Vwo Omamerhomẹ Ọke wa Hẹrhẹ i Jehova Rhẹ Erhionrin

Ọrẹn, Jehova ọ guọlọre ne vwo erhionrin hẹrhiẹ, nọ kpare idjaghwẹ uvuẹn ọke rọ kwaphiẹrhọ. Mesoriẹ ọ guọlọ ọrana mie ọwan? Me yọ nọ ha userhumu rẹn ọwan vwo omamerhomẹ ọke ra hẹrhẹ?

MESORIẸ I JEHOVA Ọ GUỌLỌ NA HẸRHẸ?

Baibol na nọ tare: “Jehova ọ hẹrhẹ rhẹ erhionrin ro no gbe arodọmẹ rẹn are, ono vẹnrẹn me gbe arodọmẹ rẹn are. Fọkime i Jehova yẹ Osolobrugwẹ ro brorhiẹn ọsoso. Omamerhomẹ ọ havwiẹ rẹn ọsoso ihworho re fiẹrorhọ ye.” (Isa. 30:18) Ọmẹraro Isaiah ọ tẹmro erana vwe itu i Jew ri gbanhon urhomu ọke ọrana. (Isa. 30:1) Ọrẹn, o vwo ezẹko usuẹn aye ri fuevwan, omarana ẹmro erana ni yẹre aye ifiẹrorhọ. Aruẹ ẹmro erana a ji yẹ idibo i Jehova inyenana ifiẹrorhọ.

Omarana, ofori na hẹrhẹ fọkime Jehova ọ ji hẹrhẹ rhẹ erhionrin. O vwo ọke rọ kwaphiẹrhọ ro no fiobarhọ enyerakpọ ọnana, nọ hẹrhẹ ọke ẹdẹ ọrhẹ unọke ọrana ono te. (Matt. 24:36) Uvwrọke ọrana, ono fiotọre taghene efian yi Dẹbolo ọ mọren ba i Jehova ọrhẹ idibo yi. No no tiẹ Echu ọrhẹ kohworho kohworho ri ha obọ ọnẹyen nie, ọrẹn Jehova ono “gbe arodọmẹ rẹn [ọwan].”

Ọkezẹko Jehova o tiẹ ebẹnbẹn ọwan nie vwana-a, ọrẹn ọ yẹ ọwan imwẹro taghene ana sabu vwo omamerhomẹ ọke ra hẹrhẹ. Jerẹ oborẹ Isaiah ọ tare, ana sabu vwo omamerhomẹ ọke ra hẹrhẹ, yanghene fiẹrorhọ taghene emru orhorhomu ọnọ phia. (Isa. 30:18)a Marhẹ ene ru vwo omamerhomẹ ọrana? Ekwakwa ẹne ina sabu ha userhumu rẹn ọwan.

OBORẸ ENE RU VWO OMAMERHOMẸ ỌKE RA HẸRHẸ

Tẹnrovi ekwakwa irhorhomu. Orodje David ọ mẹrẹn irueruo ibiobiomu buebun ri phiare uvuẹn akpenyerẹn yen. (Ps. 37:35) Ọrẹn, nọ yare: “Fọdu obaro i Jehova ne wu hẹrhiẹ rhẹ oruru. Wu vwa tuekwẹre kpahen ohworho ro vwo efikparobọ uvuẹn irorẹdjẹ ibiobiomu enẹye-en.” (Ps. 37:7) David ọ dabu ha urhebro ọrana ruiruo, nyoma rọ tẹnrovi imwẹro na taghene Jehova ono simie. Ọ ji dabu djokarhọ ebrurhọ ephian ri Jehova o tiobọnu riẹn. (Ps. 40:5) Arha ji tẹnrovi ekwakwa irhorhomu ra phia uvuẹn akpenyerẹn ọwan ukperẹ ono rhiẹ irueruo ibiobiomu na, nọ nọ lọhọ ra na hẹrhẹ i Jehova.

Rhe jiri Jehova ọke ephian. Ọkezẹko David yọ ya Psalm 71, nọ ta rẹn Jehova: “Mi na rha hẹrhẹ; mi na haba ujiri ọnọ.” (Ps. 71:14) Marhẹ ono ru jiri Jehova? Ọnọ ta rẹn awọrọ kpahen Jehova, ji so ijoro jirie. (Ps. 71:​16, 23) Jerẹ i David, ana sabu vwo aghọghọ ọke ra hẹrhẹ i Jehova. Ọwan e jirie nyoma owian aghwoghwo na, ẹmro ra ta kẹdẹkẹdẹ ọrhẹ ijoro ra ha ga ye. Omarana, ọke wa rha so ijoro ukoko na, dabu djokarhọ ikerẹmro na ọrhẹ oborẹ o ru yọ aghọghọ.

Mẹrẹn uduẹharhaghwẹ mie imizu ukoko. Ọke i David o rhiẹromẹrẹn ebẹnbẹn, nọ ta rẹn Jehova: “Uvuẹn udaro ihworho ri vwo atamwu kpahuọn, mi ne fiẹrorhọ odẹ ọnọ.” (Ps. 52:9) Ọwan ina ji sabu mẹrẹn urhebro mie imizu ukoko na, orhiẹ uvuẹn uyono ukoko ọrhẹ aghwoghwo ọvo-o, ọrẹn ọke ra tobọ riakpọ kugbe.—Rom. 1:​11, 12.

Ruẹ ifiẹrorhọ ọnọ gbanhon. Psalm 62:5 nọ tare: “Mia fọduẹ hẹrhẹ Osolobrugwẹ fọkime ifiẹrorhọ mẹ o nẹ obọ ọnẹyen rhe.” Ifiẹrorhọ ọgbogbanhon o surhobọmwu imwẹro ọgbogbanhon—ọnana ọghanranren omamọ orhianẹ a guọlọ diẹn enyerakpọ ọnana ghwẹ oborẹ e fiẹrorhọ. Ene vi vwo imwẹro taghene ive i Jehova ine rugba, o toro oborẹ ono jiri te ra na hẹrhẹ-ẹ. Ana sabu ruẹ ifiẹrorhọ ọwan gbanhon nyoma re ne yono i Baibol na, nọyẹ aruẹmẹrẹn sansan ri havwiẹ, oborẹ eri yariẹ i ru vwo ekwerhọ owu, ọrhẹ iyẹnrẹn sansan ri Jehova o dje kpahen omayen. (Ps. 1:​2, 3) Habaye, ofori na rha “nẹrhomo rhẹ ẹhẹn ọfuanfon,” na sabu vwo obọdẹn onyerẹnkugbe rhẹ Jehova ọke ra hẹrhiẹ no ruẹ ive yi kpahen arhọ i bẹmẹdẹ gba.—Jude 20, 21.

Jerẹ Orodje David, fiudugbere taghene Jehova ọ dabu hẹrote ihworho ra hẹrhiẹ, no ji dje ẹguọlọ atamwu Ọnẹyen phia rẹn aye. (Ps. 33:​18, 22) Rhe vwo erhionrin hẹrhẹ i Jehova nyoma ra na tẹnrovi ekwakwa irhorhomu ra phia uvuẹn akpenyerẹn ọwan, nyoma re jirie, mẹrẹn uduẹharhaghwẹ mie imizu ukoko na, ji ruẹ ifiẹrorhọ ọghoghanren ọwan gbanhanrhọ.