Jehova o Vwo Ẹguọlọ Okokodo Kpahuọn!

1. Me yi Jehova ọ djokarhọ uvuẹn ihworho yi?

“OMA ọ merhen i Jehova kpahen ihworho yi.” (Ps. 149:4) Ọrana ghini emru omamerhomẹ! Jehova ọ djokarhọ omamọ iruemru ọwan; oborẹ ana sabu rhirhiẹ, nọ jeghwai ha userhumu rẹn ọwan rhiẹ igbehian yen. Arha sẹrorẹ atamwu re vwo kpahiẹn, ọnọ daji kẹrẹ ọwan bẹmẹdẹ!—John 6:44.

2. Mesoriẹ ọ bẹn rẹn ihworho ezẹko aye ine vwo imwẹro taghene Jehova o vwo ẹguọlọ kpahen aye?

² Ihworho ezẹko ina sabu ta, ‘Mi rheri taghene Jehova o vwo ẹguọlọ kpahen ihworho yi ephian, ọrẹn marhẹ ono ru mwu mẹ ẹro taghene Jehova o vwo ẹguọlọ kpahen mẹ?’ Me yọ nọ sabu lẹrhẹ ohworho nọ aruẹ onọ ọrana? Oksana,b rọ rioja omamọ ọke rọ ha ọmọvwerhe, ọrhọ ta: “Oma ọ merhenren mẹ omamọ ọke mie bromarhame jeghwai tuẹn owian ọkobaro rhọ. Ọrẹn, ọke ẹgbukpe 15 a vrẹn hin, ni mia karorhọ ekwakwa ibiobiomu ri phia mẹ ọke mia ha ọmọvwerhe. Ni mie roro taghene mie rhe vwo ekwerhọ i Jehova ghwomara-an, habaye mie mwuovwan ohworho ọye ono vwo ẹguọlọ kpahe-en.” Omizu ọmase re se Yua, ro rhiẹ ọkobaro, ọ ji rioja ọke ọmọvwerhe, ọrhọ ta: “Mi homakpahontọre rẹn Jehova fọkime mi guọlọ lẹrhẹ oma merhiẹn. Ọrẹn, o mwurun mẹ ẹro taghene ọ sabu vwo ẹguọlọ kpahen mẹ-ẹ.”

3. Me ye ne yono kpahen uvuẹn urhomu-ẹmro ọnana?

³ Jerẹ imizu emẹse awanva ra hunute vrẹn ne na, wu vwo ẹguọlọ okokodo kpahen Jehova, ọrẹn wu na sabu vwo ẹhẹn eveva sẹ i Jehova o vwo ẹguọlọ kpahuọn. Mesoriẹ o fo no mwuo ẹro taghene Jehova o ghini vwo ẹguọlọ kpahuọn? Me yọ nọ sabu ha userhumu wẹn ọke we roro taghene Jehova o vwo ẹguọlọ kpahuọ-ọn? Jenẹ a mẹrẹn ẹkpahenrhọ rẹn enọ erana.

EMRU IMWOFẸN RE NE VWO ẸHẸN EVEVA KPAHEN ẸGUỌLỌ I JEHOVA

4. Mesoriẹ orhiẹ emru imwofẹn re ne vwo ẹhẹn eveva kpahen ẹguọlọ i Jehova?

⁴ Ẹguọlọ o vwo omẹgbanhon omamọ. Erhe vwo imwẹro kpahen ẹguọlọ ọrhẹ obẹhatua i Jehova, ene vwo omwemẹ ra na ga ye nẹ ẹhẹn rhe udabọ ebẹnbẹn. Ọrẹn, erhe vwo ẹhẹn eveva kpahen ẹguọlọ Osolobrugwẹ, ‘omẹgbanhon ọwan nẹ ono riotọre.’ (Prov. 24:10) Ọke ẹhẹn ọwan orho seriotọre jeghwai vwo ẹhẹn eveva kpahen ẹguọlọ i Jehova, Echu nọ nọ sabu kparehaso ọwan.—Eph. 6:16.

