Mi Mẹrẹn Obọdẹn Omefuon Fọkime mi Hẹroso i Jehova

OBORẸ MI RU RHE I JEHOVA JI HẸROSUIẸ RHỌ

E vwiẹre mẹ ẹgbukpe 1948 uvuẹn ọko ọkokamu owu uvuẹn Nigeria. Uvwrọke ọrana, omizu ọsẹ mẹ ọhworhare re se Moustapha, ọrhẹ omizu mẹ ọkpako re se Wahabi, ni bromarhame rhiẹ Iseri Jehova. Ọke mia ha ẹgbukpe irhinrin, ọsẹ mẹ no hwuru. Ẹhẹn mẹ no seriotọre. Wahabi nọ ta mẹ taghene ame ina sabu rharhumu mẹrẹn ọsẹ ame uvuẹn ẹrhọmọnuhwu na. Ẹmro urhebro ọrana no mwurun mẹ yono i Baibol na. Ni mi bromarhame uvuẹn ẹgbukpe 1963. Imizu mẹ ehworhare awansa erọrọ ni ji bromarhame.

Uvuẹn ẹgbukpe 1965, ni mi ye lele omizu mẹ ọkpako re se Wilson ro rhirhiẹ Lagos rhirhiẹ, ji riamerhen okugbe ekobaro erọrọ ri ha ukoko re se Igbobi. Aghọghọ ọrhẹ oruru aye i vwori ọ hobọte mẹ, omarana uvuẹn January 1968, ni mi ji rhiẹ ọkobaro ọke ephian.

Omizu owu rọ ga obẹ Oghọn Ukoko re se Albert Olugbebi, no ruẹ ẹkwaphiẹrhotọre esiyẹ oghẹnrensan rhẹ iphuphẹn sekpahen ọghanronmẹ re ne vwo ekobaro oghẹnrensan obọrẹ o rierun uvuẹn Nigeria. Mi ji karorhọ ẹmro sasasa Omizu Olugbebi ọ tare: “Are jẹ iphuphẹn, are ina sabu ha ọke ọrhẹ omẹgbanhon are ga i Jehova. O vwo ewian buebun are ina wian!” Rhẹ omwemẹ mi na hẹrokele ẹhẹn oruru ọmẹraro Isaiah o vwori, ne mi fiobọrhọ ọbe mi na ga.—Isa. 6:8.

Uvuẹn May 1968, ne djeri mẹ ya ga ẹrhẹ ọkobaro oghẹnrensan uvuẹn amwa i Kano, rọ ha obọrẹ o rierun uvuẹn Nigeria. Ọnana uvwrọke re fiuvweri Biafra (1967-1970), ro kpe ihworho buebun hwu bọmọke o ki kerabọ riẹ obọrẹ ọren ọ va nẹ sa uvuẹn Nigeria. Omizu ọhworhare owu nọ damoma rọ nọ da mẹ obọ ji ne mi ja nya. Ọrẹn, ne mi ta riẹn: “Wẹnobiruo we vwo ọdamẹ kpahen mẹ. Ọrẹn, orhianẹ Jehova ọ guọlọre ne mi ya ga ye oboran, o mwurun mẹ ẹro taghene ọye rhẹ omẹmẹ ine rhirhiẹ ye.”

MI HẸROSO I JEHOVA UVUẸN EKETE UVWERI Ọ GHWỌGHỌRE

Erhirhiẹ amwa i Kano o biomurun omamọ. Uvweri re fiẹ uvuẹn amwa na ọ ghwọgheriẹ omamọ. Ọke ame a ha uvuẹn aghwoghwo, ọkezẹko ame a mẹrẹn irinmi uvuẹn izede fọkiẹ uvweri na. Dedevwo o vwo ikoko sansan uvuẹn Kano, ọrẹn imizu na buebun i zẹ ne. Ighwoghwẹmro ri vwe te awan 15 yi daji, ofẹn o mwu aye, ẹhẹn aye o ji seriotọre. Oma ọ merhen imizu enana ọke aye a mẹrẹn ame awan erhan ri rhiẹ ekobaro oghẹnrensan ri rhere. Ame ni ha urhebro rẹn aye, ji ruẹ aye gbanhon. Ame ni ha userhumu rẹn aye rharhumu ruẹ ẹkwaphiẹrhotọre uyono, ji ha userhumu rẹn aye nẹ iyẹnrẹn owian aghwoghwo na vwe Oghọn Ukoko, ji nekpẹn ẹbe mie aye.

