Oborẹ Ene ru ha Idje Ẹhaphia na Ruiruo

A dabu roro kpahen idje ẹhaphia na ọke re mwuegbe aye, ighwoghwẹmro buebun a ji mẹrẹn erere ọke aye a haye ruiruo uvuẹn owian aghwoghwo na. Ọrẹn, ra mẹriẹn taghene erhirhiẹ ẹkwotọre owuowu i vẹnẹren uvuẹn akpọ na, ighwoghwẹmro ina sabu ha ona ọrọrọ tuẹn ẹmro eghwoghwo rhọ yanghene ta kpahen emru ọrọrọ rọ nọ mai je ihworho uvuẹn ekogho aye uvuẹn owian aghwoghwo na. Ọrẹn, o fori na nyalele ọkpọvi ephian ra haphia sekpahen aghwoghwo oghẹnrensan. Ọdamẹ ọwan ọrẹ ana wian owian ri Jesu ọ yẹrẹ ọwan, nọyẹ ọrẹ ene ghwoghwo iyẹnrẹn esiri Uvie na.​—Mt 24:14.

Ighwoghwẹmro arha ha ẹmro phia uvuẹn oghọn ọrẹ Fioma Rhẹ Iruo Aghwoghwo Uvie Na, o fori nẹ aye i ta kpahen urhomu-ẹmro udje ẹhaphia na rọ ha uvuẹn Ọbe-owian Uyono Akpenyerẹn ọrhẹ Iruo Uvie na. Ọrẹn erhe wene ọkpọvi na, aye ọvo ni na sabu sanọ onọ ọrọrọ, ekete i Baibol, onọ ra na ta kpahen ọke ọrọrọ, yanghene oborẹ aye ina ha ẹmro na phia lele, rọ nọ mai serhọ uvuẹn okogho aye e ghwoghwo. Ọnana o wene ọkpọvi ra haphia uvuẹn Ọbe-owian uyono ọrẹ June 2020 aruọbe 8.