Wu Na Sabu Ha Userhumu Rẹn Olele Kristi Furhiemu

Tuesday, April 11, Ilele Kristi furhiemu buebun ina rhiẹ Ẹkarorhọ Uhwu i Jesu na. Aye i tuẹn orhẹ ọrẹ arhọ na rhọ bi ne, ọrẹn nẹ aye i ru furhiemu fọkiẹ iroro sansan, a ta kpahen ezẹko uvuẹn ibroshọ na Rharhumu bru i Jehova. (Heb 12:1) Ọrẹn Ilele Kristi furhiemu i ji ghanren harẹn i Jehova rọ dẹrẹ aye rhẹ ọbara Ọmọ yen na. (Ac 20:28; 1Pe 1:18, 19) Marhẹ ọwan ine ru ha userhumu rẹn aye ghwẹrioma rhiẹ ukoko na?

O fori nẹ ekpako ukoko i guọlọ jeghwai ha userhumu rẹn Ilele Kristi furhiemu, jerẹ oborẹ osuingegede ọ dabu gbẹro rhotọre guọlọ ogegede ọnẹyen ro begheri. (Lu 15:4-7) Ọnana o dje ẹguọlọ i Jehova o vwori phia. (Jer 23:3, 4) Ọwan ephian yi na ha userhumu rẹn ihworho furhiemu, orhiẹ ekpako na ọvo-o. Omẹdamu ọwan re dje uruemru esiri phia, ọ lẹrhẹ oma merhen i Jehova, ọ jeghwai rhua erere vwe ọwan. (Pr 19:17; Ac 20:35) Omarana, roro kpahen ohworho wu na sabu ha userhumu riẹn, jeghwai ruie kpakpata!

NI IVIDIO NA HA USERHUMU RẸN IHWORHO FURHIEMU, ORHO RU GBE RORO KPAHEN ENỌ ENANA:

• Udjoghwẹ ọgo yi Abbey ọ kparare ọke rọ mẹrẹn Oseri Jehova ro vwo rhe?

• Mesoriẹ o fo nẹ ọwan i bru ekpako na nya orhianẹ ọwan e roro kpahen oborẹ ọwan ine ru ha userhumu rẹn ohworho furhiemu?

• Marhẹ Abbey o mwuegbe lele ọke rọ guọlọ bru i Laura nya ọgbọ ọreva ye?

• Marhẹ Abbey o dje erhionrin, edirin, ọrhẹ ẹguọlọ phia lele ọke rọ ha userhumu rẹn i Laura?

• Me yẹ ọwan ina sabu yono nẹ udje i Jesu rọ ha uvuẹn Luke 15:8-10?

• Ebrurhọ ego yi nerhumu userhumu ra harẹn i Laura?