Emiemọ—Are i ha Userhumu Rẹn Emọ Are Vwo Ẹguọlọ Kpahen Jehova

1-2. Mesoriẹ iruemru-urhi Baibol ezẹko ina ghanren rẹn ọwan ọke erhirhiẹ ra havwọ orho wene?

UVUẸN ẹdẹ aye a rọnmọ, esa ọrhẹ ane, na dabu kerhọ ẹmro orọnmo ra bọn kpahen i Baibol na ra haphia. Iruemru-urhi ra ta kpahen uvuẹn ẹmro na, orhiẹ ẹmro ọkpokpọ rẹn aye-e. Ọrẹn nẹ ẹdẹ ọrana rhe, iyẹnrẹn aye i rhonrin na ine rhiẹ oborẹ ọghanren rẹn aye. Mesoriẹ? Fọkime aye awanva ina haye ruiruo uvuẹn orọnmo aye.

² Omaran ọ ji havwọ ọke Olele Kristi orho rhiẹ ọmiọmọ ne. Uvwre ẹgbukpe buebun ne, aye ina sabu rhon ẹmro ezẹko ri ta kpahen oborẹ ana mọren emọ lele. Ọrẹn, vwana urhebro ri ha ẹmro erana ina ghanren rhọ rẹn aye. Fọkime aye ine vwiẹ ọmọ ji mọriẹn ghwanren. Ọrana ghini owian ọduado! Itiọrurhomẹmro, erhirhiẹ ekpokpọ ina sabu wene ukẹro ra ha ni iruemru-urhi Baibol ra dabu rhe bi. Ọnana yẹ iroro owu rọ lẹrhẹ idibo i Jehova se i Baibol na, jerẹ oborẹ a ta rẹn irodje uvuẹn ọke Israel ahwanren nẹ aye i ru, ji roro kodo kpahen aye “ọsoso ẹdẹ” aye.—Deut. 17:19.

3. Me ye ne yono kpahen uvuẹn urhomu-ẹmro ọnana?

³ Emiemọ, are i vwo owu usuẹn uphẹn rọ mai ghanren rẹ Ilele Kristi ina sabu vwo, ọrẹ are ine yono emọ are kpahen Jehova. Ọrẹn, o fori nẹ are i ru vrẹn ọrẹ are ina ghwai yono aye kpahen Jehova. Are i guọlọ ha userhumu rẹn emọ are vwo ẹguọlọ okokodo kpahiẹn. Me yẹ are ina sabu ru, nẹ emọ are i vwo ẹguọlọ okokodo kpahen Jehova? Uvuẹn urhomu-ẹmro ọnana, ene yono kpahen iruemru-urhi Baibol ẹne ri na ha userhumu rẹn emiemọ. (2 Tim. 3:16) Ene ji yono oborẹ emiemọ ezẹko i ru mẹrẹn erere nẹ urhebro i Baibol aye i ha ruiruo.

IRUEMRU-URHI ẸNE RI NA SABU HA USERHUMU RẸN EMIEMỌ

4. Me yẹ uruemru-urhi owu rọ nọ sabu ha userhumu rẹn emiemọ yono emọ aye nẹ aye i vwo ẹguọlọ kpahen Jehova? (James 1:5)

⁴ Uruemru-urhi 1: Guọlọ ọkpọvi Jehova. Nẹrhomo vwe i Jehova nọ yọ ẹghwanren wu guọlọre ne wu sabu ha userhumu rẹn emọ vwo ẹguọlọ kpahiẹn. (Se James 1:5.) Ọye yo Ohworho rọmai mwuovwan rọ nọ ha urhebro phia. O vwo iroro ezẹko rọ soriẹ. Jenẹ a ta kpahen eva. Ọrukaro, Jehova yẹ ọmiọmọ rọmai vwo ẹghwanren. (Ps. 36:9) Ọreva, urhebro ẹghwanren rọ haphia, ọ rhua erere sa ọke ephian.—Isa. 48:17.

5. (a) Me yẹ ukoko i Jehova o tiobọnu ne ri na ha userhumu rẹn emiemọ? (b) Jerẹ oborẹ ividio na o djephia, me ye yono nẹ izede Omizu Amorim ọrhẹ aniẹ i mọren emọ aye lele?

