URHOMU-ẸMRO UYONO 41
Oborẹ Ene ru ha Userhumu Rẹn Ohworho re Yono Mwuovwan Omebrurhame—Obọrẹ Ukaro
“Fọkime e djerẹ are rhiẹ ileta ọrẹ i Kristi rẹ ame ri rhiẹ ighwoghwẹmro i yare.”—2 COR. 3:3.
IJORO 78 “Ha Ẹmro Osolobrugwẹ Yono Ihworho”
ẸZẸKOKOa
Me yọ nọ sabu lẹrhẹ oma merhen ọsoso ukoko na vrẹn ọrẹ aye ina mẹrẹn ohworho ra ha i Baibol na yono, rẹ aye i ji vwo ẹguọlọ kpahen ro ru riaro te erhirhiẹ omebrurhame? (Ni idjaghwẹ 1)
1. Marhẹ 2 Corinthians 3:1-3 ono ru ha userhumu rẹn ọwan dje ọdaremẹro kpahen uphẹn re vwori re ne yono ohworho no mwuovwan omebrurhame? (Ni ifoto obaro ọbe na.)
MARHẸ oma o ruo ọke wu rha mẹrẹn ohworho re yonorin rọ ha ukoko wu havwọ ro bromarhame? Itiọrurhomẹmro, oma ọ ghini merhuọn. (Matt. 28:19) Orhianẹ wẹwẹ yi lelirie yono, oma ọ vi merhuọn dẹn ọke wa mẹriẹn ro bromarhame! (1 Thess. 2:19, 20) Idibo ri bromarhame obọ ‘ileta ujiri’ harẹn imizu ri lelirẹ aye yono, ọrhẹ ọsoso ukoko na.—Se 2 Corinthians 3:1-3.
2. (a) Enọ eghoghanren ego yo fori ne yono kpahen, mesoriẹ? (b) Me yẹ uyono i Baibol? (Se ekete ra djokarhọ.)
2 Ọ merhen oma re rhe taghene ẹgbukpe ẹne ri vrẹnren na, a nẹ iyẹnrẹn iyono i Baibolb ri te 10,000,000 uvuẹn ọsoso akpọ na. Habaye, uvwre ẹgbukpe erana, ihworho ri te 280,000 ye bromarhame rhiẹ Iseri Jehova ọrhẹ idibo i Jesu Kristi. Marhẹ ene ru ha userhumu rẹn iduduru ihworho re yono i Baibol na sabu bromarhame? Ra mẹriẹn taghene Jehova o ji vwo erhionrin ha uphẹn rẹn ihworho rhiẹ idibo i Kristi, ọwan i guọlọ ru oborẹ ana sabu ru ephian na ha userhumu rẹn aye mwuovwan omebrurhame ogege. Ọke rọ hẹrhẹre orho bu-un!—1 Cor. 7:29a; 1 Pet. 4:7.
3. Me ye ne yono kpahen uvuẹn urhomu-ẹmro ọnana sekpahen oborẹ ana ha uyono i Baibol phia lele?
3 Fọkime ọ ghanranren ne ruẹ idibo, oghọn ukoko sansan ni ruẹ ẹkwaphiẹrhotọre oborẹ aye ine ruo na sabu ha userhumu rẹn ihworho re yono nẹ aye i sabu bromarhame. Uvuẹn urhomu-ẹmro ọnana ọrhẹ ọrọ ha kpahiẹn, ene yono mie ekobaro ri ten ona, imishọnari ọrhẹ iniruo okinhariẹ.c (Prov. 11:14; 15:22) Aye i dje kpahen oborẹ imizu ra ha i Baibol na yono awọrọ ọrhẹ ihworho aye e yono ine ruo nẹ aye i sabu ru riarorhọ. Uvuẹn urhomu-ẹmro ọnana, ene yono kpahen ekwakwa isionrin ro fori nẹ ohworho ro yono i Baibol na o ru nọ sabu mwuovwan omebrurhame.
