹrhomo ẹnẹ, uyono omobọ, ọrhẹ, e roro kodo kpahen oborẹ e yonorin. Erhe roro kpahen ebrurhọ ra mẹrẹn ne, arha hẹrokele esegburhomẹmro awọrọ, jeghwai ruẹ ọhọre Osolobrugwẹ, aghọghọ ọwan nọ dua. Uvuẹn izede enana ephian, ana sabu rhiẹromẹrẹn urhomẹmro rọ ha uvuẹn i Psalm 64:10, rọ tare: “Evwata ina ghọghọ fọkiẹ i Jehova, aye ina jeghwai haye ruẹ ekete ra zẹrua.”