⁵ Nyoma i Baibol na ọrhẹ ukoko na, Jehova o tiobọnẹ ekwakwa buebun ra bọn kpahen Baibol na ri na sabu ha userhumu rẹn emiemọ mọren emọ ri ne vwo ẹguọlọ kpahen Jehova. (Matt. 24:45) Jerẹ udje, aye ina sabu mẹrẹn urhebro buebun nẹ ufi irhomu-ẹmro na “Userhumu Rẹn Ekrun na,” rọ homaphia uvuẹn Awake! emrẹ ẹgbukpe ezẹko bi, ọrẹn vwana ọ homaphia uvuẹn iwẹbsaiti ọwan. Habaye, o ji vwo ividio buebun ri ha jw.org ri vwo erhonmie ọrhẹ iruẹn udje ri na sabu ha userhumu rẹn emiemọ ha urhebro i Jehova ruiruo ọke aye a mọrẹn emọ aye.b—Prov. 2:4-6.

6. Ukẹro ọgo yẹ esa ọrhẹ ane owu i ha ni ọkpọvi aye i mẹrẹn nẹ ukoko i Jehova?

⁶ Emiemọ buebun i dje ọdaremẹro aye phia kpahen userhumu ri Jehova ọ nyoma ukoko yi tiobọnu ne. Ọsẹ owu re se Joe, ọrhọ ta: “Orhiẹ oborẹ ọ lọhọre ra na mọrẹn emọ awansa rhẹ uvuẹn ukoko na-a. Mẹmẹ ọrhẹ ane mẹ a nẹrhomo vwe i Jehova ọke ephian nọ ha userhumu rẹn ame. Ame i ji mẹrẹnvwrurhe ne taghene urhomu-ẹmro owu yanghene ividio, ọ ghwai sa rhẹ ọke, nọ ha userhumu rẹn ame nyerẹn ghele erhirhiẹ ame a dẹrughwaroghwẹ. Ame i mẹrẹn userhumu buebun ne fọkime ame i guọlọ ọkpọvi Jehova.” Joe ọrhẹ aniẹ i mẹrẹnvwrurhe ne taghene ekwakwa ukoko na o tiobọnẹ, a ha userhumu rẹn emọ aye tikẹrẹ i Jehova.

7. Mesoriẹ ọ ghanren nẹ emiemọ i damoma dje omamọ udje? (Romans 2:21)

⁷ Uruemru-urhi 2: Yono nyoma udje. Emọ a dabu ni udje eri vwiẹre aye sua, ọgbọ buebun aye na hẹrokele aye. Ọrẹ imwẹro, o vwo ọmiọmọ rọ gbare-e. (Rom. 3:23) Udabọ ọrana, emiemọ ri vwo ẹghwanren, a damoma dje omamọ udje phia rẹn emọ aye. (Se Romans 2:21.) Ọke rọ ta kpahen emọ, ọsẹ owu ọrhọ ta: “Aye i họhọ akworhẹ ro mwu kemru kemru ha.” Ọrhọ habaye: “Aye a ta rẹn ame ọke udje ame o vwo serhọ rhẹ oborẹ ame e yono aye.” Omarana, arha guọlọ nẹ emọ ọwan i vwo ẹguọlọ kpahen Jehova, ẹguọlọ re vwo kpahiẹn ọnọ ji gbanhon, rẹ awọrọ ina ji mẹrẹn.

8-9. Me wu yono nẹ oborẹ Andrew ọrhẹ Emma i tare?

⁸ O vwo izede buebun rẹ emiemọ ine yono emọ aye nẹ aye i vwo ẹguọlọ kpahen Jehova. Djokarhọ oborẹ idama owu re se Andrew, rọ ha ẹgbukpe 17 ọ tare: “Ọke ephian yẹ eri vwiẹre mẹ a kanrunumwu ọghanronmẹ ẹrhomo. Kason kason, ọsẹ mẹ no leli mẹ nẹrhomo kugbe, ọrhọ tobọ rhianẹ mi nẹrhomo omobọ ne bi. Ọke ephian yẹ aye a karorhọ ame: ‘Wu na sabu leli Jehova tẹmro kugbe ọgbọ buebun wu guọlọre.’ Fọkime aye a ta kpahen ọghanronmẹ ẹrhomo, ọrana nọ hobọte mẹ omamọ, vwana mia sabu ta oborẹ ọ ha ẹhẹn mẹ ọke mia nẹrhomo vwe i Jehova, mie ji nie rhẹ Ọsẹ ro vwo ẹguọlọ.” Emiemọ, karorhọ taghene ẹguọlọ wu vwo kpahen Jehova, ọnọ ji sabu ha userhumu rẹn emọ vwo ẹguọlọ kpahiẹn.