YONO KỌKPRUGHWRE KỌKPRUGHWRE
Nọ ohworho we yono na sẹ are ina sabu siyẹ yono i Baibol na kugbe (Ni idjaghwẹ 4-6)
4. Me yo fori ne rhe kpahen uyono ra haphia kpeke?
4 Imizu buebun a ha uyono i Baibol phia kpeke uvuẹn anurẹsẹ ọrovwoghwa na. Dedevwo ọnana orhomurun na sabu bọn oruru ohworho na, ọrẹn iyono enana e havwọ kpeke, ọkezẹko e vwe ji ruie kọkprughwre kọkprughwre-e. Nẹ imizu na i sabu bọn oruru ihworho na rhọ, aye na nekpẹn inọmba ifonu aye, jeghwai se aye yanghene dje urhomu ro vwo urhomu-ẹmro i Baibol vwe aye bọmọke aye a ki rharhumu ye yono aye. Aye ina sabu rhe ruẹ omaran emrẹ ibiamo ezẹko, ọrẹn uyono na o vwo ruẹ riaro-o. Ohworhod re yono na orho fi ọke rhotọre dabu yono-o, ọnọ sabu ru riaro homakpahontọre ji bromarhame? O mwuẹ ẹro-o.
5. Lele oborẹ ọ ha Luke 14:27-33, me yi Jesu ọ kanrunumwu rọ nọ sabu ha userhumu rẹn ọwan wian owian re ruẹ idibo?
5 Uvuẹn erhirhiẹ owu, Jesu o dje udje oborẹ ene ruo na sabu rhiẹ odibo yi. Ọ ta kpahen ohworho rọ guọlọ bọn oghwa ọrhẹ orodje rọ guọlọ ye fiuvweri. Jesu nọ tare taghene ọrọ guọlọ bọn oghwa na ono vi “siyẹ roro kpahen uchunu igho ro no mwuien” ha bọn oghwa na hin, ọrhẹ orodje na ono vi “siyẹ ji ha urhebro” sẹ o vwo egba uvweri rọ nọ sabu ha ru oborẹ ọ guọlọ ruẹ na. (Se Luke 14:27-33.) Omaran ọ ji havwọ, Jesu o rheri taghene ohworho rọ guọlọ rhiẹ odibo yi, ono vi roro kpahen oborẹ o mevirhọ ro no rhiẹ odibo yi. Fọkiẹ iroro ọnana, o fori na ha urhebro rẹn eri ne rhiẹ idibo i Jesu nẹ aye i yono kọkprughwre kọkprughwre. Marhẹ ene ru ruie?
6. Me ya na sabu ru ne vwo iyono i Baibol re ruẹ riaro?
6 Tonrhọ nyoma wu ne ruẹ uyono na jiri ibiesuọn. Ọkezẹko wu na sabu ha oghwẹmro i Baibol ọrọrọ ba, ọke we rhe ye yonie. Orhianẹ ọrovwoghwa na ọ rienrioma rhẹ uyono na ne, wu na sabu nọ yen sẹ o vwo ekete are ina sabu siyẹ kugbe yono riarorhọ. Ẹkpahenrhọ ọrovwoghwa na, ono dje oborẹ uyono i Baibol na ọ ghanren riẹn te. Orho ru, nọ sabu yono riarorhọ, wu na sabu nọ yen sẹ are ina sabu yono ọgbeva uvuẹn ọkprughwre na. Ọrẹn, a ji guọlọ ru vrẹn ọrẹ ene yono ukwọgbọ yanghene ọgbeva uvuẹn ọkprughwre na.