Ame ri rhiẹ ekobaro oghẹnrensan ne yono edjadjẹ Hausa. Ọke ame ghwoghwo rẹn aye uvuẹn edjadjẹ aye, buebun ihworho na na kerhọ. Ọrẹn, ihworho re riẹ ẹga rọ mai titi uvuẹn Kano, e vwo omamerhomẹ kpahen owian aghwoghwo na-a, omarana, ame na dabu jomarhotọre. Uvuẹn erhirhiẹ owu, ọhworhare owu nọ ha aphia le mẹ ọrhẹ omizu mie lele wian. Ọrẹ omamerhomẹ, ame i sabu zẹ vabọ! Udabọ imwofẹn na, Jehova ọ ha userhumu rẹn ame “rhirhiẹ ye ọrẹ omefuon,” habaye uchunu ighwoghwẹmro na no rierun. (Ps. 4:8) Inyenana, ighwoghwẹmro ri vrẹn 500 ya ga uvuẹn ikoko ri te 11 obẹ i Kano.

A KPAREHASO AME OBẸ NIGER

Ọke oru uvuẹn August 1968, ọke mie rhirhiẹ i Kano uvwre ibiamo ezẹko ọvo, ne djeri mẹ ọrhẹ ekobaro oghẹnrensan awanva erọrọ riẹ Niamey, ro rhiẹ esiri ẹkwotọre Republic of Niger. O jiri-i, ame ni mẹrẹnvwrurhe taghene Niger, rọ ha West Africa, ọ ha usuẹn ekete ri mai djẹrẹ uvuẹn otọrakpọ na. Haba ọrẹ ame ine nyerẹn ghele ọdjodjẹrẹ na, ame ni ji yono edjadjẹ ẹkwotọre na, ro rhiẹ French. Udabọ ebẹnbẹn erana, ame ni hẹroso i Jehova, ji tuẹn owian aghwoghwo na rhọ rhẹ ighwoghwẹmro erọrọ re rhirhiẹ uvuẹn esiri amwa na. O jiri-i, joma ọsoso ihworho ri ha Niamey ra sabu se ni vwo ọbe ra ha yono ihworho, re se The Truth That Leads to Eternal Life. Ihworho a tobọ bru ame sa mọ ha ọbe na!

O jiri-i, ame ni mẹrẹnvwrurhe taghene oma ọ vwọ merhen igọmẹti na kpahen Iseri Jehova-a. Uvuẹn July 1969, ame ni kokori ruẹ omẹvwa okinhariẹ ọrukaro uvuẹn ẹkwotọre na, ihworho ri te 20 yi rhere. Ame fiẹrorhọ ighwoghwẹmro awanva ri ne bromarhame. Ọrẹn, uvuẹn ẹdẹ ọrukaro omẹvwa na, elọkpa na ni rhere, ji dobọ ẹkwaphiẹrhotọre na ji. Aye ni kpare ekobaro oghẹnrensan na ephian tobọ te oniruo okinhariẹ na riẹ ogba elọkpa. Ọke aye a nọ ame enọ hin, aye ni tare taghene ame i ghwẹrioma rhe ẹdẹ ọreva ye. Ọke ame a mẹrẹnvwrurhe taghene aye ina sabu suẹ okpetu, ame ni ruẹ ẹkwaphiẹrhotọre ra na ha ẹmro omebrurhame na phia uvuẹn oghwa omizu owu, ji ha ona bru ighwoghwẹmro na rhẹ ame uvuẹn urhie.

Ọke ikprughwre ezẹko a vrẹn, igọmẹti na no leri mẹ ọrhẹ ekobaro oghẹnrensan awan isionrin erọrọ nẹ ẹkwotọre na. Aye ni tare taghene inọke 48 ọvo ame i vwori, ame ine nẹ ẹkwotọre na, ame ọvo yi na guọlọ izede ame ine nie. Ame ni nyalele ọkpọvi na ji riẹ Oghọn Ukoko rọ ha Nigeria, avwaye ya yẹ ame ewian erọrọ.

Ne djeri mẹ riẹ ọko owu re se Orisunbare uvuẹn Nigeria, ekete mia dabu riamerhen owian aghwoghwo na rhẹ ẹko ighwoghwẹmro ekokamu re rhirhiẹ avwaye. Ọrẹn, ọke ibiamo erhan a vrẹn hin, Oghọn Ukoko na nọ ha use mẹ nẹ omẹmẹ ọvo i ghwẹrioma riẹ Niger. Ogberi mẹ unu ọke ukaro, udu o ji bru mẹ, ọrẹn ne mi vwo omwemẹ mi na ghwẹrioma bru imizu ri ha Niger!