⁹ Jene ji yono kpahen udje Emma. Ọke ọsẹ ye ọ nyaji ekrun na vwo, ọ riosa buebun rẹ izie ọ kware. Emma nọ tare: “O vwo ọke buebun rẹ izu mẹ o vwo vwo igho, ọrẹn ọke ephian yọ ta kpahen oborẹ i Jehova ọ hẹrote idibo yi lele. Ne mi mẹrẹnvwrurhe nyoma oborẹ o nyerẹn akpọ ye lele taghene o ghini vwo imwẹro kpahiẹn. Izu mẹ o ruẹ lele oborẹ o yono.” Oborẹ e yonorin? Emiemọ ina sabu nyoma udje aye yono emọ aye udabọ erhirhiẹ egbogbanhon.—Gal. 6:9.

10. Uphẹn ego ye emiemọ uvuẹn Israel ọke ahwanren i vwori aye ine yono emọ aye kpahen Jehova? (Deuteronomy 6:6, 7)

¹⁰ Uruemru-urhi 3: Tẹmro rẹn emọ ọke ephian. Jehova ọ ta rẹn emọ Israel ọke ahwanren nẹ aye i yono emọ aye ọke ephian. (Se Deuteronomy 6:6, 7.) Emiemọ erana i vwo uphẹn buebun uvuẹn ọsoso ẹdẹ na, aye ine lele emọ aye tẹmro ji yono aye nẹ aye i vwo ẹguọlọ kpahen Jehova. Jerẹ udje, idama uvuẹn Israel ọ sabu ghwọghọ ọke buebun lele ọsẹ ye wọ ewawọ yanghene vun ewawọ. Omizie ọgbọtọ ọnọ sabu ha userhumu rẹn izie ko ewun, rhuon ekwakwa yanghene wian owian oghwa erọrọ. Ọke emiemọ ọrhẹ emọ aye a wian kugbe, aye na ta kpahen irhomẹmro eghoghanren. Jerẹ udje, aye ina sabu ta kpahen uruemru orhorhomu i Jehova ọrhẹ oborẹ ọ ha userhumu rẹn ekrun na lele.

11. Me yẹ uphẹn owu rẹ emiemọ Ilele Kristi i vwori aye ina tẹmro rẹn emọ aye?

¹¹ Inyenana, ekwakwa i wene ne. Uvuẹn ẹkwotọre buebun, emiemọ ọrhẹ emọ aye i vwa sabu ghwọghọ ọke kugbe uvuẹn ọsoso ẹdẹ na-a. Emiemọ na ina sabu ha obẹ iruo, emọ na ina sabu ha isukuru. Omarana, emiemọ ni na guọlọ ọke aye ine lele emọ aye tẹmro kugbe. (Eph. 5:15, 16; Phil. 1:10) Ogame ekrun, owu usuẹn uphẹn erana. Idama owu re se Alexander, ọrhọ ta: “Ọke ephian yẹ ọsẹ mẹ o ruẹ ẹkwaphiẹrhotọre ogame ekrun, ọ vwọ ha uphẹn rẹn emru owuorowu nọ jaghwẹrhọ ọke ame ina ghwọghọ kugbe-e. Ame i rhe yono hin, ame ne gbikun.”