MWUEGBE UYONO OWUOWU RHOTỌRE
Dabu mwuegbe rhẹ uyono i Baibol wa guọlọ haphia, ji dje rẹn ohworho we yono na oborẹ ono mwuegbe lele (Ni idjaghwẹ 7-9)
7. Marhẹ omizu ro yono ihworho ono ru mwuegbe uyono i Baibol owuowu rhotọre?
7 O fori nẹ owẹwẹ ri rhiẹ oyono na, i dabu mwuegbe uyono i Baibol owuowu rhotọre. Wu na sabu tonrhọ nyoma wu ne sẹ ọbe wa ha ruẹ uyono na ọrhẹ ekete i Baibol na. Dabu vwo ihwẹnmro na rhẹ ẹhẹn. Roro kpahen urhomu-ẹmro uyono na, irhomu-ẹmro eghwẹmro na, enọ na, ekete ra tare taghene e “se,” ifoto na, ọrhẹ ividio ri na sabu dje kpahen urhomu-ẹmro na. Orho ru, gbe roro kpahen ohworho wa guọlọ yono na, ọrhẹ oborẹ wu na ha uyono na phia lele neneyo ọ sabu vwẹruọ ye jeghwai haye ruiruo.—Neh. 8:8; Prov. 15:28a.
8. Me yẹ ẹmro ọnyikọ Paul ra ya rhẹ Colossians 1:9, 10, o yonirin ọwan kpahen ọrẹ ana nẹrhomo rẹn ihworho re yono?
8 Haba egbemwuo ọnọ, nẹrhomo vwe i Jehova kpahen ohworho we yono na ọrhẹ edamẹ enẹyen. Rẹ i Jehova nọ ha userhumu wẹn ha i Baibol na yono izede ro no te ọmudu ohworho na. (Se Colossians 1:9, 10.) Damoma roro kpahen kemru kemru rọ nọ sabu bẹn rẹn ohworho na no vwẹruọ ye jeghwai rhiabọ dedie. Vwo rhẹ ẹhẹn taghene ẹkẹ ọnọ ọrẹ wu na ha userhumu riẹn mwuovwan omebrurhame.
9. Marhẹ oyono na ono ru ha userhumu rẹn ohworho ro yono na mwuegbe rhẹ uyono yi? Dje yi fiotọre.
9 Ọwan i fiẹrorhọ taghene nyoma uyono ọke ephian, ohworho re yono na ono vwo ọdaremẹro kpahen oborẹ i Jehova ọrhẹ i Jesu i ru ne, jeghwai guọlọ yono rhọ. (Matt. 5:3, 6) Nẹ ohworho re yono na ọ sabu mẹrẹn erere nẹ uyono na, o fori nọ dabu kpomavi rẹn oborẹ o yono na. Fọkiẹ ọnana, dje riẹn oborẹ ọsoriẹ ọ ghanren no mwuegbe uyono owuowu rhotọre nyoma ro no se ekete ro no yono na, ji roro kpahen oborẹ uyono na o ru sekpahiẹn. Marhẹ oyono na ono ru ha userhumu riẹn? Mwuegbe uyono owu kugbe ne wu sabu dje rẹn ohworho we yono na oborẹ e ruie lele.e Dje riẹn oborẹ ono ru mẹrẹn ẹkpahenrhọ rẹn enọ na, ji dje riẹn oborẹ a djokarhọ rhẹ ikerẹmro yanghene ẹmro kirighwo ọvo ri na ha userhumu riẹn karorhọ ẹkpahenrhọ na. Orho ru, gba ta riẹn nọ ha ẹmro enẹyen ha ẹkpahenrhọ na phia. Ọrhọ kpahenrhọ ye, ọnọ ha userhumu wẹn rhe sẹ o vwẹruọ uyono na. Ọrẹn, o ji vwo emru ọrọrọ rọ nọ sabu ha userhumu rẹn ohworho we yono.
