Rhiẹ Ọkobaro

A ha omẹgbanhon ọwan ruiruo izede ẹghwanren erhe bru ẹkẹ te oma uvuẹn ogame i Jehova. (1Co 9:26) Ẹkẹ re bru te oma a ha userhumu rẹn ọwan ha ọke ọwan ruiruo izede ẹghwanren, bọmọke enyerẹn ọnana ono ki toba. (Eph 5:15, 16) Are erhe ruẹ ogame ekrun, are ina sabu bru ẹkẹ te oma uvuẹn ẹgbukpe ẹga ra samọ ruọ na? Irhomu-ẹmro sansan uvuẹn ọbe-owian ọnana i vwo ẹkẹ sansan rẹ are ina sabu nẹrhomo ji roro kpahen.​—Jas 1:5.

Jerẹ udje, ọsoso ekrun na ina sabu hobọtua owuọwan no rhiẹ ọkobaro? Orhianẹ we roro taghene wu sabu nyamwu ọke na-a, lele ekobaro ri vwo aruẹ erhirhiẹ ọnọ tẹmro. (Pr 15:22) Ọkezẹko, are ina sabu rhonmie ọkobaro owu ọke are e ruẹ ogame ekrun. Orho ru, are i gba ya oborẹ are ina ha ọke are ruiruo lele. Orhianẹ wu rhiẹ ọkobaro dẹ ne, gbe rorie sẹ wu na sabu rharhumu tonrhọ.

Ihworho ezẹko uvuẹn ekrun are ina sabu rhiẹ ọkobaro ibiọke uvwre ubiamo owu yanghene vrẹn omaran? Orhianẹ wa ghwai vwo omẹgbanhon te-e, wu na sabu rhiẹ ọkobaro ibiọke nyoma wu na wian inọke ezẹko uvuẹn aghwoghwo kẹdẹkẹdẹ. Orhianẹ wa ghwai vwo ọke-e, fọkime wa wian ọke ephian yanghene we riẹ isukuru, wu na sabu djẹ ibiamo ro vwo ihọlide yanghene ubiamo ro vwo ehiọn ọkprughwre isionrin. Uvuẹn ikalẹnda are, are i gba kokarhọ ọke are ina wian owian ọkobaro ibiọke nẹ are i ji kwaphiẹ ọke na rhọ.​—Pr 21:5.

NI IVIDIO NA RHIẸ OHWORHO RO FIUDUGBERE​—ỌKOBARO, ORHO RU GBA KPAHENRHỌ ENỌ ENANA:

• Marhẹ i Jehova o ru ha userhumu rẹn omizu Aamand, me yẹ ọnana o yonirẹ ọwan kpahen oborẹ i Jehova o ru sa ekobaro erhumu?