Wu Ji Karorhọ?
Wu sabu se Oghwa Odẹrẹ erẹ ẹgbukpe ọnana ne? Omarana, nie sẹ wu na sabu kpahenrhọ enọ enana:
Marhẹ ene ru mẹrẹn erere orhianẹ e kpọke tẹmro rẹn Jehova, kerhọ ye ji roro kpahiẹn?
Ene brorhiẹn ri serhọ, rhiẹ obọdẹn iyono, vwo esegburhomẹmro ọgbogbanhon, ji vwo ẹguọlọ okokodo kpahen Jehova.—w22.01, pp. 30-31.
Userhumu ọgo ya na mẹrẹn arha hẹroso i Jehova ọrhẹ imizu re meviẹ riẹn?
Vwana yẹ ọke ra na hẹroso oborẹ i Jehova o ruẹ ekwakwa lele, nyoma re ne je vwo ẹhẹn eveva kpahen ọkpọvi ọrhẹ orhienbro ekpako na. Ọke ukpokpogho rode na ọrhọ homaphia, ne ne mwuegbe ra na huvwele ọrhọ tobọ rhianẹ e vwẹruọ ọkpọvi na-a, yanghene o serhọ rẹn ọwa-an.—w22.02, pp. 4-6.
Mesoriẹ ọmakashe na ọ ta rẹn Zechariah kpahen “ufi ovwanvwọn na uvuẹn obọ [igọvunọ] Zerubbabel”? (Zech. 4:8-10)
Emena arudo ọnana ọ yẹ ihworho i Jehova imwẹro taghene aye ina bọn oghwa ẹga na hin, oghwa na ọnọ ji nyamwu ovwan i Jehova.—w22.03, pp. 16-17.
Marhẹ ene ru rhiẹ “omamọ udje ọrẹ . . . ẹmro ẹta”? (1 Tim. 4:12)
Ọwan a tẹmro izede dẹndẹn ji dje ọghọ phia uvuẹn aghwoghwo na, so ijoro sasasa ji kpahanrhọ enọ ọke ephian uvuẹn uyono ukoko, ta urhomẹmro ji bọn awọrọ gbanhan, habaye a ji kẹnoma rẹn ẹmro aghwa.—w22.04, pp. 6-9.
Mesoriẹ ekwakwa re dje kpahen eranmo ẹne (ivie) ra hunute uvuẹn Daniel urhomu-ẹmriẹn 7, o ku kugbe rhiẹ aranmo owu jerẹ oborẹ e djerie rhọ uvuẹn Revelation 13:1, 2?
Aranmo rọ djoma uvuẹn Revelation 13 na, o mevirhọ uvie owu kirighwo, jerẹ Rome-e. Ukpomaran, o mevirhọ ọsoso omẹgbanhon usun oseghe re suẹn ituakpọ.—w22.05, p. 9.
Me yẹ izede ọghoghanren owu ene ru djephia taghene a hẹroso orhienbro ọsoso i Jehova?
Ohworho orho hinmaro kpahen ọwan, ru ọwan sọ yanghene ruẹ ọdandan haso ọwan, na damoma kẹnoma rẹn ekwẹre ọrhẹ eghrẹn, nyoma ra na nyaji ekwakwa vwo rẹn Jehova. Ọye ono ruẹ ẹkuọn rẹ ọdandan ọ soro serhọ.—w22.06, pp. 10-11.
Me yo fori nẹ omizu ọhworhare ro vwo uphẹn rọ nọ nẹrhomo uvuẹn uyono ukoko ọ karorhọ?
Orhiẹ nyoma ẹrhomo ya na ha ọkpọvi rẹn ukoko na, yanghene ruẹ aghwoghwo-o. O fo nọ ha “ẹmro i buebun” ruiruo-o, maido uvuẹn ọtonrhọ uyono ukoko. (Matt. 6:7)—w22.07, pp. 24-25.
Izede ọgo yẹ “eri ruẹ obiobiomu” ine rhiẹromẹrẹn “ẹrhọmọnuhwu ọrẹ ẹzeguon”? (John 5:29)
E brorhiẹn iborhin kpe aye fọkiẹ oborẹ aye i ru vrẹn ne-e. Ana ha aye guẹnzọn fọkiẹ iruemru ọrhẹ irueruo aye ọke arha rhọmọ aye nuhwu hin.—w22.09, p. 18.
Obọdẹn urhebro ọgo yẹ J. F. Rutherford ọ haphia uvuẹn omẹvwa re ruru uvuẹn September 1922?
Uvuẹn omẹvwa re ruru obẹ Cedar Point, Ohio, U.S.A., nọ tare: “Orodje na o suẹn ne! Are yi ne ghwoghwie rẹn awọrọ. Omarana, ghwoghwo, ghwoghwo, ghwoghwo, Orodje na ọrhẹ Uvie yi!”—w22.10, pp. 3-5.
Izede esa ego yẹ Isaiah urhomu-ẹmriẹn 30 ọ hunute, ri Jehova o ru ha userhumu rẹn ọwan vwo edirin?
Urhomu-ẹmro ọrana o djephia taghene Jehova (1) ọ dabu kerhọ, ji kpahanrhọ ẹrhomo ọwan, (2) ọ yẹ ọwan ọkpọvi, ọrhẹ (3) ọ yẹ ọwan ebrurhọ vwana, ọnọ ji yẹ ọwan uvuẹn obaro na.—w22.11, p. 9.
Mesoriẹ ana sabu ta taghene ẹmro ri ha Psalm 37:10, 11, 29, i rugba ọke ahwanren, aye ine ji rugba obaro na?
Ẹmro i David o dje kpahen ebrurhọ rọ havwiẹ uvuẹn Israel, jerẹ ọke usun i Solomon. Jesu ọ ji ta kpahen akpọ i paradais obaro na, ji hunute oghwẹmro 11. (Matt. 5:5; Luke 23:43)—w22.12, pp. 8-10, 14.