YONIE NỌ NẸRHOMO VWE I JEHOVA KẸDẸKẸDẸ
Yono ohworho we yono oborẹ ọnọ nẹrhomo vwe i Jehova lele (Ni idjaghwẹ 10-11)
10. Mesoriẹ o fo nẹ ohworho re yono na o se i Baibol na kẹdẹkẹdẹ, me yọ nọ ha userhumu riẹn mẹrẹn erere nie rhe?
10 Haba ọrẹ ono yono kọkprughwre kọkprughwre, o fori nẹ ohworho re yono na ọ mẹrẹn erere nẹ ekwakwa ezẹko ro ruẹ omobọ ye. O fori nẹ nẹrhomo vwe i Jehova. Izede ọgo? Nyoma rọ kerhọ jeghwai tẹmro rẹn i Jehova. Ọnọ sabu kerhọ i Jehova nyoma ro no se i Baibol na kẹdẹkẹdẹ. (Josh. 1:8; Ps. 1:1-3) Dje riẹn oborẹ ọnọ ha “Bible Reading Schedule” ra na sabu fomu phia, rọ ha jw.org.f ruiruo. Itiọrurhomẹmro, na sabu ha userhumu riẹn riamerhen isese i Baibol yi, jirie riẹn no roro kodo kpahen oborẹ i Baibol na o yonie kpahen Jehova, ọrhẹ oborẹ ono ru ha ekwakwa ro yono na ruiruo uvuẹn akpenyerẹn yen.—Acts 17:11; Jas. 1:25.
11. Marhẹ ohworho re yono ono ru dabu yono oborẹ a nẹrhomo, mesoriẹ o fo nọ nẹrhomo vwe i Jehova ọke ephian?
11 Ha urhebro rẹn ohworho we yono nọ nẹrhomo kẹdẹkẹdẹ vwe i Jehova. Ha ẹrhomo ro nẹ ẹhẹn rhe tuẹn uyono na rhọ ji haye fuen uyono owuowu, hunute yi uvuẹn ẹrhomo enana. Ọke ọrhọ kerhọ wa nẹrhomo, no no yono oborẹ ono ru nẹrhomo nẹ ẹhẹn rhe vwe i Jehova nyoma odẹ i Jesu Kristi. (Matt. 6:9; John 15:16) Roro kpahen oborẹ isese i Baibol kẹdẹkẹdẹ (ra kerhọ i Jehova) ọrhẹ ẹrhomo (ra tẹmro rẹn Jehova) ono ru ha userhumu rẹn ohworho we yono tikẹrẹ i Jehova rhọ! (Jas. 4:8) Re vwo iruemru enana ọnọ ha userhumu riẹn mwuovwan omẹhakpahontọre ọrhẹ omebrurhame.
HA USERHUMU RIẸN NO VWO ONYERẸNKUGBE RHẸ I JEHOVA
12. Marhẹ ene ru ha userhumu rẹn ohworho re yono vwo onyerẹnkugbe rhẹ i Jehova?
12 O fori nẹ oborẹ ohworho na o yono, o te ẹhẹn yen ọrhẹ ọmuduie. Mesoriẹ? Ọmudu ọwan—ro rhiẹ ojemẹ ọrhẹ iroro ọwan, o mwu ọwan kpare idjaghwẹ. Jesu o yono ekwakwa buebun, ihworho i ji vwo ọdamẹ aye ine yono mie yi. Habaye, aye i leli Jesu fọkime oborẹ o yono o teri aye ẹhẹn. (Luke 24:15, 27, 32) O fori nẹ ohworho we yono na ọ mẹrẹn i Jehova rhẹ Ohworho ro nyerẹn, rọ nọ sabu ha mwu ugbehian, o ji nie rhiẹ Ọsẹ ye, Osolobrugwẹ ye ọrhẹ Ugbehian ye. (Ps. 25:4, 5) Uvwre ọke we yonie na, dabu dje kpahen iruemru i Jehova. (Ex. 34:5, 6; 1 Pet. 5:6, 7) O toro urhomu-ẹmro we yono kpaha-an, tẹnrovi aruẹ Ohworho i Jehova ọ havwọ. Ha userhumu riẹn vwo ọdaremẹro kpahen iruemru irhorhomu eri Jehova—jerẹ ẹguọlọ, uruemru esiri ọrhẹ aruẹdọn. Jesu ọ tare taghene “akama ukukaro rọ ji maido” yẹ ọrẹ ene “vwo ẹguọlọ kpahen i Jehova Osolobrugwẹ.” (Matt. 22:37, 38) Damoma ha userhumu riẹn vwo ẹguọlọ kpahen Jehova.
