Ghwọghọ Ọke Rhẹ Ihworho ri Vwo Ẹguọlọ Kpahen i Jehova

Mesoriẹ o fo na ghwọghọ ọke rhẹ ihworho ri vwo ẹguọlọ kpahen i Jehova? Ihworho re lele ghwọghọ ọke kuẹgbe, ina sabu hobọte ọwan izede orhorhomu yanghene obiobiomu. (Pr 13:20) Jerẹ udje, Orodje Jehoash o ruẹ “oborẹ orhomurun uvuẹn ukẹro i Jehova” fọkime ọ ghwọghọ ọke rhẹ Orherẹn Ọduado re se i Jehoiada. (2Ch 24:2) Ọke i Jehoiada o hwu hin, Jehoash nọ nyajẹ i Jehova vwo fọkiẹ erharhere okugbe—2Ch 24:17-19.

Uvuẹn ọke Ilele Kristi erukaro, ọnyikọ Paul ọ ha ukoko Ilele Kristi dje “oghwa ọduado,” nọ ha imizu ri ha uvuẹn ukoko na dje “eriẹ,” yanghene ekwakwa ra ha ruẹ emru uvuẹn oghwa. Ọwan ine “rhiẹ eriẹ ra na sabu ha ruiruo izede ọghọ,” orhianẹ ọwan i kẹnoma rẹn okugbe rọ kpẹnkpẹnren rhẹ ohworho ekrun ọwan, yanghene omizu ukoko na ro ruẹ oborẹ ọ vwọ merhen i Jehova oma. (2Ti 2:20, 21) Omarana, jenẹ ọwan i mwu igbehian rhẹ ihworho ri vwo ẹguọlọ kpahen i Jehova ọrhẹ ihworho ri na ha userhumu rẹn ọwan sabu ga ye.

NI IVIDIO NA YONO OBORẸ WU NE RU TIẸN ORHARHERE OKUGBE, ORHO RU GBA KPAHENRHỌ ENỌ ENANA:

• Marhẹ ene ru sabu rhe vwo orharhere okugbe ọrẹn ọwan i rhe-e?

• Uvuẹn ividio re nirin na, me yọ ha userhumu rẹn imizu awansa kẹnoma rẹn orharhere okugbe?

• Iruemru-urhi Baibol ego yi na ha userhumu wẹn djẹ omamọ okugbe?