Ne mi ghwẹrioma riẹ Niamey. Ẹdẹ mie te oboran, ọleyi owu ro rhiẹ onyẹ Nigeria nọ mẹrẹnvwrurhe taghene mẹmẹ Oseri Jehova, nọ nọ mẹ enọ kpahen i Baibol na. Ame ni yono kugbe, bibiesuọn nọ dobọ isigẹti ephopho ọrhẹ enyo ẹda vrẹn oma ji, ọke oru no bromarhame. Nẹ ọke ọrana, oma ọ merhenren mẹ mie lele imizu ri ha Niger ghwoghwo, ji ha userhumu rẹn awọrọ rhe urhomẹmro na. Ọke mie tu te avwaye, imizu ukoko na awan 31 yi ha ẹkwotọre na; ọke mie nẹ avwaye aye i te 69 ne.

“UVUẸN ẸKWOTỌRE GUINEA AME A GHWAI RHE KPAHEN OWIAN UVIE NA-A”

Uvuẹn December 1977, ne mi riẹ Nigeria ye yono rhọ. Uvuẹn obẹta uyono ọrana rọ ha ikprughwre esa na, Ọrọhẹrote ewian Oghọn Ukoko na re se Malcolm Vigo, nọ ta mẹ ne mi se ileta ro nẹ Oghọn Ukoko i Sierra Leone rhe. Imizu na a guọlọ omizu ọhworhare ro rhiẹ ọkobaro ro vwo omọkpokpọ, rọ vwọ ji rọnmọ rọ djẹ Oyibo ọrhẹ French, rọ nọ sabu ga ẹrhẹ oniruo okinhariẹ obẹ Guinea. Omizu Vigo nọ ta mẹ taghene e yoni mẹ ne mi sabu ya wian owian ọrana. Nọ dabu dje fiotọre taghene owian na ọ gbanhonron omamọ. Nọ ha urhebro mẹ: “Dabu roro kpahiẹn wu ki brorhiẹn.” Ogege ne mi kpahenrhọ ye: “Ra mẹriẹn taghene Jehova yo dje mẹ na, mi na nya.”

Ne mi riẹ Sierra Leone ji mẹrẹn imizu ri ha Oghọn Ukoko na. Owuọwan usuẹn Umẹ Rọ Hẹrote Oghọn Ukoko na nọ ta mẹ, “Uvuẹn ẹkwotọre Guinea, ame a ghwai rhe kpahen owian Uvie na-a.” Dedevwo Oghọn Ukoko na yọ hẹrote owian Uvie na uvuẹn ekete erọrọ ri kẹrẹ Guinea, aye i vwa sabu lele imizu na tẹmro-o, fọkiẹ erhirhiẹ usun oseghe ẹkwotọre na. Udabọ omẹdamu sansan Umẹ na o djephia, aye a sabu dje ohworho nọ kọn bru imizu na-a. Omarana, ne djeri mẹ riẹ esiri ẹkwotọre Guinea, re se Conakry, ne mi ya ha ọbe mi ne rhirhiẹ amwa na.

Ọke mie te Conakry, ne mi riẹ ekete onyẹ Nigeria ọ sabu ha ọbe, ji mẹrẹn ohworho ro meviẹ rẹn Nigeria. Ne mi ta riẹn kpahen omwemẹ mi ne ghwoghwo uvuẹn Guinea. Nọ ta mẹ taghene mi vwe rhirhiẹ amwa na-a, fọkime ana sabu mwu mẹ yanghene kọn mẹ. Nọ ta me: “Ghwẹrioma riẹ Nigeria ye ghwoghwo oboran,” ne mi ta riẹn, “Mi guọlọ daji obonẹ.” Omarana, nọ ya ileta vwe igọmẹti rọ ha Guinea nọ ha userhumu mẹ, ọga na no ru te omaran.

O jiri-i, ne mi ghwẹrioma riẹ Oghọn Ukoko rọ ha Sierra Leone, ji ta rẹn aye kpahen orhienbro igọmẹti na. Oma ọ merhen imizu na omamọ ọke aye rhon kpahen oborẹ i Jehova ọ ha userhumu mẹ vwo efikparobọ. Igọmẹti na ọ ha uphẹn mẹ ne mi rhirhiẹ Guinea!

Nẹ ẹgbukpe 1978 riẹ 1989, yi mia wian owian oniruo okinhariẹ uvuẹn Guinea, Sierra Leone, ji rhiẹ ọrọ ha userhumu rẹn oniruo kinhariẹ obẹ Liberia. Ọke ukaro, mi kpomurun omamọ. Ọnana ọ phia uvuẹn ekete ri havwiẹ kologho. Ọrẹn, imizu na na damoma kpare mẹ riẹ ihọsipita.