5. Me yọ phia rẹn ihworho ezẹko ri vwo ẹhẹn eveva kpahen ẹguọlọ i Jehova?

⁵ Esegburhomẹmro imizu ukoko na ezẹko ri vwo ẹhẹn eveva kpahen ẹguọlọ i Jehova, o seriotọre ne. Ọkpako ukoko owu re se James, ọrhọ ta: “Dedevwo mia ga uvuẹn Oghọn Ukoko jeghwai riamerhen owian aghwoghwo na uvuẹn ukoko rọ djẹ edjadjẹ ọrọrọ, ọrẹn ni mie roro sẹ oma ọ merhen i Jehova kpahen ewian mẹ. Uvwre ọke owu, ni mie roro sẹ i Jehova ọ kerhọ ẹrhomo mẹ.” Eva, rọ wian owian Uvie na vuọnvuọn, ọrhọ ta: “Mi yonorin taghene ọsọre re ne vwo ẹhẹn eveva kpahen ẹguọlọ i Jehova, fọkime ọ hobọte kemru kemru we ruẹ uvuẹn ogame i Jehova. Ọ lẹrhuọ vwo ẹhẹn wu ne je ruẹ emru owuorowu rẹn Jehova, ọ jeghwai lẹrhuọ je vwo aghọghọ.” Michael, ro rhiẹ ọkobaro ọrhẹ ọkpako ukoko, ọrhọ ta: “Orhianẹ we vwo imwẹro taghene Osolobrugwẹ o vwo ẹguọlọ kpahuọ-ọn, wu na sẹrerhumuje vwo.”

6. Me ye ne vi ru ọke re vwo ẹhẹn eveva kpahen ẹguọlọ i Jehova?

⁶ Idje imizu erana, i hunute oborẹ ọnọ sabu hobọte esegburhomẹmro ọwan lele, orhianẹ e vwo ẹhẹn eveva kpahen ẹguọlọ i Jehova. Ọrẹn, me yo fori ne ru ọke ra guọlọ vwo ẹhẹn eveva kpahen ẹguọlọ Osolobrugwẹ? Ana vi tiẹn ogege! Nẹrhomo vwe i Jehova nọ ha userhumu wẹn wene “iroro ọfiamu” enọ rhiẹ ‘ufuoma ọrẹ Osolobrugwẹ rọ nọ sẹrorẹ ọmudu ọrhẹ oghwa iroro enọ.’ (Ps. 139:23; Phil. 4:6, 7) Karorhọ, orhiẹ owẹwẹ ọvo yi havwiẹ-ẹ. Imizu ukoko na erọrọ a ji wọnrọn hasuẹ iroro esọsọ. Idibo i Jehova ọke ahwanren dede, i ji wọnron hasuẹ aruẹ ebẹnbẹn erana. Jenẹ a mẹrẹn oborẹ ana sabu yono nẹ udje ọnyikọ Paul.

OBORẸ E YONO NẸ OBORẸ Ọ PHIA RẸN PAUL

7. Ebẹnbẹn ego yi Paul ọ dẹrughwaroghwu?

⁷ Ẹhọn o seriotọre ọkezẹko fọkime wu vwo ewian buebun wu na ja sabu wian hin? Orhiomaran, wu na sabu vwẹruọ i Paul. O vwo ọdamẹ kpahen ọsoso “ikoko na,” orhiẹ ukoko owu-u. (2 Cor. 11:23-28) Emiamo ọgbogbanhon ọ lẹrhuọ je vwo aghọghọ? Paul o vwo “uvwẹn rhẹ ugboma” yen, rọ nọ sabu rhiẹ emiamo, rọ ọye ọ guọlọre no nẹ omayen. (2 Cor. 12:7-10) Ijẹgba enọ a lẹrhẹ ẹhọn seriotọre? Omaran ọ ji phia rẹn Paul ọkezẹko. O se omayen “orharhere ọhworhare” fọkime o lele ijẹgba ye wọnrọn ọke ephian.—Rom. 7:21-24.