13. Dje udje oborẹ ene ru ha userhumu rẹn ohworho re yono, yono kpahen iruemru irhorhomu i Jehova.
13 Uvuẹn ẹmro we lelie ta, dje rẹn ohworho we yono na oborẹ ọsoriẹ we vwo ẹguọlọ kpahen Jehova. Ọnana ọnọ ha userhumu riẹn mẹrẹnvwrurhe taghene o ji fo no vwo onyerẹnkugbe kpẹnkpẹnkpẹn rhẹ i Jehova. (Ps. 73:28) Jerẹ udje, o vwo ẹmro uvuẹn ekete are e yono na yanghene oghwẹmro i Baibol rọ ta kpahen ẹguọlọ, ẹghwanren, orhienbro ọsoso yanghene omẹgbanhon i Jehova ro te ọmuduie? Hunute yi riẹn, jeghwai ta riẹn taghene ọnana usuẹn oborẹ ọsoriẹ we vwo ẹguọlọ kpahen Jehova. O ji vwo emru ọrọrọ ro fori nẹ ohworho ra ha i Baibol yono o ru, no ki mwuovwan omebrurhame.
HA URHEBRO RIẸN NO RIẸ UYONO UKOKO
Ha urhebro rẹn ohworho we yono nọ rhiẹ uyono ukoko ogege! (Ni idjaghwẹ 14-15)
14. Me yẹ Hebrews 10:24, 25 ọ ta rẹn ọwan kpahen iyono ukoko ri na sabu ha userhumu rẹn ohworho re yono ru riarorhọ?
14 Ọwan ephian i guọlọre nẹ ihworho re yono i mwuovwan omebrurhame. Izede ọghoghanren owu ene ru ha userhumu rẹn aye yẹ, ọrẹ ana ha urhebro rẹn aye rhiẹ uyono ukoko. Iyono ri te ona i tare taghene ihworho re yono ri rhiẹ uyono ogege, e ruẹ riarorhọ phẹphẹrẹ. (Ps. 111:1) Iyono ezẹko e dje rẹn ihworho aye e yono taghene aye ine vwẹruọ i Baibol na rhọ, ọke aye arha rhiẹ uyono ukoko. Lele ohworho we yono na se Hebrews 10:24, 25 kugbe, hunute erere rọ nọ mẹrẹn ọrhọ rhiẹ uyono ukoko. Kporo ividio na riẹn Me Ọye ruẹ Uvuẹn Aghwẹlẹ Uvie?g Ha userhumu riẹn mẹrẹn oborẹ ọsoriẹ ọ ghanren nọ rhọ rhiẹ uyono kọkprughwre kọkprughwre.
15. Me ya na sabu ru na ha userhumu rẹn ohworho re yono rhiẹ uyono ọke ephian?
15 Me wu na sabu ru orhianẹ ohworho we yono ọ ji rhiẹ uyono ukoko dẹ yanghene ọ vwọ sa ọke ephia-an? Ta riẹn rhẹ oruru oborẹ wu yonorin uvuẹn uyono ro vwo jijiri na. Ọrana ọnọ ha userhumu riẹn vwo ẹhẹn rọ nọ rhe. Ha Oghwa Odẹrẹ na yanghene Ọbe-Owian Uyono Akpenyerẹn Ọrhẹ Iruo Uvie Na ra ha ruẹ uyono riẹn. Dje riẹn oborẹ ene yono uvuẹn uyono ọkprughwre ọrọ sa na, ne wu nọ yen ọrọ mai merhiẹn. Oborẹ ohworho we yono o rhiẹromẹrẹn uvuẹn uyono ọrukaro rọ nyaren, ọnọ hobọte yi ghwẹ oborẹ o rhiẹromẹrẹn uvuẹn ẹga ọrọrọ. (1 Cor. 14:24, 25) Ọnọ vwa ihworho rọ nọ sabu hẹrokele omamọ iruemru aye, ri na ji ha userhumu riẹn mwuovwan omebrurhame.