Uvuẹn erhirhiẹ owu, ne mi kpomu emiamo i malaria ọrhẹ edjan. Ọke omamẹ ọ gbanhon, ne mi mẹrẹnvwrurhe taghene imizu na a djiroro ekete aye ine sin mẹ rhọ! Udabọ erhirhiẹ egbogbanhon erana, mia sẹrerhumuji ewian mẹ-ẹ. Mi ji vwo imwẹro taghene obọdẹn omefuon ro rhirhiẹ ye ọke jijiri, o nẹ obẹ Jehova sa, rọ nọ sabu rhọmọ eri hwuru na.

OMẸMẸ ỌRHẸ ANE MẸ I HẸROSO I JEHOVA

Uvuẹn ẹgbukpe 1988, ne mi mẹrẹn omizu ọmase owu ro rhiẹ ọkobaro re se Dorcas, ro vwo omeriotọre ọrhẹ oruru kpahen ogame i Jehova. Ame ni rọnmọren, no ji kwomakugbe mẹ uvuẹn owian oniruo okinhariẹ na. Dorcas omamọ ane ro vwo ẹguọlọ rọ ji homaze. Ame awanva a nya iroko 15 uvwre ikoko sansan, rhẹ ehwan ame i kparare. Harẹn ikoko ri serabọ omamọ, ame a ha oborẹ ame ina sabu ha kpare ehwan nya izede ri vwo irogho ọrhẹ ukpotọ buebun.

Dorcas o vwo uduefigbere omamọ. Jerẹ udje, ọkezẹko ame a dan ame rọ vuọnren rhẹ egbakara vrẹn. Ọke owu rẹ ame a nya ugbo onya ẹdọke isionrin, ibriji ra ha erhan bọn nyavrẹn oberun urhie no burhunrun, ame ni ghwa ewọ nyavrẹn. Ọke i Dorcas o vẹnrẹn nẹ owọ na, no serhẹ ame okokodo. Ame awanva e rhe oborẹ a rhẹnrhẹ-ẹn, ọrẹn agbakara i vuọn ame na. Ọrẹ omamerhomẹ, idama ezẹko ni pho ruẹ ame na ye simie. Emru ọrana ọ kpokpiri ame uvwrọke ezẹko, ọrẹn ame fiobọrhotọre-e.

Uvuẹn ọtonrhọ 1992, ogberi ame unu taghene Dorcas ọ mẹrenvwan. Ame ne roro sẹ ame ina wian owian ọkobaro oghẹnrensan gbinẹ ame ina dobọ ji. Ame ni tare: “Jehova ọ yẹre ame ẹghẹlẹ ne!” Omarana, ame ni mwu odẹ na Jahgift rẹn ọmọ ame ọgbọtọ. Ẹgbukpe ẹne a vrẹn hin, ame ni vwiẹ ọmọ ọhworhare, ame ni mwu odẹ na Eric riẹn. Emọ ame awanva na i dabu homakpahontọre uvuẹn ogame i Jehova. Jahgift ọ gare uvuẹn ekete ra rhian erhianrhian uvuẹn Conakry, Eric odibo owian uvuẹn ukoko rọ havwọ.

Dedevwo Dorcas ọ dobọ owian ọkobaro oghẹnrensan ji, ọrẹn o ji vwobọrhọ owian ọkobaro ọke rọ tobọ hẹrote emọ ame. Nyoma userhumu i Jehova, mi ji ga ẹrhẹ ọkobaro oghẹnrensan. Ọke emọ ame a ghwanren ne, Dorcas nọ rharhumu tuẹn owian ọkobaro oghẹnrensan rhọ. Vwana, ame a ga ẹrhẹ imishọnari uvuẹn Conakry.

JEHOVA Ọ YẸRE AME OBỌDẸN OMEFUON

Ọke ephian yi mie riẹ ekete i Jehova o djeri mẹ nya. Ọgbọ buebun, ame i mẹrẹn usimi ọrhẹ ebrurhọ i Jehova ne. Fọkime ame i hẹroso i Jehova, ame ni vabọ omiamiamo buebun rẹ ihworho ri vwa hẹroso i Jehova a rioja ye, fọkime aye i hẹroso ekwakwa ugboma. Omẹmẹ ọrhẹ Dorcas, i yonorin nyoma oborẹ ame i rhiẹromẹrẹn taghene Esiri obọdẹn omefuon yẹ “Osolobrugwẹ usimi ọwan,” Jehova. (1 Chron. 16:35) Mi vwo imwẹro taghene arhọ ọsoso ihworho ri hẹrosuiẹ, “ana dabu sẹrorẹ aye rhẹ uvuẹn ẹkpa arhọ ọrẹ Jehova.”—1 Sam. 25:29.