8. Me yọ ha userhumu rẹn Paul vwo edirin ebẹnbẹn yen?

⁸ Udabọ edamuni ọrhẹ erhirhiẹ egbogbanhon ri Paul ọ dẹrughwaroghwu, ọye ọ ji ga i Jehova. Me yọ yẹriẹ omẹgbanhon? Dedevwo Paul o rhe kpahen ijẹgba ye, o vwo esegburhomẹmro ọgbogbanhon kpahen otan na. O ji rhe kpahen ive i Jesu taghene ‘kohworho kohworho ro vwo esegburhomẹmro kpahen [Jesu] . . . ono vwo arhọ i bẹmẹdẹ.’ (John 3:16; Rom. 6:23) Paul ọ ha usuẹn eri vwo esegburhomẹmro kpahen otan na. O mwurien ẹro taghene Jehova o mwuegbe rọ nọ harhomu ihworho ri ruẹ ọdandan ọghwaghwa aye i rha ghwẹriẹ.—Ps. 86:5.

9. Me ye yono nẹ ẹmro i Paul rọ ha Galatians 2:20?

⁹ Paul o ji vwo esegburhomẹmro taghene Jehova o vwo ẹguọlọ kpahiẹn omamọ, fọkime o dje i Jesu rhe me hwu riẹn. (Se Galatians 2:20.) Djokarhọ ẹmro urhebro rọ ha ruiruo uvuẹn obẹta oghwẹmro na. Paul ọrhọ ta: “Ọmọ Osolobrugwẹ . . . ro vwo ẹguọlọ kpahen mẹ jeghwai ha omayen kpahontọre fọkiẹ omẹmẹ.” Paul o roro taghene ọye o biomurun omamọ ri Jehova ọnọ jọ sabu vwo ẹguọlọ kpahe-en, o roro taghene, ‘Jehova ọnọ sabu vwo ẹguọlọ kpahen imizu mẹ, ọrẹn ọ sabu vwo ẹguọlọ kpahen mẹ-ẹ.’ Paul nọ karorhọ Ilele Kristi ri ha Rome: “Ọke re ji rhiẹ iruedandan, Kristi no mo hwu harẹn ọwan.” (Rom. 5:8) Jehova o vwo ẹguọlọ kpahen ọwan ephian!

10. Me ye yono nẹ Romans 8:38, 39?

¹⁰ Se Romans 8:38, 39. Paul o vwo imwẹro ọgbogbanhon kpahen ẹguọlọ Osolobrugwẹ. Ọ yare taghene o vwo emru owuorowu ‘rọ nọ sabu hẹriẹ ọwan nẹ ẹguọlọ Osolobrugwẹ-ẹ.’ Paul o rhe oborẹ i Jehova o vwo erhionrin kpahen agbamwa Israel lele. O ji rhe oborẹ i Jehova o ru dje arodọmẹ riẹn. Ana sabu zẹ iroro i Paul koko izede omana, ‘Ra mẹriẹn taghene Jehova o dje Ọmọyen me hwu mẹ, o fo ne mi vwo ẹhẹn eveva sẹ o vwo ẹguọlọ kpahen mẹ-ẹ.’—Rom. 8:32.

11. Dedevwo Paul o ruẹ aruẹ edandan ra hunute uvuẹn 1 Timothy 1:12-15, mesoriẹ o mwuien ẹro taghene Jehova o vwo ẹguọlọ kpahiẹn?

¹¹ Se 1 Timothy 1:12-15. O vwo ọke ezẹko rẹ ẹhẹn Paul o kpokpie fọkiẹ oborẹ o ru vrẹn ne. O gbunu taghene o se omayen oruọdandan rọ “karo-o”! Bọmọke o ki rhiẹ Olele Kristi, Paul ọ kparehaso Ilele Kristi ri ha emwa sansan, o fiẹ ezẹko rhẹ ekanron, jeghwai kwe taghene e kpe ezẹko hwu. (Acts 26:10, 11) Oma ọ merhen i Paul orhianẹ ọ nya vwa uphuphẹn Olele Kristi rẹ ọye o vwo ekwerhọ kpahen uhwu eri vwiẹriẹ-ẹ. Oborẹ i Paul o ruru ọ dariẹ omamọ, ọrẹn o rheri taghene ọ sabu wene ekwakwa ro ru vrẹn ne-e. O vwo imwẹro taghene Kristi o hwuru fọkiẹ ọye, omarana no fiudugbere ya: “Nyoma ẹghẹlẹ ọphẹ Osolobrugwẹ yi me rhiẹ ohworho mi havwọ.” (1 Cor. 15:3, 10) Me ye yonorin? O fori ne wu vwo imwẹro taghene Kristi o hwu wẹn rọ lẹrheruọ vwo uphẹn wu ne vwo obọdẹn onyerẹnkugbe kpẹnkpẹnkpẹn rhẹ i Jehova. (Acts 3:19) Oborẹ ọ mai ghanren rẹn Osolobrugwẹ yẹ oborẹ e ruẹ vwana ọrhẹ uvuẹn obaro na, orhiẹ orusọ re ru vrẹn ne-e, sẹ ọwan Iseri Jehova ọke ọrana yanghene e ji rhiẹ Iseri Jehova-a.—Isa. 1:18.