12. Me yo fori nẹ urhomu ekrun o vwo rhẹ ẹhẹn ọke aye e ruẹ ogame ekrun?

¹² Orhianẹ wẹwẹ urhomu ekrun, me wu na sabu ru nẹ emọ i riamerhen ogame ekrun na? Ono rhomu wu rhe lele emọ yono obẹ ọkpokpọ na Riamerhen Akpenyerẹn Bẹmẹdẹ! Uyono ọrana, ọnọ yẹ are obọdẹn uphẹn are ina tẹmro kugbe. Wu guọlọre taghene emọ i ta oborẹ ọ ha ẹhẹn aye ọrhẹ edamẹ aye wẹn, omarana wu vwa ha ọke are ine ruẹ ogame ekrun kugbe vanghwu aye yanghene ghwọghwu aye-e. Habaye, wu vwa tuekwẹre orhianẹ emọ i tẹmro ri vwe serhọ rhẹ oborẹ i Baibol na o yono-o. Ukpomaran, jenẹ oma ọ merhuọn taghene aye i ta oborẹ ọ ha ẹhẹn aye, jeghwai jirie rẹn aye nẹ i rha ta iroro aye phia ọke ephian. Wu na sabu ha userhumu rẹn emọ, ọke we rhe vwẹruọ oborẹ aye e roro.

13. Uphẹn erọrọ ego yẹ emiemọ i vwori aye ina ha userhumu rẹn emọ aye tikẹrẹ i Jehova rhọ?

¹³ Emiemọ, guọlọ uphẹn sansan uvuẹn ẹdẹ na, are ina ha userhumu rẹn emọ are tikẹrẹ i Jehova rhọ. Are i vwa hẹrhẹ ọke re ne siyẹ ruẹ uyono i Baibol kugbe vwẹre, nẹ are i ki ta kpahen Jehova-a. Djokarhọ oborẹ izu owu re se Lisa, ọ tare: “Ame i ha kemru kemru ri kinhariẹ ame yono emọ ame kpahen Jehova. Jerẹ udje, ọke arimwamwa ame orho ru oborẹ ọ lẹrhẹ emọ na rhẹ echẹẹ, ame na haye ta rẹn aye taghene Jehova, Osolobrugwẹ oma ọ merhan, ọ guọlọre na ghọghọ, ji riamerhen ekwakwa irhorhomu.”

14. Mesoriẹ ọghanren nẹ emiemọ i ha userhumu rẹn emọ aye djẹ obọdẹn igbehian? (Proverbs 13:20)

¹⁴ Uruemru-urhi 4: Ha userhumu rẹn emọ vwo obọdẹn igbehian. Baibol na ọ dabu dje yi fiotọre taghene irueruo igbehian ọwan ina sabu hobọte ọwan—izede orhorhomu yanghene ọrẹ obiobiomu. (Se Proverbs 13:20.) Emiemọ, are i rhe igbehian emọ are? Wu mẹrenrẹn aye, ji lele aye ghwọghọ ọke kugbe ne? Me wu na sabu ru rọ nọ ha userhumu rẹn emọ vwo igbehian ri vwo ẹguọlọ kpahen Jehova? (1 Cor. 15:33) Wu na sabu ha userhumu rẹn aye djẹ obọdẹn igbehian nyoma wu na ha use rẹn imizu ezẹko re ruẹ riaro uvuẹn ukoko na, nẹ aye i homaba ekrun are ruẹ ekwakwa kugbe.—Ps. 119:63.

15. Me yẹ emiemọ ina sabu ru rọ nọ ha userhumu rẹn emọ aye vwo obọdẹn igbehian?

¹⁵ Roro kpahen udje ọsẹ owu re se Tony. Ọyẹ ọ ta kpahen oborẹ ọye ọrhẹ aniẹ i ruru nẹ emọ aye i sabu vwo omamọ igbehian: “Uvwre ẹgbukpe buebun rhe na, mẹmẹ ọrhẹ ane mẹ i ha use rẹn imizu sansan, ri ha ẹgbukpe sansan, ri ji nẹ ekete sansan rhe rhiẹ oghwa ame ne. Aye e lele ame riẹ emaren, ji ruẹ ogame ekrun kugbe. Ọnana izede owu re rhe imizu ri vwo ẹguọlọ kpahen Jehova, ra ji ga ye rhẹ aghọghọ. Oma ọ merhenren ame rẹ iniruo okinhariẹ, imishọnari buebun, ọrhẹ awọrọ e rhirhiẹ oghwa ame. Oborẹ aye i rhiẹromẹrẹn, oruru ọrhẹ ẹguọlọ aye, i dabu hobọte emọ ame ji ha userhumu rẹn aye tikẹrẹ i Jehova rhọ.” Emiemọ, vwo omwemẹ wu na ha userhumu rẹn emọ vwo obọdẹn igbehian.