16. Me ya guọlọre na sabu yono ihworho nẹ aye i mwuovwan omebrurhame, me ye ne yono uvuẹn urhomu-ẹmro rọ ha kpahen ọnana?
16 Marhẹ ene ru ha userhumu rẹn ihworho re yono mwuovwan omebrurhame? Ana sabu ha userhumu rẹn aye rhe ọghanronmẹ uyono aye nyoma re ne jirie rẹn aye nẹ aye i yono kọkprughwre kọkprughwre, nẹ aye i ji dabu mwuegbe. O ji fo na ha urhebro rẹn aye nẹ aye i rha nẹrhomo vwe i Jehova ọke ephian, nẹ aye i ji vwo onyerẹnkugbe kpẹnkpẹnkpẹn rhẹ Jehova. A guọlọ ha userhumu rẹn aye rhiẹ uyono ukoko. (Se ekpeti na, “Oborẹ Ihworho re Yono Ine Ruo nẹ Aye i Sabu Mwuovwan Omebrurhame.”) Ọrẹn, jerẹ oborẹ uyono rọ ha kpahen ọnana ono djephia, o ji vwo ekwakwa isionrin erọrọ re ne ruo, rọ nọ ha userhumu rẹn aye mwuovwan omebrurhame.
IJORO 76 Marhẹ o Rhirhiẹ Wẹn?
a Ne yono ohworho emru, o mevirhọ ọrẹ ana ha userhumu riẹn “roro, rhe yanghene ruẹ emru izede ọkpokpọ yanghene izede rọ vẹnẹren.” Urhomu-ẹmro ro suẹn ẹgbukpe ẹga ọrẹ 2020, ro nẹ Matthew 28:19 rhe, ọ karorhọ ọwan ọghanronmẹ re ne yono ihworho i Baibol na jeghwai ha userhumu rẹn aye rhiẹ idibo i Jesu Kristi. Uvuẹn urhomẹmro ọnana ọrhẹ ọrọ ha kpahiẹn, ene yono oborẹ ene ru rhomurhọ uvuẹn owian aghwoghwo na.
b ẸMRO RE DJE FIOTỌRE: Orhianẹ wa ha i Baibol na yono ohworho ọke ephian, nọyẹ wa ha uyono i Baibol phia. Wu na sabu nẹ iyẹnrẹn uyono na orhianẹ wu yono ohworho na ọgbeva ne, nẹ ọke we dje riẹn oborẹ e yono i Baibol na lele, orho ji mwuo ẹro taghene uyono na ono ru riarorhọ.
c Irhomu-ẹmro enana i ji vwo irorẹdjẹ ri nẹ July 2004 riẹ May 2005 ọrẹ Our Kingdom Ministry, ro vwo urhomu-ẹmro na “Conducting Progressive Bible Studies.”
d Dedevwo arha hunute ehworhare ra ha i Baibol yono, ọnana o ji sekpahen emẹse.
e Ni ivido na ro vwo iminiti ẹne Re Yono Emọ Uyono Ọwan Nẹ Aye i Mwuegbe. Uvuẹn JW Library®, hiẹn riẹ MEDIA > OUR MEETINGS AND MINISTRY > IMPROVING OUR SKILLS.
f Hiẹn riẹ BIBLE TEACHINGS > BIBLE STUDY TOOLS.
g Uvuẹn JW Library®, hiẹn riẹ MEDIA > OUR MEETINGS AND MINISTRY > TOOLS FOR THE MINISTRY.