12. Marhẹ ẹmro ri ha 1 John 3:19, 20 ine ru ha userhumu rẹn ọwan ọke re ni oma ọwan sakamu yanghene e roro taghene ọwan e fo ere ne vwo ẹguọlọ kpahe-en?

¹² Ọke we rhe roro kpahen Jesu ro hwuru fọkiẹ edandan enọ, wu na sabu ta, ‘Mie mwuovwan ẹghẹlẹ ọnana-a.’ Mesoriẹ we roro omaran? Ijẹgba ọwan ọnọ sabu phiẹ ọwan rhọ, rọ lẹrhẹ ọwan ni oma ọwan sakamu yanghene roro taghene e fo ere ne vwo ẹguọlọ kpahe-en. (Se 1 John 3:19, 20.) Uvwre ọke ọrana, o fori na karorhọ taghene “Osolobrugwẹ ọ do ghwẹ ọmudu ọwan.” Ẹguọlọ i Jehova ọrhẹ ẹharhomu ọnẹyen, i gbanhon ghwẹ iroro esọsọ ri na sabu rhirhiẹ ọmudu ọwan. O fori ne vwo imwẹro taghene Jehova o vwo ẹguọlọ kpahen ọwan. Na sabu ruẹ ọrana, ene vi yono i Baibol na kẹdẹkẹdẹ, nẹrhomo, jeghwai kwomakugbe imizu ukoko na ọke ephian. Mesoriẹ ekwakwa enana a ghanren?

OBORẸ UYONO I BAIBOL, ẸRHOMO ỌRHẸ OBỌDẸN IGBEHIAN INE RU HA USERHUMU PHIA

13. Marhẹ uyono i Baibol ono ru ha userhumu rẹn ọwan? (Ji se ekpeti na “Oborẹ i Baibol na o ru ha Userhumu Rẹn Aye.”)

¹³ Yono i Baibol na kẹdẹkẹdẹ, ne wu ne vwẹruọ iruemru irhorhomu i Jehova fiotọre. Wu na mẹrẹn oborẹ o vwo ẹguọlọ kpahuọn te. Erhe roro kodo kpahen oghwẹmro owu uvuẹn i Baibol na kẹdẹkẹdẹ, ọnọ ha userhumu wẹn roro ekwakwa fiotọre, ji “haye ru ekwakwa serhọ” uvuẹn iroro ọrhẹ ọmudu ọnọ. (2 Tim. 3:16) Ọkpako ukoko owu re se Kevin, ro ni omayen sakamu, ọrhọ ta: “Ọke mie se Psalm 103 jeghwai roro kodo kpahiẹn, ọ ha userhumu mẹ kpọ iroro mẹ viẹ, jeghwai vwẹruọ iroro i Jehova kpahen mẹ.” Eva, ra hunute vrẹn ne, ọrhọ ta: “Uvuẹn obẹta ẹdẹ na, ni mie roro kodo kpahen oborẹ ọ mai ghanren rẹn Jehova. Ọnana ọ yẹ mẹ omefuon ji bọn esegburhomẹmro mẹ gbanhan.”

