Irorẹdjẹ ri na ha Userhumu Rẹn Ọwan Ruẹ Esiyẹ Aghwoghwo Mwidjẹn

Esiyẹ ra rua e ki riẹ aghwoghwo i họhọ uyono ọwan ri hẹrhẹre, Jehova ọ nyoma aruẹ esiyẹ erana lẹrhẹ ọwan ha urhebro rẹn owuowọnwan ne vwo ẹguọlọ ọrhẹ omamọ uruemru. (Heb 10:24, 25) Esiyẹ na ọnọ sabu ha te iminiti isionrin yanghene irhiruẹ, ọke ọnana ya na ghalẹ ihworho, ghalẹ ekete ra na wian, jeghwai nẹrhomo. (Orhianẹ e fuẹn uyono vwẹre e ki ruẹ esiye aghwoghwo na, ọke na ono riotọre ghwomaran dede.) Ọrọ ha ihworho riẹ aghwoghwo na, o mwuegbe irorẹdjẹ ri na ha userhumu rẹn ihworho re riẹ aghwoghwo ẹdẹ ọrana. Jerẹ udje, orho rhiẹ Satọde rẹ ihworho buebun a mai homaphia uvuẹn ọkprughwre na, ọnọ sabu ta kpahen oborẹ ana ha aghwoghwo phia lele. Irhomu-ẹmro erọrọ ego yọ nọ sabu ta kpahen?

• Udje ẹhaphia rọ ha uvuẹn Ọbe-Owian Uyono Akpenyerẹn Ọwan Ilele Kristi Ọrhẹ Iruo Uvie Na

• Oborẹ ene ru ha iyẹnrẹn oborẹ ọ phiare ro vwo ji jiri na tuẹn aghwoghwo rhọ

• Oborẹ ene ru kpahenrhọ ẹfro rọ mai homaphia

• Oborẹ ana kpahenrhọ rẹn ohworho ro vwo vwo imwẹro kpahen Osolobrugwẹ, ọro vwo imwẹro taghene ekwakwa i varhe, ohworho rọ djẹ edjadjẹ ọrọrọ, yanghene ohworho ro riẹ ẹga rọ vwọ ha okogho re ghwoghwo

• Oborẹ ene ru ha ekwakwa ri ha iwẹbsaiti jw.org, JW Library^® app, yanghene i Baibol na ruiruo

• Oborẹ ene ru ha Ekwakwa ra ha Yono Ihworho na ruiruo

• Oborẹ ene ru vwobọrhọ eghọn aghwoghwo na erọrọ jerẹ aghwoghwo nyoma ifonu, ra ya ileta, aghwoghwo afiede, ẹrharhumu bru, yanghene uyono i Baibol

• Okarorhọ kpahen uruemru dẹndẹn, re ruẹ ewene, re vwo omamọ uruemru, yanghene ekwakwa erọrọ

• Uyono owu yanghene ividio uvuẹn ibroshọ na Fiomarhọ Isese Ọrhẹ Uyono

• Oborẹ ene ru ha urhebro yanghene ha userhumu rẹn ohworho we lele wian uvuẹn aghwoghwo

• Ekete i Baibol ro sekpahen owian aghwoghwo na yanghene ikuegbe oborerhiẹromẹrẹn uvuẹn owian aghwoghwo rọ nọ bọn awọrọ gbanhon