WU VWE FIOBỌRHOTỌRE-E!

16. Me wu ne ruo orhianẹ ọmọ ọ tare taghene ọ guọlọ ga i Jehova-a?

¹⁶ Me wu ne ruo orhianẹ udabọ omẹdamuọ, owu usuẹn emọ, ọ tare taghene ọ guọlọ ga i Jehova–a? Wu vwe roro taghene wẹwẹ rhẹ omamọ ọmiọmọ-ọ. Jehova ọ yẹre ọwan ephian—omaran ji te ọmọ—ẹghẹlẹ ugbomọphẹ, omẹgbanhon ra na djẹ sẹ ana ga i Jehova yanghene a ga ye-e. Orhianẹ ọmọ ọnọ o brorhiẹn rọ nọ nyaji Jehova vwo, vwo ifiẹrorhọ taghene ọnọ ghwẹrioma rhe ẹdẹ owu. Karorhọ udje ọmọ ro vruru na. (Luke 15:11-19, 22-24) Idama ọrana o beghe seri omamọ nẹ izede ọvwata, ọrẹn obẹtaye nọ ghwẹriẹre. Ihworho ezẹko ina sabu ta: “Ọrana ikuegbe ghemeghe, ọnọ sabu ghini phia inyenana?” Ee, ọnọ sabu phia! Itiọrurhomẹmro, ọrana yẹ oborẹ ọ phia rẹn idama owu re se Elie.

17. Marhẹ oborẹ Elie o rhiẹromẹrẹn o ru yọ urhebro?

¹⁷ Sekpahen eri vwiẹriẹ, Elie ọrhọ ta: “Aye i damoma yoni mẹ ne mi vwo ẹguọlọ kpahen Jehova ọrhẹ i Baibol na. Ọrẹn, ọke mia ha uphuphẹn, ne mia gbanhon urhomu.” Elie no nyerẹn aruẹ akpọ eva, nọ tiẹn omẹdamu eri vwiẹriẹ ina ha userhumu riẹn tikẹrẹ i Jehova. Ọke rọ kwa nẹ oghwa, no vwobọrhọ orharhere uruemru. Ọrẹn, ọkezẹko no lele ugbehian yen owu ta kpahen i Baibol na. Elie nọ tare: “Ọke mie lele ugbehian mẹ ta kpahen Jehova na rhọ, ni mie ji roro kpahen Jehova rhọ. Bibiesuọn bibiesuọn, irhomẹmro i Baibol mi yono vrẹn ne—irhomẹmro rẹ eri vwiẹre mẹ i damoma yoni mẹ—na dua rhọ.” Ọke oru, Elie nọ ghwẹrioma rhiẹ ukoko na.c Ha ẹhẹn roro kpahen oborẹ oma ọnọ merhen eri vwiẹriẹ te, taghene aye i damoma yoni Elie nẹ ọmọvwerhe rhe no vwo ẹguọlọ kpahen Jehova!—2 Tim. 3:14, 15.

18. Ukẹro ọgo wa ha ni emiemọ ra wian gbanhan nẹ aye i yono emọ aye nẹ aye i vwo ẹguọlọ kpahen Jehova?

¹⁸ Emiemọ, are i vwo uphẹn ọduado, nọyẹ ọrẹ are ina mọrẹn emọ ri ne rhiẹ idibo i Jehova obaro na. (Ps. 78:4-6) Ọrana rhẹ owian rọ lọhọre-e, ame i ghini jiri are omamọ fọkiẹ omẹdamu are ina ha userhumu rẹn emọ are! Are i rhe ruẹ ekete omẹgbanhon are o teri yono emọ are nẹ aye i vwo ẹguọlọ kpahen Jehova, ji yono aye nẹ aye i huvwele yi, are ina sabu vwo imwẹro taghene oma ọnọ merhen i Jehova kpahen are.—Eph. 6:4.