14. Marhẹ ẹrhomo ono ru ha userhumu rẹn ọwan?

¹⁴ Nẹrhomo ọke ephian. (1 Thess. 5:17) Obọdẹn igbehian a vi tẹmro rẹn owuowọnwan ọke ephian, ji ta iroro aye phia. Omaran ugbehian ọwan rhẹ i Jehova ọ ji havwọ. Ọke arha ta iroro ọrhẹ edamẹ ọwan phia uvuẹn ẹrhomo, ne djephia taghene o vwo imwẹro kpahiẹn, habaye e ji rhe taghene Jehova o vwo ẹguọlọ kpahen ọwan. (Ps. 94:17-19; 1 John 5:14, 15) Yua, ra hunute vrẹn ne, ọrhọ ta: “Mia rha nẹrhomo, mi vwa ghwai ta rẹn Jehova oborẹ ọ phia mẹ uvuẹn ẹdẹ na ọvo-o. Mia ta riẹn oborẹ ọ ghini ha ẹhẹn ọrhẹ iroro mẹ. Bibiesuon bibiesuon, mi mẹrẹn i Jehova rhiẹ Ọsẹ ro vwo ẹguọlọ kpahen emọyen, ukperẹ ọnọ rhiẹ ọga uvuẹn ikọmpini ọduado.”—Se ekpeti na “Wu Serie ne?”

15. Marhẹ i Jehova o ru dje ọdamẹ omobọ rẹn ọwan?

¹⁵ Kwomakugbe igbehian ri vwo atamwu; aye ẹghẹlẹ i Jehova o tiobọnu rẹn ọwan. (Jas. 1:17) Jehova o dje ọdamẹ omobọ rẹn ọwan, nyoma rọ yẹ ọwan imizu uvuẹn ukoko na re “dje ẹguọlọ phia ọke ephian.” (Prov. 17:17) Uvuẹn ileta rọ ya vwe imizu ri ha Colossae, Paul ọ hunute Ilele Kristi ezẹko ri hobọtua ye, nyoma ro se aye “esiri urhebro ọduado.” (Col. 4:10, 11) Kristi Jesu dede o dje ọdaremẹro phia kpahen obẹhatua rẹ igbehian yen, tobọ te emakashe i tiobọnu riẹn.—Luke 22:28, 43.

16. Marhẹ igbehian ri vwo atamwu ine ru ha userhumu rẹn ọwan tikẹrẹ i Jehova rhọ?

¹⁶ Wa mẹrẹn erere nẹ ẹghẹlẹ igbehian ri vwo atamwu ri Jehova ọ yẹre ọwan? Arha ta edamẹ ọwan rẹn omizu ro te edje uvuẹn ukoko na, o mevirhọ taghene e vwo esegburhomẹmro-o; ukpomaran ọnọ sabu simi ọwan. Roro kpahen oborẹ i James, ra hunute vrẹn ne, ọ tare: “Obọdẹn onyerẹnkugbe rhẹ imizu ukoko na ri te edje ọ ha userhumu mẹ omamọ ne. Ọke mi rhe vwo iroro esọsọ, igbehian eghoghanren enana ne vwo erhionrin kerhọ mẹ, ji karorhọ mẹ taghene aye i vwo ẹguọlọ kpahen mẹ. Nyoma aye, mia sabu mẹrẹn ẹguọlọ ọrhẹ ẹruete i Jehova kpahen mẹ fiotọre.” Ọ ghini ghanren ne vwo jeghwai sẹrorẹ obọdẹn onyerẹnkugbe rhẹ imizu ukoko na!

DAJI UVUẸN ẸGUỌLỌ I JEHOVA

17-18. Ọrọmo ya na vi kẹrhọ ye, mesoriẹ?

¹⁷ Echu ọ guọlọ taghene erhe ruẹ oborẹ ọgbare-e. Ọ guọlọre ne vwo imwẹro taghene Jehova o vwo ẹguọlọ kpahen ọwa-an, taghene ọwan e fo ihworho ene simi-i. Ọrẹn, jerẹ oborẹ a mẹrẹnvwrurhe ne, ọrana ofian.

¹⁸ Jehova o vwo ẹguọlọ kpahuọn. Wu ghanranren omamọ riẹn. Wu rha huvwele yi, wu na “daji uvuẹn ẹguọlọ ọnẹyen” bẹmẹdẹ, jerẹ oborẹ i Jesu o ruru. (John 15:10) Omarana, wu vwa kerhọ Echu yanghene ẹhọn rọ ta wẹn taghene we fo ohworho re ne vwo ẹguọlọ kpahe-en. Ukpomaran, kerhọ i Jehova, rọ dabu mẹrẹn orhorhomu ọwan fiotọre. Vwo imwẹro taghene “oma ọ merhen i Jehova kpahen ihworho yi,” tobọ te owẹwẹ!